އެމެރިކާގެ ދައުރު މެދުތެރޭ އިންތިޚާބުގެ ކެމްޕޭނަށް މިޝިގަންގައި ބޭއްވި ރެލީއެއްގައި ރިޕަބްލިކަން ޕާޓީއަށް ތާއީދު ހޯދުމަށް ބައިވެރިވެ، މަޝްހޫރު ރެޕް ލަވަކިޔުންތެރިޔާ ނިކީ މިނާޖް، ރައީސް ޑޮނަލްޑް ޓްރަމްޕަށް ތައުރީފުކޮށްފި އެވެ.
އޭނާ ބުނީ ޓްރަމްޕް ވަނީ އެމެރިކާގެ ރައްޔިތުންނަށް އުއްމީދީ މުސްތަގުބަލެއް ހޯދައިދީފައި ކަމަށެވެ. އަދި އެ ކެމްޕޭން އެއްވުމުގައި ޓްރަމްޕް ވަނީ ނިކީ މިނާޖްގެ ހަށިގަނޑުގެ ބައްޓަމަށް ތައުރީފުކޮށް ވާހަކަދައްކަވައިފަ އެވެ.
ޓްރަމްޕްގެ ފުރަތަމަ ދައުރުގެ ބައެއް ސިޔާސަތުތަކަށް މީގެ ކުރިން ފާޑުކިޔާފައިވީ ނަމަވެސް، ނިކީ މިނާޖް ވަނީ އޭނާއަކީ ޓްރަމްޕްގެ "އެންމެ ބޮޑު ސަޕޯޓަރު" ކަމަށް ބުނެފަ އެވެ.
މިޝިގަންގެ ސެނެޓް ގޮނޑިއަށް ވާދަކުރައްވާ ޑިމޮކްރެޓިކް ކެންޑިޑޭޓް އަބްދުލް އެލް-ސައީދު އާއި ރިޕަބްލިކަން ކެންޑިޑޭޓް މައިކް ރޮޖާސްއާ ދެމެދު އޮތް ވާދަވެރިކަން ބޮޑުވެފައިވާއިރު، އިންތިޚާބަށް ބާކީ އޮތީ އެންމެ ހަފުތާއަކަށް ވުރެ ކުޑަ ދުވަސްކޮޅެކެވެ. މިދިޔަ ހޮނިހިރު ދުވަހު ކުރީގެ ރައީސް ބަރަކް އޮބާމާ ވެސް ވަނީ ޑިމޮކްރެޓިކް ކެންޑިޑޭޓަށް ތާއީދު ހޯދުމަށް އެ ސަރަހައްދުގައި ރެލީއެއް ބާއްވާފަ އެވެ.
ނޮވެމްބަރު މަހުގެ 3 ވަނަ ދުވަހު ބާއްވާ މި އިންތިޚާބަކީ ޓްރަމްޕްގެ ރިޔާސީ ދައުރުގެ ބާކީ އޮތް ބައިގައި ކޮންގްރެސްގެ ކޮންޓްރޯލް އޮންނާނީ ކޮން ޕާޓީއަކަށްތޯ ކަނޑައެޅޭނެ މުހިންމު އިންތިޚާބަކަށް ވާތީ، ޑިމޮކްރެޓުން ވެސް ދަނީ ވަރުގަދައަށް ކެމްޕޭން ކުރަމުންނެވެ.
އާދީއްތަ ދުވަހު ބޭއްވި ރެލީގައި ވާހަކަދައްކަވަމުން ޓްރަމްޕް ވަނީ އެލް-ސައީދުގެ އިސްލާމީ އަގީދާއަށާއި އޭނާގެ ނަސްލަށް އަމާޒުކޮށް ވާހަކަދައްކަވާފަ އެވެ. އެގޮތުން އެލް-ސައީދު އިންތިޚާބު ކާމިޔާބުކޮށްފި ނަމަ "ޖިހާދީންނަށް" ދައުވަތު ދޭނެ ކަމަށް ޓްރަމްޕް ތުހުމަތު ކުރެއްވި އެވެ.
ޓްރަމްޕްގެ މި ވާހަކަތަކަކީ އިސްލާމްދީނަށް އޮތް ބިރުވެރިކަން ނުވަތަ އިސްލާމޯފޯބިއާ ފެތުރުން ކަމަށް ވިދާޅުވެ، އެލް-ސައީދު ވަނީ އެކަމަށް ފާޑުކިޔުއްވާފަ އެވެ.
އާދީއްތަ ދުވަހު ޕޯޓް ހިއުރޮންގައި ބޭއްވި ރެލީއަށް ނިކީ މިނާޖް ހާޒިރުވީ ރަންކުލައިގެ ގޫޗީ ބްރޭންޑްގެ ސޫޓެއްގަ އެވެ. އޭނާ ވަނީ ޓްރަމްޕްގެ ނަމާއި މިޝިގަންގެ ރިޕަބްލިކަން ކެންޑިޑޭޓުންގެ ނަންތައް ގޮވައި، ސަޕޯޓަރުންގެ ފޯރި ގެނުވާފަ އެވެ.
"ސުޕަ ބޭސް" ފަދަ މަޝްހޫރު ލަވަތައް ކިޔާފައިވާ މި ލަވަކިޔުންތެރިޔާ މިޝިގަންއަށް ދިޔައީ ރައީސްގެ ރަސްމީ މަތިންދާބޯޓު "އެއާ ފޯސް ވަން" ގައެވެ. ބޯޓުގެ ތެރޭގައި އޭނާ ވަނީ ވައިޓް ހައުސްގެ ޕްރެސް ސެކްރެޓަރީގެ މަގާމަށް އިންޓަވިއު ކުރާ ކަމަށް ހެދިގެން ވީޑިއޯއެއް ކުޅެ، އެކްސްގައި އާންމުކޮށްފަ އެވެ.
ވައިޓް ހައުސްގެ ޕްރެސް ސެކްރެޓަރީގެ މަގާމު މިވަގުތު އޮތީ ހުސްކޮށެވެ. އެއީ އެ މަގާމަށް އައްޔަންކުރި ކޭޓީ ޒަކަރިއާ، އޭނާގެ ފުރަތަމަ ނޫސްވެރިންގެ ބައްދަލުވުމުގައި ދެއްކި ވާހަކަތަކަށް ފާޑުކިޔުން އަމާޒުވުމާ ގުޅިގެން، މަގާމާ ހަވާލުވިތާ ފަސް ދުވަސް ތެރޭގައި އިސްތިއުފާ ދިނުމުންނެވެ.
ޓްރިނިޑާޑް އެންޑް ޓޮބޭގޯއަށް އުފަން މި ރެޕް ލަވަކިޔުންތެރިޔާ މީގެ ކުރިން ވެސް ވަނީ އެކި ފަހަރުމަތިން ޓްރަމްޕަށް ތާއީދުކޮށްފަ އެވެ. އޭގެ ތެރޭގައި ނައިޖީރިއާގައި ކްރިސްޓިއަނުންނަށް އަނިޔާކުރާ ކަމަށް ބުނެ ޓްރަމްޕް ކުރި ތުހުމަތުތަކަށާއި، އެމެރިކާގެ ރަށްވެހިކަން ހޯދުމުގެ ފުރުސަތު ލިބޭ ޓްރަމްޕްގެ "ގޯލްޑް ކާޑް" ވިސާ ސިޔާސަތަށް އޭނާ ތާއީދުކޮށްފައިވެ އެވެ.
