ސަރުކާރަށް ދެ ހަފުތާ ނުވަނީސް މަގާމުތަކުން ވަކިކުރަން ޖެހުނު މީހުން އެ މަގާމުތަކަށް އައްޔަނުކުރެވުނީ ބައެއް ކަންކަން ބަލަން ޖެހޭ ވަރަށް ނުބަލައި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް މުއިއްޒުގެ ސަރުކާރުގެ ފުރަތަމަ 14 ދުވަހުގެ ތެރޭގައި ދެ ސްޓޭޓް މިނިސްޓަރުންނާއި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އަށް އައްޔަނުކުރި ބޯޑު މެމްބަރަކު މަގާމުން ވަކިކުރި އެވެ.

އެގޮތުން ފުރަތަމަ ވަކިކުރީ ފޮރިން މިނިސްޓްރީގެ ސްޓޭޓް މިނިސްޓަރަށް އައްޔަނުކުރި ފަހުމީ ހަސަން އެވެ. އޭނާ މަގާމުން ވަކިކުރީ އާންމުންގެ ފާޑުކިޔުން ބޮޑުވެފައި ވަނިކޮށެވެ. ފަހުމީ އެ މަގާމަށް އައްޔަނުކުރުމުން އާންމުންގެ ގިނަ ބަޔަކު ނުރުހުނީ ޖިންސީ ފުރައްސާރައިގެ މައްސަލައެއްގައި އޭނާ ސިވިލް ސާވިސް ކޮމިޝަން (ސީއެސްސީ) ގެ ރައީސްކަމުން ވަކިކޮށްފައި ވާތީ އެވެ.

ދެން ވަކިކުރީ ޓޫރިޒަމް މިނިސްޓްރީގެ ސްޓޭޓް މިިނިސްޓަރަކަށް އައްޔަނުކުރި މުންއިމް އަނީސް އެވެ. އޭނާ ވަކިކުރި ސީދާ ސަބަބެއް ރައީސް އޮފީހުން ހާމަނުކުރި ނަމަވެސް، މައުލޫމާތު ލިބޭ ގޮތުގައި އޭނާ ވަކިކުރީ ކުރީގެ ރައީސް އިބްރާހިމް މުހައްމަދު ސޯލިހަށް ދެވަނަ ދައުރަކަށް އިންތިހާބުކުރަން އަމަލީ ގޮތުން ކެމްޕެއިންގެ ބައިވެރިވެފައިވާތީ އެވެ.

މަގާމުން ވަކިކުރި ތިން ވަނަ މީހަކީ ތިމާވެއްޓާ ބެހޭ މިނިސްޓްރީގެ ކުރީގެ ސްޓޭޓް މިނިސްޓަރު އަދި ސްޓެލްކޯގެ ކުރީގެ އެމްޑީ ހަސަން މުގުނީ އެވެ. އޭނާއަށް ޕީސީބީގެ މެމްބަރުކަން ދިންތާ ތިން ދުވަސް ނުވަނީސް މުގުނީއާ ނުލައި ރައީސް މުއިއްޒު އަލުން އެ ބޯޑު އެކުލަވާލެއްވި އެެވެ.

މިހާ ކުރު މުއްދަތެއްގެ ތެރޭގައި ސަރުކާރުގެ މަތީފަޑިއަށް އައްޔަނުކުރި ބަޔަކު ވަކިކުރެއްވީ ކީއްވެގެންތޯ ނޫސްވެރިޔަކު ސުވާލުކުރުމުން، ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް މުއިއްޒު ވިދާޅުވީ އެކަން އެގޮތުން ހިނގައި ދިޔައި އިދާރީ ގޮތުން ހެދުނު ގޯހެއްގެ ސަބަބުން ކަމަށެވެ.

"އައްޔަނުކުރި ދެ ތިން ބޭފުޅަކު ވަޒީފާއިން ވަކިކުރިން، ދެން އެއީ އިދާރީ ގޮތުން އަޅުގަނޑުމެންނަށް ހެދިފައި އޮތް ގޯހެއް އެއީ، އައްޔަނުކުރި އިރުގައި ބައެއް ކަންތައްތައް ޗެކު ނުކުރެވި އައްޔަނުކުރެވުނު ކުރުން އެއީ ރަނގަޅަށް ކުރެވުނު ކަމެއް ނޫން،" އެމަނިކުފާނު ވިދާޅުވި އެވެ.

ރައީސްގެ ޖަވާބާ ވިއްދައިގެން، ޗެކު ނުކުރެވުނީ ކޮން ކަމެއްތޯ ނޫސްވެރިޔާ ސުވާލުކުރުމުން، އިތުރު ތަފްސީލަކަށް ވަޑައިނުގެން ރައީސް މުއިއްޒު ވިދާޅުވީ ބައެއް މައުލޫމާތުތައް ޗެކު ނުކުރެވި ހުރި ކަމަށެވެ. އަދި މުސްތަގުބަލުގައި އެކަހަލަ ކަމެއް ނުހިނގާނެ ކަމުގެ ޔަގީންކަން ވެސް އެމަނިކުފާނު ރައްޔިތުންނަށް ދެއްވި އެވެ.

"އެކަން އަޅުގަނޑުމެން ރަނގަޅު ކުރާނަން ކުރިއަށް އޮތް ތަނުގައި. މިހާރު ދެން ނުވާނެ އެކަހަލަ ކަމެއް،" ރައީސް ވިދާޅުވި އެވެ.