މިހާރު ކުރިއަށްދާ ގައުމީ ވޮލީބޯޅަ މުބާރާތުގައި ކްލަބް އީގަލްސް އިން ކުޅުނު ދެ ވަނަ މެޗުން ވެސް މޮޅުވިއިރު، ކްލަބް ވޮލީބޯލް އިން ކްލަބް ވެމްކޯގެ މައްޗަށް ކުރިހޯދައިފި އެވެ.
އިއްޔެ ހަވީރު ޕޮލިސް ކްލަބް އަތުން އީގަލްސް މޮޅުވީ 3-2 ސެޓުންނެވެ. އީގަލްސް ފުރަތަމަ މެޗުން ކްލަބް ވޮލީބޯލް އަތުން މޮޅުވީ ވެސް ފަސް ސެޓު ކުޅެގެންނެވެ. ފުރަަތަމަ މެޗުން ބަލިވި ކްލަބް ވޮލީބޯލް އިން ވަނީ ވަރުގަދަކޮށް، އެނބުރި އައިސް ވެމްކޯގެ މައްޗަށް 3-1 ސެޓުން ކުރިހޯދައިފަ އެވެ.
ޒުވާނުންގެ މަރުކަޒު އެތެރެ ކޯޓުގައި އިއްޔެ ހަވީރު ކުޅުނު މެޗުގައި އީގަލްސް އިން ވަނީ ފުރަތަމަ ދެ ސެޓު ގެންގޮސްފަ އެވެ. އެއީ 25-19، 25-18 އިންނެވެ. އެކަމަކު، ފުރަތަމަ ދެ ސެޓުގައި ދެއްކި ހިތްވަރު، އީގަލްސް އަށް ދެން ކުޅުނު ދެ ސެޓުގައި އެންމެ އެކަށީގެންވާ ވަރަށް ނުދެއްކުނުއިރު، އެ ޓީމަށް ގިނަ ގޯސްތަކެއް ހެދި، ޕޮލިސް ޓީމަށް އޭގެ ފައިދާ ނަގަން ފުރުސަތު ލިބުނެވެ.
ޕޮލިހުން ވަނީ ތިން ވަނަ ސެޓާއި ހަަތަރު ވަނަ ސެޓު، 18-25، 23-25 އިން ގެންގޮސް، މެޗު ޑިސައިޑިން ސެޓަކަށް ގެންގޮސްފަ އެވެ.
ނަތީޖާ ނެރެން ކުޅުނު ސެޓުގައި އީގަލްސް އިން ކުޅުން ރަނގަޅުކުރުމުގެ ނަތީޖާ އަކަށްވީ 15-09 އިން ސެޓު ކާމިިޔާބުކޮށް އެ ޓީމު މެޗުން މޮޅުވުމެވެ. މި މެޗުގެ ވެސް މޮޅު ކުޅުންތެރިއަކީ އީގަލްސްގެ ކޮލަމްބިއާ ތަރި، މަނުއެލާ ސިއޭރާ އެވެ.
މުބާރާތުގައި ރޭ ކުޅުނު މެޗަށް ނުކުމެ، ކްލަބް ވޮލީބޯލް އިން ވަނީ ފުރަތަމަ ސެޓު، 25-19 އިން ގެންގޮސްފަ އެވެ. ވެމްކޯ އިން ކުޅުން ރަނގަޅުކޮށް، 16-25 އިން ދެ ވަނަ ސެޓު ގެންގޮސް އެއްވަރުކުރި އެވެ.
އެކަމަކު، ތިން ވަނަ ސެޓުގައި ޕޮއިންޓްތައް ގާތްގާތުގައި ގޮސް، ކްލަބް ވޮލީބޯލް އިން މުހިންމު ވަގުތުތަކުގައި ރަނގަޅު އެޓޭކްތަކެއްކޮށް، ހޯދި ޕޮއިންޓްތަކާ އެކު، 26-24 އިން ސެޓު ގެންދިޔަ އެވެ. ހަތަރު ވަނަ ސެޓުގައި، ވެމްކޯގެ ކުޅުންތެރިންގެ ފަރާތުން ޑިފެންސް ބޯޅަތަކުގައި ގިނަ ގޯސްތަކެއް ފެނިގެންދިޔައިރު، ކްލަބް ވޮލީބޯލް އިން ދިޔައީ ރަނގަޅު ލީޑެއް ދަމަހައްޓަމުންނެވެ. ނަތީޖާ އަކަށްވީ، 25-16 އިން ސެޓު ގެންގޮސް ކްލަބް ވޮލީބޯލް މެޗުން މޮޅުވުމެވެ.
ރޭގެ މެޗުން ކްލަބް ވޮލީބޯލް މޮޅުކޮށްދޭން އެންމެ ރަނގަޅު ކުޅުމެއް ދައްކައި، މެޗުގެ މޮޅު ކުޅުންތެރިއަކަށް ހޮވުނީ ކްލަބް ވޮލީބޯލަށް ކުޅޭ ތައިލެންޑް ކުޅުންތެރިޔާ، ނިލާޕާ ޗަޓްސުދާ އެވެ.
މުބާރާތުގައި މިއަދު ވެސް ދެ މެޗެއް ކުޅޭނެ އެވެ. އެއީ ލީގު ބުރުގެ ފަހު ދެ މެޗެވެ. ހަވީރު، 16:15 ގައި ކްލަބް ވޮލީބޯލް އާއި ޕޮލިސް ކްލަބް ކުޅޭ މެޗު އޮތްއިރު، މިރޭ ކްލަބް އީގަލްސް އިން ކުޅޭނީ ކްލަބް ވެމްކޯއާ އެވެ. އެ މެޗު ފަށާނީ 20:15 ގަ އެެވެ.
