އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ) އިން ސަލާމަތްކޮށް، ޅ. މާކޯ ކުޅިއަށް ރިހެބިލިޓޭޓްކުރަން ބަދަލުކުރި ގުޑުގުޑާ ދޫނީގެ ހާލު ވަރަށް ދެރަކަމަށް އެ އެޖެންސީން ބުނެފި އެވެ.

އެ ދޫންޏަކީ މޫސުމީ ހިޖުރައިގައި ރާއްޖެއަށް އައި ގުޑުގުޑާ ދޫންޏެކެވެ. ދޫނި ސަލާމަތްކޮށްފައިވަނީ ހއ. ބާރަށުން ބަޔަކު އޭތި ހިފައިގެން އޭގެ ފިޔަކޮށާލައިގެން ގެންގުޅެނިކޮށެވެ.

ގުޑުގުޑާ ދޫންޏަކި ވަރަށް ނާޒުކު ޖަނަވާރެއްކަމުން، އެޔަށް އެންމެ އެދެވޭ ރިހެބިލިޓޭޝަން ފެސިލިޓީތަކާއި، ބޭނުންވާ ފެންވަރުގެ ފަރުވާ ރާއްޖެއިން ލިބެން ނެތުމުން، އަނިޔާވެފައިވާ ނުވަތަ ހިފައިގެން ގެންގުޅެފައިވާ ދޫންޏެއް އަލުން ރިހެބިލިތޭޓްކޮށް ފަރުވާ ދިނުމަކީ ކުރެވޭނެ ކަމެއް ނޫން ކަމަށް އީޕީއޭއިން ބުނެ އެވެ.

މި ސަބަބަކީ، އެފަދަ ދޫނިތައް ހިފައިގެން ނުގެންގުޅެންވީ އެތައް އެތައް ސަބަބުތަކުގެ ތެރެއިން އެއް ސަބަބުކަމަށް ވެސް އީޕީއޭއިން ބުނެ އެވެ.

އީޕީއޭއިން އެ ދޫނި ސަލާމަތްކުރި ދުވަހު ބުނި ގޮތުގައި، އެ ދޫނީގެ ފިޔަ ކޮށާލާފައި ހުރުމުން، އެ ދޫންޏަށް ނުއުދުހެވޭނެތީ، އެއާއެކު ރާއްޖެއަށް އައި އެހެން ދޫނިތަކާއެކު އަބުރާ ދިޔުމުގެ ފުރުސަތު ނެތެވެ. އެ ދޫނި ސަލާމަތްކޮށްފައިވަނީ، ގުޑުގުޑާ ދޫންޏެއް ހިފައިގެން 30،000 ރުފިޔާއަށް އޮންލައިންކޮށް ވިއްކަން ޖަހާފައި އޮތް މައްސަލައެއް ފެންމަތިވެފައި ވަނިކޮށެވެ.

އެހެންކަމުން އެ ދޫނި މިހާރު ރައްކާތެރި ސަރަހައްދަކަށް ބަދަލުކުރުމުގެ ގޮތުން ބަދަލުކުރީ، ޑިފެންސް މިނިސްޓްރީގެ ބެލުމުގެ ދަށުގައި އޮންނަ މާކޯ އަށެވެ. ގުޑުގުޑާ ދޫންޏަކީ އާއްމުކޮށް ރާއްޖެއިން ފެންނަ ބާވަތެއްގެ ދޫންޏެއް ނޫނެވެ. އެހެންނަމަވެސް މީގެ ކުރިން ވެސް މޫސުމީ ހިޖުރައިގެ ދުވަސްވަރު ރާއްޖެއިން އެ ދޫނި ފެނިފައި އެބަ ހުއްޓެވެ.