ވިލާ ކޮލެޖާއި ޖެހިގެން އޮންނަ ހުސްބިމުގައި އަޅާ ދަރުމަވަންތަ ސްކޫލުގެ އާ އިމާރާތުގެ މަސައްކަތް އަންނަ ޖުލައި މަހުގެ 15 އަށް ނިމޭނެ ކަމަށް އެޑިއުކޭޝަން މިނިސްޓްރީން ބުނެފި އެވެ.

މި އަހަރުގެ ސްކޫލު ބޮޑު ޗުއްޓީ ތެރެއަށް އެ އިމާރާތުގެ މަސައްކަތް ނިމޭނެ ކަމަށް އެޑިއުކޭޝަން މިނިސްޓްރީން ލަފާކުރާއިރު، އެ މަސައްކަތް އެންމެ ފުރަތަމަ ފަށާފައި ވަނީ ސެޕްޓެމްބަރު 2020, ގަ އެވެ. ނަމަވެސް, ކޮވިޑާ ހެދި އޭރު އެ އިމާރާތުގެ މަސައްކަތް ނިންމަން ދީފައި އޮތް އެއް އަހަރު ދުވަހުގެ މުއްދަތުގެ ތެރޭގައި ނިންމިފައެއް ނުވެ އެވެ.

އެ އިމާރާތުގެ އަދިވެސް ގިނަ މަސައްކަތްތަކެއް ކުރަން ޖެހޭތަން ފެންނަން ހުރިއިރު، އެޑިއުކޭޝަން މިނިސްޓްރީން ބުނީ އެ މަސައްކަތްތައް ޖުލައި 15 ވަނަ ދުވަހަށް ނިމޭނެ ކަމަށެވެ.

އިމާރާތުގެ މަސައްކަތް އެ ދުވަހަށް ނިމުނު ނަމަވެސް، ބެލެވޭ ގޮތުގައި އެ އިމާރާތް ބޭނުންކުރަން ފަށާނީ ސްކޫލު ބޮޑު ޗުއްޓީ ނިމިގެން، އޯގަސްޓު މަހު ފަށާ ދިރާސީ އާ އަހަރާއެކުގަ އެވެ.

ދަރުމަވަންތަ ސްކޫލުގެ އާ އިމާރާތުގެ މަސައްކަތް ކުރިޔަށްގެންދަނީ އެސްޖޭ ކޮންސްޓްރަކްޝަނުމް. ފޮޓޯ: އަބްދުﷲ އިޔާން/އަދަދު

އެސްޖޭ ކޮންސްޓްރަކްޝަނާއި ހަވާލުކޮށްގެން 74.9 މިލިއަން ރުފިޔާއަށް އަޅާ އެ އާ އިމާރާތަކީ މުޅިން ތަފާތު އަދި އެންމެ ޒަމާނީ ފެންވަރުގެ ކޮންސެޕްޓަކަށް ތައްޔާރުކުރާ ސްކޫލެއް ކަމަށް އެޑިއުކޭޝަން މިނިސްޓްރީން ބުނެ އެވެ.

ދަރުމަވަންތައިގެ އާ އިމާރާތަކީ 1،000 ދަރިވަރުންގެ ޖާގައިގެ 41 ކުލާސްރޫމް ހިމެނޭހެން އިމާރާތްކުރާ ތަނެކެވެ. އެ އިމާރާތް ޑިޒައިންކުރީ ކޮންމެ ކުލާހެއްގައި ވެސް ގިނަވެގެން 25 ދަރިވަރުން ތިބޭ ގޮތަށެވެ.

އާ އިމާރާތުގައި ޕްރައިމަރީ އަދި ސެކަންޑްރީ ގްރޭޑްތަކަށް ދެ ބުރީގެ ލައިބްރަރީއެއް ހާއްސަ ކުރާނެ އެވެ. އޭގެ އިތުރުން އެ އިމާރާތުގައި މަސައްކަތު މީހުންނަށް ހާއްސަ ޖާގަތަކާއި އިތުރު ހަރަކާތްތައް ހިންގަން ގިނަ ޖާގަ ހުންނާނެ ކަމަށް ވެސް މިނިސްޓްރީން ބުނެ އެވެ.

ދަރުމަވަންތައިގެ އާ އިމާރާތެއް އަޅަން ސަރުކާރުން ނިންމީ، 2002 ވަނަ އަހަރު މަޖީދިއްޔާ ސްކޫލު އިމާރާތް ދެ ބައިކޮށް ދަރުމަވަންތަ ސްކޫލު ފެށިއިރު، ކިޔަވައިދެމުންދިޔަ އިމާރާތް ބާވެ ވީރާނާވާން ފެށުމުންނެވެ. އޭގެ ފަހުން ދަރުމަވަންތައިގެ ދަރިވަރުން ކިޔަވަމުންދިޔައީ އެމްއައިބީ ކުރިމައްޗަށްވާ ގޮތަށް ތައްޔާރުކުރި ވަގުތީ އިމާރާތެއްގަ އެވެ.