މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދާ ރަށެއްގެ ގޮތުގައި ފަޅު ހިއްކައިގެން ތަރައްގީ ކުރަމުން އަންނަ ކ. ކުޑަގިރީގައި ކަރަންޓު ނެޓްވޯކް އެޅުމުގެ މަސައްކަތް މިއަދު ފަށައިފި އެވެ.

މި އަހަރު ހުޅުވުމަށް ނިންމާފައިވާ ކުޑަގިރީގައި ކަރަންޓު ނެޓްވޯކް ގާއިމް ކުރުމުގެ މަސައްކަތް ހަވާލުކޮށްފައިވަނީ ސްޓެލްކޯއާ އެވެ. ސްޓެލްކޯއިން ބުނީ އަމާޒަކީ ކަރަންޓު އެޅުމާއި އެ ރަށުގެ މަގުބައްތި ޖެހުމުގެ މަސައްކަތް 15 ދުވަސް ތެރޭގައި ނިންމާލުން ކަމަށެވެ.

ކުޑަގިރިއަށް ކަރަންޓު ދިނުމަށް ޓަކައި ޖުމްލަ 3000 މީޓަރުގެ ކޭބަލް ވަޅުލުމަށް ސްޓެލްކޯއިން ވަނީ ނިންމާފަ އެވެ.

މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދާނެ ރަށެއް ނެތް މައްސަލައަށް ހައްލެއް ހޯދައި ދިނުމަށް ކ. ކުޑަގިރި ފަޅު ހިއްކައިގެން ޕިކްނިކް އައިލެންޑެއް ހަދަން އެމްޓީސީސީއާ ހަވާލުކުރީ މިދިޔަ ސެޕްޓެމްބަރު މަހުގަ އެވެ.

ޕިކްނިކް އައިލެންޑް ތަރައްގީކުރުމުގެ މަޝްރޫއުގެ ދަށުން ދެ ރަށެއް ހިއްކިއިރު، މި ދެ ރަށުގައި ވެސް، ދަތުރުދާ މީހުންނަށް ހާއްސަކޮށްގެން ތަފާތު އެކި ވަސީލަތްތައް ގާއިމުކުރެވޭނެ އެވެ. އޭގެ ތެރޭގައި ކޮޓަރިތަކާއި، ޕޫލް ސަރަހައްދަކާއި، ފުޓްސަލް ދަނޑު ފަދަ ތަންތަން ހިމެނެ އެވެ.

ނައިބު ރައީސް ކުޑަގިރީގައި-- ފޮޓޯ: ރައީސް އޮފީސް

ކުޑަގިރީގައި މަސައްކަތް ކުރިއަށްދާ ގޮތް ބައްލަވާލެއްވުމަށް ޓަކައި ނައިބު ރައީސް ފައިސަލް ނަސީމް ވެސް ވަނީ އެ ރަށަށް ވަޑައިގެންފަ އެވެ. މި ދަތުރުފުޅުގައި ނައިބު ރައީސް ވަނީ އެޗްޑީސީން އެ ރަށުގައި ހަދަން ހަމަޖެހިފައިވާ ކޮޓަރިތަކުގެ ބިންގާ އަޅުއްވައި ދެއްވާފަ އެވެ. އަދި ގަހެއް ވެސް އިންދަވާފަ އެވެ.