ގއ. ކޮނޑޭ އަދި ލ. ދަނބިދޫ މެޖިސްޓްރޭޓް ކޯޓުގެ އިސް މެޖިސްޓްރޭޓަރުންގެ މައްޗަށް ހުށަހެޅުނު ސުލޫކީ މައްސަލަތައް ސާބިތުނުވާކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.

ކޮނޑޭ މެޖިސްޓްރޭޓް ކޯޓުގެ އިސް މެޖިސްޓްރޭޓް، މުހައްމަދު އިބްރާހިމްގެ ސުލޫކީ މައްސަލައެއް ޖޭއެސްސީ އަށް ހުށަހަޅާފައި ވަނީ މޭ 17 ވަނަ ދުވަހު އެވެ.

ދަނބިދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް، އަހުމަދު ޝަރީފުގެ ސުލޫކީ މައްސަލައެއް ޖޭއެސްސީ އަށް ހުށަހަޅާފައި ވަނީ ޖުލައި 31 ވަނަ ދުވަހު އެވެ.

މި ދެ މެޖިސްޓްރޭޓަރުންގެ މައްސަލަ ތަހުގީގުކޮށް އެ ދެ މައްސަލަ ވެސް ސާބިތުނުވާ ކަމަށް ޖޭއެސްސީން ނިންމާފައި ވަނީ މި މަހުގެ ހަ ވަނަ ދުވަހު ބޭއްވި އެކޮމިޝަނުގެ 76 ވަނަ ބައްދަލުވުމުގަ އެވެ.

މިގޮތަށް ކޮމިޝަނުން ނިންމާފައިވާ އިރު، ސ. މީދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް މުހައްމަދު ތައްޔިބުގެ ސުލޫކީ މައްސަލަ ސާބިތުވާ ކަމަށް މިދިޔަ މަހުގެ 29 ވަނަ ދުވަހު ބޭއްވި ކޮމިޝަންގެ ބައްދަލުވުމުގައި ވަނީ ނިންމާފަ އެވެ.

މެޖިސްޓްރޭޓް ތައްޔިބުގެ ސުލޫކީ މައްސަލައެއް ބަލަން ފެށީ، ކުށެއްގެ ތުހުމަތުގައި ހައްޔަރުކޮށް ބަންދާމެދު ގޮތެއް ނިންމަން ކޯޓަށް ހާޒިރުކުރި މީހަކު "ގޭގައި" ބަންދުކޮށްފައި ބެހެއްޓުމަށް ނެރުއްވި އަމުރަކީ، ޖިނާއީ އިޖުރާއަތާ ހިލާފަށް ނެރުއްވާފައިވާ އަމުރެއްކަމަށް ބުނެ މައްސަލައެއް ހުށަހެޅުމާ ގުޅިގެންނެވެ. އެ މައްސަލާގައި ޖޭއެސްސީން ނިންމެވީ މެޖިސްޓްރޭޓް ތައްޔިބަށް ނަސޭހަތްދިނުމާއެކު ކޮމިޝަނުން ކަނޑައަޅާ ތަމްރީން ޕްރޮގްރާމެއް ފުރިހަމަ ކުރަން އެންގެވުމަށެވެ.