ބައެއް ކަހަލަ ހިދުމަތްތައް ދިނުަމަށް ސަރުކާރުން ކުންފުނިތައް އުފައްދަނީ އެނޫން ގޮތެއް ނެތިގެން ކަމަށާއި އެމްޑީޕީގެ ފުރަތަމަ ވެރިކަމުގައި ވެސް ސަރުކާރުން 25 އަކަށް ކުންފުނި އުފެއްދި ކަމަށް ކެނދިކުޅުދޫ ދާއިރާގެ މެމްބަރު އަހުމަދު އީސާ މިއަދު ވިދާޅުވެއްޖެ އެވެ.
އެމްޑީޕީގެ ޗެއާޕާސަން ހޮވުމުގެ އިންތިހާބުގެ ވާދަވެރިކަމުގައި، އެޕާޓީގެ އެތެރޭގެ ކޯޅުން މިހާރު ރައްޔިތުންގެ މަޖިލީހުގެ ތަޅުމުގައި ކޮންމެ ދުވަހަކު ވެސް އޮވެ އެވެ. އެ ކޯޅުމުގެ ތެރެއިން އިކޮނޮމިކް މިނިސްޓަރު ފައްޔާޒު އިސްމާއީލަށް ބަހުގެ ހަމަލާތައް ދެއްވަމުން މެދު ހެންވޭރު ދާއިރާގެ މެމްބަރު އަދި އެމްޑީޕީގެ ޕީޖީ ގްރޫޕްގެ ކުރީގެ ލީޑަރު އަލީ އާޒިމް އިއްޔެ ވިދާޅުވީ ސަރުކާރުން ކުންފުނިތައް ހަދައިގެން ވިޔަފާރި ކުރުމަކީ އެމްޑީޕީގެ ސިޔާސަތެއް ނޫން ކަމަށެވެ. އެއީ އެމްޑީޕީއަކީ ސެންޓަ ރައިޓް ޕާޓީއަކަށް ވާތީ ކަމަށް ވެސް އާޒިމް ވިދާޅުވި އެވެ.
މިއަދުގެ ޖަލްސާގައި އީސަ ވިދާޅުވީ އެމްޑީޕީގެ ފުރަތަމަ ސަރުކާރުގައި ރައީސް މުހައްމަދު ނަޝީދުގެ ވެރިކަމުގައި ވެސް ކުންފުނިތައް އުފެއްދި ކަމަށާއި އެއީ ސެންޓަ ރައިޓް އުސޫލު ގަބޫލުނުކުރާތީ ވީ ކަމެއް ނޫން ކަމަށެވެ.
" ދެހާސް އަށެއްގެ އަޅުގަނޑުމެންގެ ވެރިކަމުގެ ފުރަތަމަ އަހަރު އަޅުގަނޑުމެނަށް މަޖުބޫރުވެގެން ގޮތެއް ނެތިގެން އުފެއްދިން ކިތަންމެ ކުންފުންޏެއް އިއްޒަތްތެރި ރައީސް. ފުރަތަމައިނުން ހަތް ހެލްތު ކޯޕަރޭޝަން އަޅުގަނޑުމެން އުފެއްދިން. މާލޭ ހެލްތު ކޯޕަރޭޝަނާ އެއްކޮށް އަށެއް،" ރައީސް ނަޝީދުގެ ވެރިކަމުގައި ކުންފުނިތައް އުފެއްދި ގޮތުގެ ތަފްސީލު ދެއްވަމުން އަހުމަދު އީސާ ވިދާޅުވި އެވެ.
އެހެން ނަމަވެސް، އޭރުވެސް އެ ކުންފުނިތައް އުފެއްދީ ބޭނުންވެގެން ނޫން ކަމަށާއި ވިޔަފާރީގެ އުސޫލުން އެ ހިދުމަތްތައް ދޭނެ އަމިއްލަަ ކުންފުނިތައް ނެތުމުން ކަމަށް ވެސް އޭނާ ވިދާޅުވި އެވެ. އޭގެ މިސާލުތަކުގެ ގޮތުގައި އޭނާ ދެއްކެވީ ކަރަންޓުގެ ހިދުމަތާއި ރަށްރަށުގެ ހެލްތު ސެންޓަރުތަކެވެ.
"އެއީ މަޖުބޫރީ ހާލަތުގައި އުފެއްދި ކުންފުނިތައް. އެއީ އަޅުގަނޑުމެން ސެންޓަ ރައިޓް އުސޫލް ގަބޫލުނުކުރާތީ ވީ ގޮތެއް ވެސް ނޫން،" އަހުމަދު އީސާ ވިދާޅުވި އެވެ.
އޭނާ ވިދާޅުވި ގޮތުގައި މި ސަރުކާރުން އުފެއްދި ބައެއް ކުންފުނިތަކަކީ ވެސް ހަމަ އެބީދައިން އުފެއްދި ކުންފުނިތަކެވެ. އޭގެ އެއް މިސާލަކީ ރަށްރަށުގެ ދަނޑުވެެރިން ހައްދާ ބާވަތްތައް ގަންނަން އުފެއްދި އެގްރޯ ނެޓު ކުންފުންޏެވެ. ކުރިއްސުރެ ހިންގަމުން އަންނަ އެފަދަ ކުންފުނިތަކުގެ މިސާލެއްގެ ގޮތުގައި އޭނާ ދެއްކެވީ މިފްކޯ އެވެ.
"ކާކު ފެލިވަރު މިއަދު ގަނެގެން އެތަނަށް 50 މިލިޔަން ޑޮލަރު އިންވެސްޓުކޮށްގެން، އަޅުގަނޑުމެންގެ މަސްވެރިން މި އުއްމީދުކުރާ އަގުގައި މަސް ގަންނާނީ؟" އަހުމަދު އީސާ ސުވާލުކުރެއްވި އެވެ.
ސެންޓަ ރައިޓް އުސޫލުގެ ވާހަކަ ދައްކާ އިރު ރާއްޖެއަކީ އެހުރިހާ އުސޫލެއް ވެސް ބޭނުންވާ ގޮތަށް ބަދަލުކޮށްފައިވާ ގައުމެއް ކަަމަށާއި ވެރިކަން ހިންގުމުގެ ނިޒާމު ވެސް އޮތީ އެގޮތަށް "މޮޑިފައިކޮށްފައި" ކަމަށް އޭނާ ވިދާޅުވި އެެވެ.
