ރާއްޖެ އާއި މޮރިޝަސްއާ ދެމެދު އޮތް ކަނޑު ބައިކުރުމުގެ މައްސަލައިގައި ރާއްޖެއިން އަމަލުކުރި ގޮތް ތަހުގީގުކުރުމަށް އުފެއްދި ރިޔާސީ ހާއްސަ ކޮމިޝަން (ޗާގޯސް ކޮމިޝަން) އަށް އަށް ދުވަސް ނުވަނީސް، އެ ކޮމިޝަނުގެ ރައީސާއި އިތުރު މެންބަރަކު ވަކިކޮށް އެ މަގާމުތަކަށް އާ މީހުން ހަމަޖައްސައިފި އެވެ.
ސަރުކާރުގެ ގެޒެޓުގައި މިއަދު ޝާއިއުކުރި ރައީސުލްޖުމްހޫރިއްޔާގެ ގަރާރުގައިވާ ގޮތުން، ރައީސް މުހައްމަދު މުއިއްޒު ވަނީ މި މަހުގެ އެއް ވަނަ ދުވަހު އުފެއްދެވި ހަތް މެންބަރުންގެ ކޮމިޝަނުގެ އެކުލެވޭ ގޮތަށް ބަދަލު ގެންނަވާފަ އެވެ.
މި ގޮތުން ކޮމިޝަނުގެ ރައީސްގެ މަގާމުގައި ކުރިން ހުންނެވި އަހުމަދު ޝާކިރު (ކަށިމާ ޝާކިރު) ވަނީ ވަކިކުރައްވާފަ އެވެ. އަދި އޭނާގެ ބަދަލުގައި ކޮމިޝަނުގެ އާ ރައީސަކަށް ހަމަޖައްސަވާފައި ވަނީ މ. އެވަރެސްޓް، އަބްދުލްއަޒީޒު ޔޫސުފް އެވެ.
އަބްދުލްއަޒީޒު ޔޫސުފަކީ ފޮރިން ސާވިސްގެ ދާއިރާގައި ގިނަ ދުވަސްތަކެއް ވަންދެން ހިދުމަތް ކުރައްވާފައިވާ ޑިޕްލޮމެޓެކެވެ. އޭނާ ވަނީ މީގެ ކުރިން އިންޑިއާގައި ހުންނަވާ ދިވެހިރާއްޖޭގެ ސަފީރުކަމާއި، ސާކުގެ ޑިރެކްޓަރުކަން ފަދަ އިސް މަގާމުތައް ފުރުއްވާފަ އެވެ.
މީގެ އިތުރުން ކޮމިޝަނުގެ މެންބަރެއްގެ ގޮތުގައި ކުރިން އިންނެވި އަހުމަދު މައުރޫފް ވެސް ވަނީ މެންބަރުކަމުން ވަކިކުރައްވާފަ އެވެ. އޭނާގެ ބަދަލުގައި ކޮމިޝަނުގެ އާ މެންބަރެއްގެ ގޮތުގައި އައްޔަންކުރައްވާފައި ވަނީ މއ. ކަނޑޫގެ، އަބްދުލްފައްތާހު އަބްދުލްގަފޫރެވެ.
ޗާގޯސް މައްސަލައިގައި ރާއްޖެއިން އަމަލުކުރި ގޮތް ބެލުމަށް ރިޔާސީ ހާއްސަ ކޮމިޝަނެއް މި މަހުގެ އެއްވަނަ ދުވަހު އުފެއްދެވީ ގާނޫނުއަސާސީގެ 115 ވަނަ މާއްދާގެ (ގ) ގެ ދަށުންނެވެ. މި ކޮމިޝަނަކީ ރިޔާސީ ކޮމިޝަންތަކުގެ ގާނޫނުގެ ދަށުން ތަހުގީގީ އިދާރާތަކަށް ލިބިދޭ ހުރިހާ ބާރުތަކެއް ލިބިގެން މަސައްކަތްކުރާ ކޮމިޝަނެކެވެ.
މި ކޮމިޝަނުގެ މަސައްކަތްތައް ނިންމުމަށް ރައީސް މުއިއްޒު ދެއްވާފައި ވަނީ ތިން މަސް ދުވަހުގެ މުއްދަތެކެވެ.
ޗާގޯސް ކޮމިޝަނުން މައިގަނޑު ގޮތެއްގައި ބަލަނީ ކުރީގެ ސަރުކާރުން ރާއްޖޭގެ ސްޓޭންޑު ބަދަލުކުރި ގޮތާއި އެކަމުގައި ހިންގާފައިވާ މުއާމަލާތްތަކެވެ. އަދި މި މައްސަލައިގައި ދައުލަތުގެ އެއްވެސް އިދާރާއަކުން ނުވަތަ ވެރިއަކު ރިޝްވަތު ހިފާފައިވޭތޯ ވެސް ކޮމިޝަނުން ތަހުގީގުކުރާނެ އެވެ. ނަމަވެސް މަސައްކަތް ފެށިތާ ހަފުތާއެއްހާ ދުވަހުގެ ތެރޭގައި ވެރިން ބަދަލުކުރި ސަބަބެއް ސަރުކާރުން އަދި ހާމައެއް ނުކުރެ އެވެ.
ޗާގޯސްގެ ސިޔާދަތީ ހައްގު ދައުވާކޮށް މޮރިޝަސްއިން އިޓްލޮސްއަށް ހުށަހެޅި އިން ވަކިކުރުމުގެ މައްސަލައިގައި، ކުރީގެ ރައީސް ސޯލިހުގެ ސަރުކާރުން މޮރިޝަސްއަށް ތާއީދުކޮށް ފޮނުވި ސިޓީއާ ގުޅިގެން ބޮޑެތި ސިޔާސީ ދެކޮޅުވެރިކަމެއް އުފެދުނެވެ. އިޓްލޮސްއިން 2023 ގައި ދެމެދު މިން އަޅައިގެން ސަރަހައްދު ބަހާލުމަށް ހުކުމްކުރި ނަމަވެސް، ރާއްޖެއަށް ލިބެންޖެހޭ ސަރަހައްދެއް ގެއްލުނު ކަމަށް ބުނެ މި ސަރުކާރުން މިހާރު ދަނީ އެ ނިންމުން މުރާޖައާކުރަން މަސައްކަތް ކުރަމުންނެވެ.
