ގދ. ތިނަދޫއަށް ސިޓީއެއްގެ ދަރަޖަ ދިނުމަށްޓަކައި އާބާދީ އޮޅުވައިލި ކަމަށް ބުނެ އެ ސިޓީގެ މޭޔަރު ސައުދު އަލީގެ މައްޗަށް ކުރި ދައުވާތަކާ އޭނާ މިއަދު އިންކާރުކުރައްވައިފި އެވެ.
ކްރިމިނަލް ކޯޓުގައި ބޭއްވި އަޑުއެހުމުގައި ސައުދުގެ ވަކީލުން ވަނީ މައްސަލަ ދިރާސާކުރުމަށް ފުރުސަތު ދިނުމަށް ތަކުރާރުކޮށް އެދިފަ އެވެ. ވަކީލުން ބުނީ މައްސަލައާ ރަސްމީކޮށް ހަވާލުވެ، ސައުދުއާ ދިމާވީވެސް މިއަދު ކަމަށެވެ. އެގޮތުން މައްސަލަ ދިރާސާކުރުމަށް 60 ދުވަހުގެ މުއްދަތެއް ދިނުމަށް ވަކީލުން އެދުނެވެ.
ނަމަވެސް އެ މައްސަލަ ބައްލަވާ ގާޒީ އަހްމަދު ޝާފިއު ވިދާޅުވީ މައްސަލައާ ގުޅިގެންމައްސަލަ ދިރާސާކޮށް ވަކީލެއް އައްޔަންކުރަން ސައުދުއަށް އެކަށީގެންވާ ފުރުސަތު ދެވިފައިވާ ކަމަށާއި މައްސަލައިގައި ޖަވާބުދާރީވުމަށް އިތުރު ފުރުސަތެއް ނުދެވޭނެ ކަމަށެވެ.
ސައުދުގެ މައްޗަށް ކޮށްފައިވާ އެނގިހުރެ ސައްހަ ނޫން ލިޔުމެއް ދިނުމުގެ ކުށުގެ ދައުވާ އާއި ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާއަށް އޭނާ އިންކާރުކުރައްވާފައިވާއިރު، އެ ދެ މައްސަލަވެސް މަދަނީ މިންގަނޑުން ބެލޭނެ ކަމަށް ގާޒީ ވަނީ ކަނޑައަޅުއްވާފަ އެވެ.
މި މައްސަލައިގައި ބައެއް ހެކިތައް ސިއްރުކޮށް އެ ހެކިތައް ދިފާއަށް ވަކި އިންތިޒާމެއްގެ ދަށުން ދިރާސާކުރުމަށް ފުރުސަތު ދިނުމަށް ވެސް ގާޒީ ވަނީ ނިންމަވާފަ އެވެ. އެއީ ތިނަދޫ ރައްޔިތުންގެ ޒާތީ މައުލޫމާތު ހިމެނޭ ލިސްޓެވެ.
ސައުދުގެ މައްޗަށް ކުރި ދައުވާތަކާ ގުޅިގެން އޭނާގެ ފަރާތުން ހެކި ހާމަކޮށް ލިޔުމުން ހުށަހެޅުމަށް ނޮވެމްބަރު 29، ގެ 13:00 ޖެހުމާ ހަމައަށް އަދި ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހެޅުމަށް ނޮވެމްބަރު 25، ގެ 13:00 ޖެހުމާ ހަމައަށް ގާޒީ ވަނީ ފުރުސަތު ދެއްވާފަ އެވެ.
މީގެއިތުރުން ދައުލަތުގެ ފަރާތުން ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހަޅަން ނޮވެމްބަރު 30، ގެ ނިޔަލަށް އަދި ހެކި ހުށަހެޅުމަށް ޑިސެމްބަރު 7، ގެ ނިޔަލަށް ގާޒީ ވަނީ ފުރުސަތު ދެއްވާފަ އެވެ.
މި މައްސަލައިގައި އިތުރު އަޑުއެހުމެއް ޑިސެމްބަރު 13، ގައި ބޭއްވުމަށް ގާޒީ ވަނީ ނިންމަވާފަ އެވެ.
ސައުދުގެ މައްޗަށް ޕީޖީ އޮފީހުން އުފުލާފައިވާ ދައުވާގައި ބުނެފައި ވަނީ ތިނަދޫއަށް ސިޓީއެއްގެ ދަރަޖަ ހޯދުމަށްޓަކައި ތިނަދޫގެ އާބާދީގައި 10،000 މީހުން ހަމަވެފައިވާކަން ދެއްކުމަށްޓަކައި ސެޕްޓެމްބަރު 4، 2022، ގައި ލޯކަލް ގަވަމެންޓު އޮތޯރިޓީއަށް ސިޓީއަކާ އެކު ދޮގު ލިސްޓެއް ސައުދު ފޮނުވި ކަމަށެވެ. އެ ލިސްޓުގައި މަރުވެފައިވާ މީހުންގެ މައުލޫމާތާއި ސައްހަކަން ކަށާވަރު ނުކުރެވޭ މައުލޫމާތު ހިމަނާފައިވާ ކަމަށް ޕީޖީ އޮފީހުން ބުނެފައިވެ އެވެ.
އެހެންކަމުން، އެ ލިސްޓުގައިވާ އެންމެންގެ އައިޑީ ކާޑު ނަންބަރު ހިމެނޭ ސައްހަ ލިސްޓެއް ހިއްސާކުރުމަށް އެލްޖީއޭއިން ތިނަދޫ ކައުންސިލްގައި އެދުމުން، އޯގަސްޓު 13، 2023 ގައި ސައުދު ސޮއިކޮށް ސިޓީއަކާއެކު އެލްޖީއޭއަށް ފޮނުވި ލިސްޓުގައި އެހެން ރަށްރަށުގައި ރެޖިސްޓްރީވެފައިވާ މީހުންގެ މައުލޫމާތާއި އެއް ނަންތަކެއް ތަކުރާރުކޮށް ތިނަދޫގެ އާބާދީއަކީ 10،500 މީހުން ކަމަށް ބަޔާންކޮށްފައިވާ ކަމަށް ޕީޖީ އޮފީހުން ބުންޏެވެ.
