މަޝްހޫރު ސިޓްކޮމް، ފްރެންޑްސްގެ އެކްޓަރު މެތިއު ޕެރީ މަރުވީ އޯވާޑޯޒްވެގެން ކަމަށް އޮޓޮޕްސީ ރިޕޯޓުން ދައްކައިފި އެވެ.

ޓީވީ ޝޯތަކުގެ ތާރީހުގައި ވެސް އެންމެ ގިނަ ބައެއްގެ މަގުބޫލުކަން ހޯދި އެއް ސީރީޒް، ފްރެންޑްސްގައި ޗޭންޑްލާ ބިންގުގެ ރޯލު އަދާ ކޮށްފައިވާ ޕެރީ މަރުވެފައި އޮއްވައި ފެނުނީ މިދިޔަ އޮކްޓޫބަރު 28 ވަނަ ދުވަހު އޭނާ ދިރިއުޅޭ އެޕާޓުމަންޓުގެ ޖަކޫޒީ ތެރޭގައި އެވެ.

އުމުރުން 54 އަހަރުގެ ޕެރީ މަރުވި ގޮތް ތަހުގީހު ކުރުމަށް ހެދި އޮޓޮޕްސީ ރިޕޯޓުން ހާމަވި ގޮތުގައި ޕެރީ މަރުވެފައި ވަނީ ސީދާ ކެޓަމިންއަށް އޯވާޑޯޒްވުމުގެ ސަބަބުންނެވެ. ޖަކޫޒީ ތެރޭގައި ގެނބުން އެ ރިޕޯޓުގައި ހިމަނާފައި ވަނީ މަރުގެ ދެވަނަ ސަބަބުގެ ގޮތުގަ އެވެ.

ހިތުގެ ބަލި ވެސް ތަހަންމަލު ކުރަމުންދިޔަ ޕެރީއަކީ ބަނގުރަލާއި މަސްތުވާތެކެއްޗަށް އޭނާ ދެވި ހިފާފައިވާ މިންވަރުގެ ވާހަކަ ފާޅުގައި މީހުންނާ ހިއްސާ ކުރަމުންދިޔަ މީހެކެވެ. އޭނާ މަރުވިއިރު، ދިޔައީ ޑިޕްރެޝަނާއި އެންޒައިޓީގެ ފަރުވާއެއްގެ ގޮތުގައި ކެޓަމިން ޓްރީޓްމެންޓެއް ނަގަމުންނެވެ. ނަމަވެސް އެންމެ ފަހުން ކެޓަމިން ޓްރީޓްމެންޓެއް ޕެރީ ނަގާފައި ވާކަމަށް ރިޕޯޓުތަކުން ދައްކަނީ މަރުވުމުގެ އެއް ހަފުތާ ކުރިންނެވެ. އެހެންކަމުން އެ ޓްރީޓްމެންޓާއި ޕެރީގެ މަރާ އެއްވެސް ގުޅުމެއް ނެތް ކަމަށް ރިޕޯޓު އެކުލަވާލި ލޮސް އެންޖަލިސް ކައުންޓީ މެޑިކަލް އެގްޒެމިނާ އޮފީހުން ބުނެފައިވެ އެވެ.

"މރ. ޕެރީގެ ކޭސްގައި އޭނާ މަސްތުވާތަކެތި ބޭނުން ކޮށްފައި ވަނީ ކިހިނެއް ކަމެއް ދެނެގަނެވިފައެއް ނުވޭ،" އެ ރިޕޯޓުގައި ބުނެފައިވެ އެވެ.

ޕެރީގެ އޮޓޮޕްސީން އެނާގެ ހަށިގަނޑުން ކެޓަމިން ފިޔަވައި ބަނގުރަލާއި ކޮކެއިން ނުވަތަ ހިރޮއިން ފަދަ އެއްވެސް އެހެން މަސްތުވާއެއްޗެއްގެ އަސަރު ފެނިފައެއް ނުވެ އެވެ.

1994 އިން 2004 އަކަށް އެއާ ކުރި ފްރެންޑްސް ސީރީޒްގައި ޕެރީ އަދާ ކުރި ރޯލުން އެނާ ވަނީ ދުނިޔޭގެ އެންމެ މަގުބޫލު އެކްޓަރުންގެ ތެރެއިން ޖާގަ ހޯދައިފަ އެވެ. ޕެރީގެ ވަކިވުމާއެކު ފްރެންޑްސްގައި ޕެރީއާއެކު އެކި ރޯލުތައް އަދާ ކޮށްފައިވާ ފަންނާނުންނާއި ފްރެންޑްސްގެ ފޭނުން ވަނީ ހިތާމައިގެ މެސެޖުތައް މީސްމީޑިއާއަށް ދޫކޮށްލައިފަ އެވެ.