މިލާން (ޖެނުއަރީ 21) - ޔުވެންޓަސްގެ ޓްރާންސްފާ ޑީލްތަކުގައި މަކަރުހެދުމާއި ކްލަބްގެ މާލީ މުއާމަލާތްތަކުގެ ލިޔެކިޔުންތައް އޮޅުވާލާފައިވާ މައްސަލަތަކުގެ ސަބަބުން އިޓަލީގެ ފުޓްބޯޅަ ފެޑެރޭޝަނުން ޔުވެންޓަސް އަތުން 15 ޕޮއިންޓް އުނިކޮށްފި އެވެ.
މީގެ އިތުރުން ޔުވެންޓަސްގެ ކުރީގެ ލީޑަޝިޕްގެ ގިނަ މެމްބަރުންނަށް ވަނީ ބޮޑެތި އަދަބުތަކެއް ދީފަ އެވެ. ޓްރާންސްފާ ޑީލްތަކުގެ ފައިސާތައް ހިމަނައިގެން، ކްލަބްގެ މާލީ މުއާމަލާތްތައް އޮޅުވާލުމުގެ ގިނަ ކަންތައްތަކެއް ހިންގާފައިވާތީ، ޔުވެންޓަސްގެ މައްސަލަ ބަލަން ފެށުމާ އެކު އެ ކްލަބްގެ ކުރީގެ ލީޑަޝިޕްގެ ހުރިހާ މެމްބަރުން މީގެ ދެ މަސް ކުރިން ވަނީ އިސްތިއުފާ ދީފަ އެވެ.
ޔުވެންޓަސް އިން، 2019 އާއި 2021 އާ ދެމެދު ހަދާފައިވާ ބައެއް ޓްރާންސްފާތަކާ ގުޅޭ މާލީ ހިސާބުތައް އޮޅުވާލާފައިވާ ކަމަށް ތުހުމަތުކުރެވި، ބެލި ބެލުމުގައި ފާހަގަވީ ޓްރާންސްފާތަކަށް ފަހު، ކުޅުންތެރިން ރަޖިސްޓްރީކުރުމުގެ ތެރެއިން އެ ކުޅުންތެރިންގެ އިމޭޖްރައިޓްސް އިން ލިބޭ އާމްދަނީ އޮޅުވާލާފައިވާ ކަމެވެ. އަދި އިޓަލީގެ ސްޓޮކް އެކްްސްޗޭންޖްގައި ލިސްޓްކޮށްފައިވާ ޔުވެންޓަސް އިން އިންވެސްޓަަރުންނަށް މާލީ ހިސާބުތައް އޮޅުވާފައި، ނުހިނގާ ޓްރާންސެކްޝަންތަކެއްގެ އިންވޮއިސްތަކެއް ވެސް ހަދާފައިވާ ކަމަށް ތަހުގީގަށް ސާބިތުވެފައިވެ އެވެ.
މި ހުރިހާ މައްސަލައިގެ ތަހުގީގު ނިންމައި، އިއްޔެ، އިޓަލީ ފެޑެރޭޝަނުން، ޔުވެންޓަސްގެ 15 ޕޮއިންޓް އުނިކުރިއިރު، އެ ޓީމު މިހާރު އޮތީ ލީގު ތާވަލުގެ 10 ވަނައިގަ އެވެ. އެއީ ގަދަ ހަތަރަކާ ދެމެދު 15 ޕޮއިންޓްގެ ފަރަގަކާ އެކު އެވެ.
އިޓަލީ ފެޑެރޭޝަނުން ދިން މި އަދަބާ އެކު އަންނަ ސީޒަނުގެ ޗެމްޕިއަންސް ލީގަށް ކޮލިފައިވާން ޔުވެންޓަސް އޮތީ އުނދަގޫ މަސައްކަތެކެވެ.
ޔުވެންޓަސްގެ މައްޗަށް އެޅި އިތުރު ފިޔަވަޅުތަކަށް ބަލާއިރު، އެ ކްލަބްގެ މިހާރުގެ ސްޕޯޓިން ޑިރެކްޓަރު، ފެޑެރީކޯ ޗެރުބީނީ ވަނީ 16 މަސް ދުވަހަށް ސަސްޕެންޑްކޮށްފަ އެވެ. މި ނިންމުން އިޓަލީގެ އޮލިމްޕިކް ކޮމިޓީގައި އެޕީލްކުރަން ޔުވެންޓަސް އިން ވަނީ ނިންމައިފަ އެވެ.
ޔުވެންޓަސްގެ ކުރީގެ ލީޑަޝިޕަށް އެޅި ފިޔަވަޅުތަކަށް ބަލާއިރު، ޔުވެންޓަސްގެ ކުރީގެ ރައީސް އަންދްރެއާ އަގްނެލީ އާއި ކުރީގެ ޗީފް އެގްޒެކްޓިވް އޮފިސަރު (ސީއީއޯ) މައުރީޒިއޯ އަރިވަބީނޭ ދެ އަހަރަށް ސަސްޕެންޑްކުރުމާއި ކުރީގެ ސްޕޯޓިން ޑިރެކްޓަރު، ފަބިއޯ ޕަރަޓީޗީ، 30 މަހަށް ސަސްޕެންޑްކުރުމުގެ އިތުރުން ކުރީގެ ނައިބު ރައީސް، ޕަވެލް ނެޑްވެޑް އަށް މަސް ދުވަހަށް ސަސްޕެންޑް ކުރުން ހިމެނެ އެވެ. ޕަރަޓީޗީ މި ވަގުތު ހުރީ ޓޮޓެންހަމްގެ ސްޕޯޓިން ޑިރެކްޓަރަކަށެވެ.
އިޓަލީގެ ފުޓްބޯޅަ ފެޑެރޭޝަނުން އަންނަނީ ފީފާ އާއި ޔުއެފާ އަށް ހުށަހަޅައިގެން މި ސަސްޕެންޝަންތައް އައި ފަރާތްތަކުން ކޮންމެ ގައުމެއްގައި މަސައްކަތް ކުރިޔަސް އެ އަށް އަމަލުކުރަން ޖެހޭނެ ގޮތް ހަދަން މަސައްކަތް ކުރަމުންނެވެ.
ޔުވެންޓަސް ހިމެނޭ ގޮތަށް އަށް ކްލަބަކަށް އިޓަލީ ފުޓްބޯޅަ ފެޑެރޭޝަނުން އިއްޔެ ވަނީ ފިޔަވަޅު އަޅައިފަ އެވެ. ޔުވެންޓަސްއާ އެކު ދެން ފިޔަވަޅު އެޅި، އިޓަލީގެ އެއް ވަނަ ޑިވިޝަން (ސެރިއާ)ގެ ދެ ކްލަބަކީ، ސަމްޑޯރިއާ އާއި އެމްޕޮލީ އެވެ. ޔުވެންޓަސް އެކޭ އެއް ގޮތަށް ސަމްޑޯރިއާ އާއި އެމްޕޮލީން ވެސް ވަނީ އެޕީލްކުރަން ނިންމައިފަ އެވެ.
ޔުވެންޓަސްގެ މާލީ މައްސަލަތަކުގެ މައްސަަލައެއް ޔުއެފާ އިން ވެސް އަންނަނީ ތަހުގީގުކުރަމުންނެވެ.
މިއީ 21 ވަނަ ގަރުނު ތެރޭގައި ޔުވެންޓަސްގެ މައްޗަށް އައި ބޮޑު ދެ ވަނަ ސަސްޕެންޝަނެވެ. މީގެ ކުރިން، 2006 ވަނަ އަހަރު މެޗު ވިއްކުމުގެ މައްސަލަތަކެއްގައި ޔުވެންޓަސް ވަނީ ދެ ވަނަ ޑިވިޝަނަށް ރެލިގޭޓްކޮށްލައިފަ އެވެ. އަދި މައްސަލަ ޖެހުނު މުއްދަތުގައި ޔުވެންޓަސް އަށް ލިބުނު ލީގު ތަށި ވަނީ އެ ޓީމު އަތުން އަތުލައިފަ އެވެ.
