ނ. ކެނދިކުޅުދޫއަށް ވަޑައިގެން ރައީސް ޑރ. މުހައްމަދު މުއިއްޒު ކެމްޕެއިން ކުރައްވާފައިވާތީ އެކަން އެ ރަށު ކައުންސިލުން ކުށްވެރި ކުރުމަކީ އެމަނިކުފާނުގެ އިއްޒަތާއި ކަރާމާތަށް އުނިކަން ދިނުން ކަމަށް ލޯކަލް ގަވަމަންޓް އޮތޯރިޓީން ބުނެފި އެވެ.
އެލްޖީއޭގެ ސީއީއޯ ޑރ. މަރިޔަމް ޒުލްފާ ސޮއި ކުރައްވާ ކެނދިކުޅުދޫ ކައުންސިލަށް ފޮނުވި ސިޓީއެއްގައި ތުހުމަތުކޮށްފައި އޮތީ، ރަސްމީ ދަތުރެއްގައި ރައީސް ކެމްޕެއިން ކުރުން ކުށްވެރި ކުރުމަކީ އެމަނިކުފާނުގެ ޒިންމާ އަދާ ކުރަން ކައުންސިލުން ހުރަސް އެޅުން ކަމަށެވެ.
"... ތިޔަ ކައުންސިލުން ދިވެހިރާއްޖޭގެ އިއްޒަތްތެރި ރައީސުލްޖުމްހޫރިއްޔާގެ އިއްޒަތާއި ކަރާމާތަށް އުނިކަން ލިބޭ ގޮތަށް އެމަނިކުފާނުގެ އިސްތަށިފުޅުގައި ހަގީގަތާ ހިލާފު އިލްޒާމު އަޅުއްވާ ކައުންސިލުން ނޫސްބަޔާން ނެރުމަކީ މި އޮތޯރިޓީން ހަރުކަށި އިބާރާތުން ކުށްވެރި ކުރާ ކަމެއް،" އެ ސިޓީގައި ބުނެފައިވެ އެވެ.
މިދިޔަ ބުރާސްފަތި ދުވަހު ކެނދިކުޅުދޫއަށް ވަޑައިގެން ރައީސް ވިދާޅުވީ، ރައްޔިތުންގެ މަޖިލީހުގައި އިދިކޮޅު އެމްޑީޕީ ތަމްސީލު ކުރަނީ ޕަޕެޓުތަކެއް ކަމަށާއި ސަރުކާރުން ކުރާ ކަންކަމުގައި އެއްބާރުލުން ދޭނެ މަޖިލީހެއް ހޮވައިދޭން އެމަނިކުފާނު އެދިވަޑައިގަންނަވާ ކަމަށެވެ.
"ޖޯއިސްޓިކް އޮތީ އެހެން ފަރާތެއްގައި. އެ ޖޯއިސްޓިކް އަނބުރާ ގޮތަކަށް، ޕަޕެޓްތަކެއް ގޮތަށް އެނބުރެމުން މިދަނީ ރައްޔިތުންގެ މަޖިލީހުގެ އެމްޑީޕީގެ ބައެއް މެންބަރުން. މިއީ ހަގީގަތް. މިއަށް ލޯ މަރައިލެވޭނެ ގޮތެއް ނޯންނާނެ،" ރައީސް މުއިއްޒު ވިދާޅުވި އެވެ. "އެހެންވީމާ، މިކަންކަން އަޅުގަނޑުމެންނަށް ބާރު ސްޕީޑްގައި ގެންދިޔުމުގެ އެހީތެރިކަން ދޭނެ ރައްޔިތުންގެ ފަޅީގައި ތިބޭ، ރައްޔިތުން ހޮވި ސަރުކާރުން ކުރާ ކަންކަމުގައި ރައްޔިތުންނަށްޓަކައި މަގުފަހިކޮށްދޭނެ ރައްޔިތުންގެ މަޖިލީހެއް ހޮވައިދިނުމަކީ އަޅުގަނޑު އެދޭ އެދުމެއް."
ކެނދިކުޅުދޫ ކައުންސިލުން ނެރުނު ބަޔާނުގައި ބުނީ ރަސްމީ ދަތުރެއްގައި އެމަނިކުފާނު އެ ރަށަށް ވަޑައިގަންނަވާ ކަމަށް އެންގުމުން އެކަމުގެ ތައްޔާރީތައްވެފައި އޮއްވައި، ވަޑައިގެން ބޭއްވި ޖަލްސާގައި ކުރެއްވީ ކެމްޕެއިން ކަމަށެވެ.
"ރައީސްގެ ދަތުރުފުޅަކީ ރަސްމީ ދަތުރުފުޅެއް ކަމަށް އެންގުމުން ހުރިހާ އިންތިޒާމެއް ހަމަޖެއްސީ ކެނދިކުޅުދޫ ކައުންސިލުން. ނަމަވެސް ހަފްލާގެ ވަކި ހިސާބަކުން ރައީސް މުއިއްޒު އާއި އެމަނިކުފާނުގެ ކެބިނެޓުގެ ބައެއް ބޭފުޅުން ދެއްކެވި ވާހަކަފުޅުގެ މިސްރާބު ބަދަލުވެގެން ދިޔައީ، ސިޔާސީ ޕޯޑިއަމެއްގައި، ރައީސް ނިސްބަތްވާ ޕާޓީގެ ފަރާތުން މަޖިލިސް އިންތިހާބަށް ކުރިމަތިލާފައިވާ ކެންޑިޑޭޓުންނަށް ތާއީދު ހޯއްދެވުމަށް ދެއްކެވި ވާހަކަފުޅަކަށް،" ކެނދިކުޅުދޫ ކައުންސިލުން ބުނެފައިވެ އެވެ.
ކައުންސިލުގެ ބަޔާނުގައި ރަސްމީ ތައްގަނޑު ޖަހާފައި އޮތް ނަމަވެސް މީހަކު ސޮއިކޮށްފައި ނެތުމުން އެ ބަޔާނުގެ ސައްހަކަމާމެދު ސުވާލު އުފެދޭ ކަމަށް ވެސް އެލްޖީއޭއިން ބުނެފައިވެ އެވެ. ނަމަވެސް ބަންޑާރަ ނައިބުގެ އޮފީހުން އެންމެ ފަހުން ނެރުނު ދެ ނޫސްބަޔާނުގައި ވެސް މީހަކު ސޮއިކޮށްފައެއް ނެތެވެ.
އެގޮތުން އިންޓަނޭޝަނަލް ކޯޓް އޮފް ޖަސްޓިސްގައި ދިވެހިރާއްޖެއިން ވަކާލާތު ކުރުމުންނާއި މޯލްޑިވްސް އިންޓަނޭޝަނަލް އާބިޓްރޭޝަން ސެންޓަރަށް ހުށަހެޅި މައްސަލައަކާ ގުޅިގެން އަދި އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ އިން ނިންމާފައިވާ ނިންމުން ދިރާސާކުރަން ނިންމުމުން، ބަންޑާރަ ނައިބުގެ އޮފީހުން ނެރުނު ނޫސްބަޔާންތަކުގައި ވެސް މީހެއްގެ ސޮޔެއް ނެތެވެ.
އެލްޖީއޭއިން ކެނދިކުޅުދޫ ކައުންސިލަށް އެންގީ ހޯމަ ދުވަހުގެ 2:00 ގެ ކުރިން އެ ކައުންސިލުން ނެރުނު ބަޔާން ބާތިލުކޮށް އެ އިދާރާއަށް އެކަން އެންގުމަށެވެ.
