ކޮވިޑުން ދިފާއުވުމުގެ ވެކްސިންގެ ފުރަތަމަ ޑޯޒު ފުރިހަމަކޮށްފައި ނުވާ މީހުންނަށް އަންނަ މަހުގެ އެކަކުން ފެށިގެން އެއްގަމާއި ކަނޑު ދަތުރުތަކުގައި ވެސް ޖާގަ ނުދޭން ނުދޭން ޓްރާންސްޕޯޓް މިނިސްޓްރީން އަންގައިފި އެވެ.

ދަތުރުފަތުރުގެ ހިދުމަތްދޭ ފަރާތްތަކަށް ޓްރާންސްޕޯޓުން މިގޮތަށް އެންގީ، ވެކްސިން ނުޖަހާ ނަމަ ބައެއް ހިދުމަތްތައް ނުދޭން ސަރުކާރުން ނިންމާފައިވާ ނިންމުން އަންނަ ބުދަދުވަހު ތަންފީޒުކުރަން ފެށުމަށެވެ. ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އާއްމުކުރި އުސޫލްގައިވާ ގޮތުން، ވެކްސިން ނުޖަހާ މީހުންނަށް ހިދުމަތްތަކުގައި ދަތިތަކެއް ކުރިމަތިވާނެ އެވެ.

މިއީ، ދެ ޑޯޒު ވެކްސިން ފުރިހަމަކުރަން ބާރު އެޅުމުގެ ގޮތުން ސަރުކާރުން ނިންމާފައިވާ ނިންމުމެކެވެ.

ވެކްސިން ނުޖަހާ މީހުންނަށް އަންނަ މަހުގެ އެކަކުން ފެށިގެން ކެފޭތަކާއި ހޮޓާ އަދި ރެސްޓޯރަންޓުތަކުގައި ތިބެ ވެސް ހިދުމަތް ނުހޯދޭނެ އެވެ. ހަމައެގޮތަށް ޖިމްތަކާއި ސެލޫންތަކާއި ސިނަމާތަކަށް ވެސް ނުވަދެވޭނެ އެވެ.

ޓްރާންސްޕޯޓުގެ އިއުލާންގައި ބުނެފައި ވަނީ އެއްގަމާއި ކަނޑުދަތުރު ކުރުމުގެ ހިދުމަތް ފޯރުކޮށްދޭ މީހުންނާއި ޑޮމެސްޓިކް ވައިގެ ދަތުރު ކުރުމުގެ ހިދުމަތް ފޯރުކޮށްދޭ ފަރާތްތަކުން ވެކްސިން ޖެހުމާ ގުޅޭ ގޮތުން އެޗްޕީއޭ އިން ނެރެފައިވާ ގައިޑްލައިނަށް އަމަލުކުރަން ޖެހޭ ކަމަށެވެ. އަދި ޓެކްސީ ދަތުރުތަކުގައި ވެސް އެ އުސޫލަށް އަމަލުކުރަން ސަމާލުކަން ދޭން އަންގާފައިވެ އެވެ.

ވެކްސިން ނުޖަހާ މީހުންނަށް ދަތުރުތަކުން ފުރުސަތު ނުދޭން އެ އިއުލާނުގައި އަންގާފައިވެ އެވެ.

ކޮވިޑުގެ ވެކްސިން ފުރިހަމަކޮށްފައިވާ މީހެއްތޯ، ހިދުމަތްދޭ ފަރާތްތަކުން ބަލަން ނިންމާފައި ވަނީ ކިއުއާރު ކޯޑެއް މެދުވެރިކޮށެވެ.

ރާއްޖޭގައި ކޮވިޑުން ރައްކާތެރިވާން ހަރުކަށި ފިޔަވަޅުތަކެއް އަޅާފައި ވަނިކޮށް އެންމެ ބޮޑަށް ގޯސްވީ މިދިޔަ އެޕްރީލް މަހު ވަރަށް ބޮޑަށް ލުއި ދިނުމުންނެވެ. އެތައް ބަޔަކު މި ބަލީގައި މަރުވިއިރު އޭގެތެރެއިން 80 ޕަސެންޓަކީ ވެކްސިންގެ އެއްވެސް ޑޯޒެއް ނުޖަހާ މީހުން ކަަމަށް އެޗްޕީއޭ އިން ވަނީ ބުނެފަ އެވެ.

އޭރު އެހެން ގައުމުތަކެކޭ އެއްގޮތަށް ރާއްޖެ ވެސް އޮތީ ވެކްސިންގެ ތާށިކަމުގެ ތެރޭގަ އެވެ. އެކަމަކު ސަރުކާރުން ކުރި މަސައްކަތުން ރާއްޖޭގެ ވެކްސިން ޖެހޭ އާބާދީގެ އެންމެންނަށް ބޭނުންވާ ވަރަށް ވެކްސިން ވަނީ ހޯދައިފަ އެވެ.

އެ ވެކްސިންގެ މުއްދަތު އަންނަ ނޮވެމްބަރު މަހުގެ ތެރޭގައި ހަމަވާނެ އެވެ. ސަރުކާރުގެ އަމާޒަކީ އޭގެ ކުރިން އެންމެން ވެކްސިންގެ ދެ ޑޯޒު ފުރިހަމަ ކުރުމެވެ. އެކަމަކު ރާއްޖެ އަށް ވެކްސިންގެ ނަސީބު ލިބިފައިވާ އިރު ވެސް އެކަމުގައި ފަރުވާކުޑަކުރަމުން ދިއުމަކީ ސިއްހީ ދާއިރާގެ ކަންބޮޑުވުމެކެވެ.

އާބާދީގެ ބޮޑު ބައެއް ވެކްސިން ޖަހާފައިވާ ނަމަ ދޭނެ ލުއިތައް ވެސް ދާދި ފަހުން ވަނީ އިއުލާންކޮށްފަ އެވެ. އުމުރުން 12 އަހަރުން މަތީގެ އެންމެން ހިމެނޭ ގޮތުން އެ ރަށެއްގެ އާބާދީގެ 90 ޕަސެންޓް މީހުން ވެކްސިން ފުރިހަމަކޮށްފި ނަމަ ޕީސީއާރު ނެތި ދަތުރުކުރެވޭނެ އެވެ.

އެކަމަކު ވެކްސިން ނުޖަހާ ނަމަ 14 ދުވަހުގެ ކަރަންޓީން މުއްދަތު ފުރިހަމަ ކުރުމުގެ އިތުރަށް ރިލީޒް ސާމްޕަލަށް އަންނަ މަހުން ފެށިގެން ފައިސާ ދައްކަން ޖެހޭނީ އަމިއްލަ ހަރަދުގަ އެވެ. ސަރުކާރު މުވައްޒަފުން ވެކްސިން ނުޖަހާ ނަމަ ކޮންމެ ދެ ހަފުތާއަކުން ޕީސީއާރު ޓެސްޓް ހުށަހަޅަން ޖެހެ އެވެ.