ވ. ފޮއްތެޔޮއިން ފުރައިގެން މާލެއަށް ދަތުރުކުރަމުން ދަނިކޮށް، ރަސްމާލޭގެ އިރުމަތި ފަރާތު ފަރަށް ދޯން އަރައި، އެ ދޯނިން ދަތުރުކުރި ފަޅުވެރިޔަކަށް ރޭ އަނިޔާވެއްޖެ އެވެ.
އެމްއެންޑީއެފް އިން ބުނީ މި ހާދިސާގައި "ކީސާ" ނަމަކަށް ކިޔާ އެ ދޯނިން ދިވެއްސަކާއި ތިން ބިދޭސީއެއް ދަތުރުކުރިއިރު، އޭގެ ތެރެއިން ބިދޭސީއެއްގެ ވައަތު ފަޔަށް އަނިޔާވުމުން ހުޅުމާލެ ހޮސްޕިޓަލަށް ގެންދިޔަ ކަމަށެވެ.
މި ހާދިސާ ހިނގިކަމުގެ މައުލޫމާތު އެމްއެންޑީއެފްއަށް ރޭ 23:51 ގައި ލިބުމާއެކު އެމްއެންޑީއެފް މާލެ އޭރިއާ ކޮމާންޑް ކޯސްޓްގާޑް ސެކަންޑް ސްކޮޑްރަންއިން ވަނީ އެހީތެރިކަން ފޯރުކޮށްދިނުމުގެ ގޮތުން އެ ސަރަހައްދަށް ގޮސްފަ އެވެ.
މިގޮތުން 2:37 ހާއިރު އެމްއެންޑީއެފް މާލެ އޭރިއާ ކޮމާންޑް ކޯސްޓްގާޑް ސެކަންޑް ސްކޮޑްރަންގެ ޑައިވަރުން ވަނީ އެ ދޯނި އޮތް ސަރަހައްދަށް ގޮސް، ދޯނިން ދަތުރުކުރަމުންދިޔަ ދިވެއްސަކާއި، ތިން ބިދޭސީން ސަލާމަތްތެރިކަމާ އެކު ހާބަރކްރާފްޓަށް ނެގި އެވެ.
އެ ދޯނީގެ ވެރިިފަރާތުން ގެނައި "އޯސަން ރައިޑް" ދޯނި 03:37 ހާއިރު އެ ސަރަހައްދަށް އައުމުން، ހުރިހާ ފަޅުވެރިން ވަނީ އެ ދޯންޏަށް ބަދަލުކޮށްފަ އެވެ.
މިދިޔަ ހަފްތާގައި އައްޑޫ ސިޓީ ހިތަދޫއިން ފުރައިގެން މާލެއަށް ދަތުރުކުރަމުންދިޔަ މުދާ އުފުލާ ދޯންޏެއް ރަސްމާލެ ފަރަށް އެރި އެވެ.
