22 ޖަނަވަރީ 2022 - 14:11 0
އަޒްލިފާ އަބްދުﷲ
ނޮވެމްބަރުގައި ގެނައި އެމްއެސްއެސްގެ ފުރަތަމަ ބޯޓު. މި ބޯޓަކީ އެއްފަހަރާ 450 ކޮންޓެއިނަރު އުފުލޭނެ ބޯޓެއް.-- ފޮޓޯ: އެމްއެސްއެސް
22 ޖަނަވަރީ 2022 - 14:11 0
ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) ގެ ދަށުން ހިންގާ ގައުމީ ޝިޕިން ލައިން، މޯލްޑިވްސް ސްޓޭޓް ޝިޕިން (އެމްއެސްއެސް) އަށް 48،000 ޓަނުގެ އާގުބޯޓެއް ގަންނަން ނިންމައިފި އެވެ.
އެމްއެމްއެސްގެ ފުރަތަމަ ބޯޓު ގަނެގެން ގެނައީ މިދިޔަ ނޮވެމްބަރު މަހު އެވެ. އެ ކުންފުންޏަށް ގަންނަ ދެ ވަނަ ބޯޓު އަންނަ މަހު އަންނާނެ އެވެ.
"ބޯޓު ގަތުމުގެ އެންމެ ފަހުގެ މަރުހަލާތަކުގައި އޮތީ. މި ބަލަނީ ފެބްރުއަރީ މަސް ތެރޭގައި ގެނެވޭތޯ. މި ބޯޓު ގަތުމުގެ މައިގަނޑު އެއް ބޭނުމަކީ ގެދޮރު އިމާރާތްކުރުމަށް ބޭނުންވާ ސާމާނު ބާޒާރުގައި އަގުބޮޑުވިޔަ ނުދީ ހިފެހެއްޓުމަށްޓަކައި އެ ބާވަތްތަކުގެ މުދާ އެތެރެކުރުން." އެސްޓީއޯގެ މެނޭޖިން ޑިރެކްޓަރު ހުސައިން އަމްރު "އަދަދު" އަށް ވިދާޅުވި އެވެ.
އެމްއެސްއެސްއަށް ގެނައި ފުރަތަމަ ބޯޓާއެކު ވެސް ރާއްޖެއަށް މުދާ އެތެރެކުރާ އަގުތައް ހެޔޮވެފައިވާ ކަމަށާއި، ކުރިން ތަފާތު ނަންނަމުގައި ނަގަމުންދިޔަ ފީތައް ވެސް އެހެން ކުންފުނިތަކުން ނެގުން ހުއްޓާލާފައިވާ ކަމަށް އަމްރު ވިދާޅުވި އެވެ. ދެ ވަނަ ބޯޓާއެކު ވެސް ހެޔޮ ބަދަލުތަކެއް ފެންނާނެ ކަމަށް އޭނާ ވިދާޅުވި އެވެ.
އެމްއެސްއެސްގެ މެނޭޖިން ޑިރެކްޓަރު އަބްދުﷲ ސައީދު ވިދާޅުވީ މި ބޯޓު ގަނެދެނީ އެސްޓީއޯ އިން ކަމަށާއި، މިއީ ރާއްޖޭގެ ޝިޕިން ތާރީހުގައި ގަންނަ އެންމެ ބޮޑު ބޯޓަށް ވެގެންދާނެ ކަމަށެވެ.
އާ ބޯޓަށް ބޭނުންވާ ފަޅުވެރިން ހޯދަން މިހާރު ވަނީ އިއުލާނުކޮށްފަ އެވެ.
Comment