މެޑްރިޑް (މެއި 8) - ޔޫރަޕިއަން ސުޕަ ލީގުން ވަކިވެ ކުރެވުނު ކުށަށް މައާފަށް އެދެން ޔުއެފާ އިން އެންގި އެންގުމާ އެއްގޮތަށް އަމަލުނުކުރަން މި ވަގުތު ސުޕަ ލީގުގައި އޮތް ތިން ޓީމު ކަމަށްވާ ރެއާލް މެޑްރިޑާއި ބާސެލޯނާ އަދި ޔުވެންޓަސް އިން ނިންމައިފި އެވެ.

މިދިޔަ މަހު 18 ވަަނަ ދުވަހު 12 ކްލަބާ އެކު ސުޕަ ލީގު އިއުލާނުކުރި ނަމަވެސް އެކި ފިއްތުންތަކާ ހުރެ 72 ގަޑިއިރު ވެސް ނުވަނީސް އޭގެ ތެެރެއިން ނުވަ ޓީމެއް ވަނީ އެ ލީގުން ވަކިވެފަ އެވެ. އެ ކްލަބްތަކަކީ މެންޗެސްޓާ ޔުނައިޓެޑާއި މެންޗެސްޓާ ސިޓީ، ލިވަޕޫލް، އާސެނަލް، ޓޮޓެންހަމް، އިޓަލީގެ އޭސީ މިލާނާއި އިންޓަ މިލާން އަދި ސްޕެއިނުގެ އެތުލެޓިކޯ މެޑްރިޑް އެވެ.

ޔުއެފާ އިން ރޭ ވަނީ ސުޕަ ލީގުން ވަކިވި ޓީމުތަކަށް ސަސްޕެންޝަނެއް ނުދީ ޖޫރިމަނާތަކެއް ދައްކަން ޖެހޭ ގޮތްތަކެއް ހަދައިފަ އެވެ. އަދި ލީގުންވަކިނުވެ އޮތް ޓީމުތަކުން ވެސް ވީ އެންމެ އަވަހަށް އެ ލީގުގެ ކަންކަން ހުއްޓާލަން ޔުއެފާ އިން ގޮވާލި އެވެ.

ސުޕަ ލީގުން ވަކިނުވެ އޮތީ ރެއާލާއި ބާސެލޯނާ އަދި އިޓަލީގެ ޔުވެންޓަސް ގުޅިގެން މިއަދު ނެރުނު ބަޔާނެއްގައި ބުނެފައިވަނީ ޔުއެފާ އިން ދޭ އިންޒާރުތަކާ ހެދި އާއި ގައުމުތަކުގެ ފުޓްބޯޅަ އެސޯސިއޭޝަންތަކުގެ ޕްރެޝަރުތަކުގެ ސަބަބުން ސުޕަ ލީގުން ނުވަ ޓީމެއް ވަކިވެފައިވީ ނަމަވެސް މި ވަގުތު ލީގުގައި އޮތް ތިން ޓީމުގެ ވިސްނުމަކީ އަދިވެސް ލީގުގެ ކަންތައްތައް ކުރިއަށް ގެންދިއުން ކަމަށެވެ.

ސުޕަ ލީގުގެ ބޭނުމަކީ ޔޫރަޕްގެ ބޮޑެތި ކްލަބްތަކުގެ ހައްގު ހިމާޔަތްކޮށް ފުޓްބޯޅަ ސަޕޯޓަރުން ބޭނުންވާ ފަދަ ލެވަލެއްގެ ފުޓްބޯޅަ މުބާރާތްތަކެއް ރާވައި ހިންގުން ކަމަށް އެ ބަޔާނުގައިވެ އެވެ. ސުޕަ ލީގުގެ ޗެއާމަން ރެއާލްގެ ރައީސް ފްލޮރެންޓީނޯ ޕެރޭޒް ދާދި ފަހުން ސްޕެއިނުގެ ރޭޑިއޯ އަކަށް ދިން އިންޓަވިއުއެއްގައި ވަނީ ސުޕަ ލީގުގެ މަސައްކަތްތައް ހުއްޓައިނުލާނެ ކަމަށް ވިދާޅުވެފަ އެވެ.

ސްޕެއިނުގެ މީޑިއާ ރިޕޯޓްތައް ބުނާގޮތުން ޔުއެފާގެ ވިސްނުމަކީ ވަކި މުއްދަތެއްގެ ތެރޭގައި ސުޕަ ލީގުގެ މަސައްކަތް އެއްކޮށް ހުއްޓައިނުލައިފިނަމަ އޭރު އެ ލީގުގައި އޮންނަ ޓީމުތައް ދެ އަހަރަށް ސަސްޕެންޑް ކުރުމެވެ.