ހުޅުމާލޭ ފޭސް 2 ގައި ހުރި ސްޓެލްކޯގެ ޓްރާންސްފޯމަރަކުން ރޭ ވައްކަން ކުރަން އުޅެނިކޮށް ކަރަންޓުގައި ޖެހި ޒުވާނަކު މަރުވެއްޖެ އެވެ.
އެ ހާދިސާގައި މަރުވީ ހއ. ހޯރަފުށީ، ފްރެންޒީ، ހުސައިން ޝިފާއު، 27، ކަމަށް ފުލުހުން ކަށަވަރުކޮށް ދެއްވި އެވެ.
ފުލުހުން ބުނި ގޮތުގައި އެ މީހާ ކަރަންޓުގައި ޖެހި ވެއްޓިފައި އޮތީ ހިޔާގެ ތިން ވަނަ ޓަވަރު ކައިރީގައި ހުރި ޓްރާންސްފޯމަރެއްގެ ތެރެއަށެވެ. އެ މީހާ ވެއްޓިފައި އޮތްވައި ފެނުނީ ފަތިހު 4:00 ހާއިރު އެ ސަރަހައްދު ޕެޓްރޯލްކުރަމުން ދިޔަ ފުލުހުންނަށެވެ.
އެ މީހާ ހޮސްޕިޓަލަށް ގެންދިޔައިރު ވެސް އޮތީ މަރުވެފަ އެވެ.
މި ހާދިސާ ހިނގީ ޓްރާންސްފޯމަރުކުން ވައްކަން ކުރުމުގެ ތެރޭގައި ކަރަންޓުގައި ޖެހި ހިތާމަވެރި ހާދިސާއެއް ހިނގާފާނެ ކަމުގެ އިންޒާރު ވެސް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ހުކުރު ދުވަހު ދެއްވާފައި ވަނިކޮށެވެ.
މާލެ އާއި ހުޅުމާލޭގައި ހުރި ސްޓެލްކޯގެ ސަބްސްޓޭޝަންތަކުގެ ތަޅުތައް ހަލާކޮށް، އެތަންތަނަށް ވަދެ ޓްރާންސްފޯމަރުތައް ނިއްވާލައި، އެ ޓްރާންސްފޯމަރުތަކުގެ އެކި ބައިތައް ވަގަށް ނަގަމުންދާތީ އެ މައްސަލަ ކަމާބެހޭ އިދާރާތަކަށް ހުށަހަޅާފައިވާ ކަމަށް ވެސް ފަހުމީ މިދިޔަ ހުކުރު ދުވަހު ވިދާޅުވެފައިވެ އެވެ.
މާލެ އާއި ހުޅުމާލޭގެ ބައެއް ސަރަހައްދުތަކުން ފަހަކަށް އައިސް ކަރަންޓު ކެނޑެމުން ދަނީ ވެސް ޓްރާންފޯމަރުތަކުން ވައްކަން ކުރުމަށް އެ ތަކެތި ނިއްވާލާތީ އާއި އެ ތަންތަނަށް ގެއްލުން ދޭތީ ކަމަށް ވެސް އޭނާ ވިދާޅުވި އެވެ.
"މިއީ މިކަން ކުރާ ފަރާތްތަކަށްވެސް ބޮޑު ނުރައްކަލަކަށް ވާއިރު، މިއީ ކަރަންޓުގެ އަސާސީ ޚިދުމަތް 24 ގަޑިއިރު މެދުނުކެނޑި ދޭން މި ކުންފުނިން ކުރަމުންގެންދާ މަސައްކަތަށްވެސް އެޅޭ ހުރަހެއް. މިފަދަ ކަންކަން ކުރަމުންގެންދާ ފަރާތްތައް ހުއްޓުވައި އެފަރާތްތަކަށް ފިޔަވަޅު އަޅައިދީ، އަދި ވަގަށް ނަގައިގެން ވިއްކާ މިދަފަ ތަކެތި ގަންނަ ފަރާތްތަކަށްވެސް ފިޔަވަޅުއަޅައިދިނުމަށް ކަމާއި ބެހޭ ފަރާތްތަކަށް އިލްތިމާސް ކުރަން،" ފަހުމީ ވިދާޅުވި އެވެ.
ޓްރާންސްފޯމަރުން ވައްކަން ކުރަން އުޅެނިކޮށް ކަރަންޓުގައި ޖެހި މަރުވި ޒުވާނާގެ ކަށުނަމާދު އޮންނާނީ މިއަދުގެ މެންދުރު ނަމާދަށް ފަހު ހުޅުމާލޭ ސަހަރާ މިސްކިތުގަ އެވެ.
