ބްރެޒިލްގެ ވާތުފިޔަވައިގެ ކެންޑިޑޭޓް ލުއިޒް އިނާސިއޯ ލޫލާ ޑަ ސިލްވާ ކާމިޔާބު ހޯއްދެވީ "އޮޅުވާލާފައިވާ އިންތިޚާބަކުން" ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ނަމަވެސް، އިންތިޚާބުން ނާކާމިޔާބީއާ ކުރިމަތިލާންޖެހުނު ކަނާތުފިޔަވައިގެ ކެންޑިޑޭޓް ފްލާވިއޯ ބޮލްސޮނާރޯގެ ޕާޓީން މިހާރު ވަނީ އިންތިޚާބުގެ ނަތީޖާ ގަބޫލުކޮށްފަ އެވެ.
ކުރީގެ ރައީސް ޖައިރް ބޮލްސޮނާރޯގެ ދަރިކަލުން ފްލާވިއޯ ބޮލްސޮނާރޯ، އާދިއްތަ ދުވަހު ބޭއްވި ރިޔާސީ އިންތިޚާބުން ވީ ބަލި ގަބޫލުކުރަން ވަނީ އިންކާރު ކުރައްވާފަ އެވެ. އަދި އެ ގައުމުގެ ސުޕްރީމް ކޯޓުން ވޯޓުލުމުގެ ވަގުތު ދެ ގަޑިއިރަށް އިތުރުކޮށްދީފައިވާތީ، ލޫލާ ހޯއްދެވި ކާމިޔާބީ ބާތިލުކުރުމަށް މަސައްކަތް ކުރައްވާނެ ކަމަށް އޭނާ ވިދާޅުވި އެވެ.
އެހެންނަމަވެސް، ހޯމަ ދުވަހުގެ ފަހުގެ ވަގުތެއްގައި ބޮލްސޮނާރޯ ނިސްބަތްވާ ލިބަރަލް ޕާޓީގެ ރައީސް ވަލްޑެމާ ކޮސްޓާ ނެޓޯ ސޮއިކުރައްވައި ނެރުއްވި ބަޔާނެއްގައި ވަނީ، އިންތިޚާބުގެ ދެވަނަ ބުރުގެ ނަތީޖާ އެ ޕާޓީން ގަބޫލުކުރާ ކަމަށް ބުނެފަ އެވެ.
"އަޅުގަނޑުމެން ރިޔާސީ އިންތިޚާބުގެ ނަތީޖާ ގަބޫލުކުރަން،" ކޮސްޓާ ނެޓޯ ވިދާޅުވި އެވެ. "އެކަމަކު އަޅުގަނޑުމެން ގަބޫލުކުރާ ގޮތުގައި ފާހަގަކުރެވުނު މައްސަލަތަކަށް އެކަށީގެންވާ ސާފު ޖަވާބެއް ލިބެންޖެހޭ."
ޕާޓީން ބަޔާން ނެރުނު ފަހުން މިހާތަނަށް އާންމުކޮށް އެއްޗެއް ވިދާޅުނުވާ ބޮލްސޮނާރޯ، ހޯމަ ދުވަހުގެ ކުރީކޮޅު ވިދާޅުވީ، ގޭބަންދުގައި ހުންނެވި އޭނާގެ ބައްޕައާ ބައްދަލުކުރެއްވުމަށް ފަހު، ޕާސްޕޯޓް ހަވާލުކުރުމަށް ފެޑަރަލް ފުލުހުން ކުރި އަމުރަށް ތަބާވާނެ ކަމަށެވެ. އަދި ބްރެޒިލް ދޫކޮށް ފިލަން އުޅޭ ކަމަށް ދެކެވޭ ވާހަކަތައް އޭނާ ވަނީ ދޮގުކުރައްވާފަ އެވެ.
މި އިންތިޚާބުގެ ކުރިން ޓްރަމްޕް ރަސްމީކޮށް ބޮލްސޮނާރޯއަށް ތާއީދުކުރައްވާފައެއް ނުވެ އެވެ. ނަމަވެސް، ބޮލްސޮނާރޯގެ އާއިލާ އަލުން ވެރިކަމަށް ގެނައުމަށްޓަކައި ޓްރަމްޕްގެ ސްޓޭޓް ޑިޕާޓްމަންޓުގެ އޮފިޝަލުން ކެމްޕޭނެއް ހިންގި ކަމަށް ރޮއިޓާސް އިން ވަނީ ރިޕޯޓުކޮށްފަ އެވެ.
"އަޅުގަނޑު ވަކި ފަރާތަކަށް ނުޖެހެން، އެކަމަކު އެއީ އޮޅުވާލާފައިވާ އިންތިޚާބެއްގެ ގޮތުގައި ފެނުނީ،" އެއްވެސް ހެއްކެއް ދެއްކެވުމެއް ނެތި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވި އެވެ. "އަޅުގަނޑަށް ފެނުނު ގޮތުގައި އެކަން ދިޔައީ ވަރަށް ގޯސްކޮށް."
ބޮލްސޮނާރޯ ބަލިވީ ހަތަރު މިލިއަނަށް ވުރެ ގިނަ ވޯޓުގެ ތަފާތުންނެވެ. އެހެންކަމުން މިއީ ބަދަލުކުރަން އުނދަގޫވާނެ ސާފު ނަތީޖާއެކެވެ.
