މިއުނިކް (ނޮވެމްބަރު 11) - މީގެ 18 ދުވަސް ކުރިން ޓްރެއިނިން ދަނޑުގައި ހުއްޓައި، ބަލި ހާލަތު ގޯސްވެގެން ހޮސްޕިޓަލުގައި ބާއްވައިގެން ފަރުވާދިން ކޯޗު ވިންސެންޓް ކޮމްޕެނީ އަލުން މަސައްކަތަށް ނުކުމެއްޖެ އެވެ.
މިދިޔަ މަހު 24 ވަނަ ދުވަހު ބަޔާންގެ ޓްރެއިނިން ދަނޑުގައި ހުއްޓައި ކޮމްޕެނީގެ ބަލި ހާލަތު ގޯސްވި އެވެ. އޭގެ ކުރިން ވެސް އޭނާ އައީ ވައިރަލް އަކަށް ފަރުވާ ހޯދަމުންނެވެ. ކޮމްޕެނީ އަށް ފަސް ދުވަސް ވަންދެން ހޮސްޕިޓަލްގައި ފަރުވާ ދިނުމަށް ފަހު ދޫކޮށްލިއިރު، ބަޔާނުން ބުނީ، އޭނާ އަށް ދިމާވީ، މެނިންޖިއަލް އިރިޓޭޝަނެއް ކަމަށެެވެ.
ކޮމްޕެނީ ނެތި ބަޔާނުން ކުރިމަތިިލި ފަސް މެޗުގައި އެ ޓީމަށް އިރުޝާދުދިނީ އެސިސްޓަންޓް ކޯޗު އާރޮން ޑޭންކްސް އެވެ.
ޖަރުމަނުގެ ނޫސްތަކުން ރިޕޯޓްކުރާ ގޮތުގައި އިއްޔެ ކޮމްޕެނީ ޓީމުގެ ޓްރެއިނިން ސެންޓަރަށް ދިޔަ ނަމަވެސް، މަސައްކަތް ކުރަން ފަށާފައިވަނީ، އޭނާގެ އޮފީހުގައި ހުރެ އެވެ.
މި ވަގުތު ކްލަބް ފުޓްބޯޅައިގެ މެޗުތައް މަޑުޖެހިފައި އޮތީ މި މަހު 9-17 އަށް ފީފާ ބްރޭކް ކުރިއަށްދާތީ އެވެ. އެ އަށް ފަހު ކްލަބް ފުޓްބޯޅައިގެ ހަރަކާތްތައް ފަށާއިރު، ކޮމްޕެނީ ފުރަތަމަ ދުވަސްތަކުގައި މަސައްކަތް ކުރާނީ އޮފީހުގައި ހުރެ ކަމަށް ރިޕޯޓްތައް ބުނެ އެވެ.
ކުރިން ބާންލީ އަށް ކޯޗުކޮށްދިން ކޮމްޕެނީ އަންނަނީ ބަޔާނަށް ބަދަލުވުމަށް ފަހު ރަނގަޅު މަސައްކަތްތަކެއް ކުރަމުންނެވެ. ބަޔާނުން ވަނީ ކޮމްޕެނީގެ އެއްބަސްވުން، 2029 ވަނަ އަހަރުގެ ޖޫން މަހުގެ ނިޔަލަށް އާ ކޮށްފަ އެވެ.
