ޔޫކްރެއިންގެ އޮފިޝަލުން އެ ގައުމުގެ އިންޓަނެޓްގެ މައްސަލަތައް ހައްލުވެފައިވާ ކަމަށް ވިދާޅުވެފައި ވަނިކޮށް، އެ ގައުމަށް ދެމުންދާ ސްޓާލިންކްގެ ހިދުމަތް މީގެ ކުރިން ސްޕޭސް އެކްސް އިން ހިފަހައްޓާފައި އޮތް ކަމަށް އީލޮން މަސްކް އެއްބަސްވެއްޖެ އެވެ.
ޓެކްނޮލޮޖީގެ ދާއިރާގެ މަހުޖަނު މަސްކް، ޔޫކްރެއިންގެ މައްޗަށް ތުހުމަތު ކުރީ އަސްކަރީ ހަރަކާތްތަކަށް ސްޓާލިންކް ބޭނުންކޮށްގެން އެ ހިދުމަތުގެ އުސޫލުތަކާ ހިލާފުވެފައިވާ ކަމަށެވެ. ނަމަވެސް، އެމެރިކާ ސަރުކާރުން ހިންގާ އަސްކަރީ ފެންވަރުގެ "ސްޓާޝީލްޑް" ހިދުމަތަށް ދިމާވި މައްސަލައާ ކުންފުންޏާ ގުޅުމެއް ނެތް ކަމަށް ބުންޏެވެ.
މަސްކްގެ މި ވާހަކަތަކާ ގުޅިގެން ކީވްގެ ސަރުކާރުން ރަސްމީކޮށް އަދި އެއްޗެއް ބުނެފައެއް ނުވެ އެވެ. އެކަމަކު ޔޫކްރެއިންގެ ރައީސްގެ އެޑްވައިޒަރު ސާހީ ބެސްކްރެސްޓްނޯވް ވިދާޅުވީ މަސްކް އެކްސްގައި ކުރެއްވި ޕޯސްޓަކީ "ވަރަށް އާދަޔާ ހިލާފު" ވާހަކަތަކެއް ކަމަށެވެ.
ޔޫކްރެއިންގެ ދިފާއީ އޮޕަރޭޝަންތަކަށް ހަފުތާއަކަށް ވުރެ ގިނަ ދުވަހު ހުރަސް އެޅުނު އިންޓަނެޓްގެ މައްސަލައަކީ ގަސްދުގައި ކުރި ކަމެއް ނޫން ކަމަށް މަސްކް މީގެ ކުރިން ވަނީ ބުނެފަ އެވެ.
އިންޓަނެޓްގެ މި މައްސަލަ ފުރަތަމަ ފެންމަތިވީ ރަޝިއާގެ ތެޔޮ އުފައްދާ މަރުކަޒުތަކަށް ޔޫކްރެއިންއިން ދިން ހަމަލާތަކާ ގުޅިގެން ވޮޝިންޓަނާއި ކީވްއާ ދެމެދު އުފެދުނު ހިޔާލުތަފާތުވުންތަކުގެ ތެރޭގަ އެވެ.
މަސްކްގެ މި އިއުތިރާފާއި އަލުން ހިދުމަތް ލިބެން ފެށީ، ސްޓާލިންކްގެ ހިދުމަތް މެދުކަނޑާލަން އަންގާފައި ނުވާނެ ކަމަށް ތަކުރާރުކޮށް ބުނުމަށް ފަހު، އެ ހިދުމަތް އަލުން ދިނުމަށް ޓެސްލާ އަދި އެކްސްގެ ވެރިޔާ މަސްކްގެ ކިބައިން އެދިވަޑައިގެންފައިވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ފަހުންނެވެ.
"އާންމު ވިޔަފާރި ހިދުމަތެއް ކަމަށްވާ ސްޓާލިންކް ބޭނުންކޮށްގެން މީހުން މެރުމަށް ޑްރޯން ހަމަލާތައް ދިނުމަކީ ދުވަހަކުވެސް ހުއްދަ ދީފައިވާ ކަމެއް ނޫން، އަދި އެއީ ހުއްދަ ދޭންޖެހޭނެ ކަމެއް ވެސް ނޫން،" އެކްސްގައި ކުރި ޕޯސްޓެއްގައި މަސްކް ލިޔުނެވެ.
މަސްކް ބުނީ ޔޫކްރެއިންގެ އަސްކަރިއްޔާއިން ސްޓާލިންކްގެ އުސޫލުތަކާ ހިލާފުވެ، މީހުން މެރުމަށް ހަމަލާދޭ ޑްރޯންތަކުގައި އެ ހިދުމަތް ބޭނުންކޮށްފައިވާ ކަމަށާއި، އެ ފުރުސަތު މިދިޔަ ހަފުތާގައި ބަންދުކޮށްފައިވާ ކަމަށެވެ.
ދުނިޔޭގެ އެއްވެސް އަމިއްލަ ކުންފުންޏަކަށް ވުރެ ބޮޑަށް ސްޕޭސް އެކްސް އިން ޔޫކްރެއިންގެ ދިފާއުގައި މަސައްކަތް ކޮށްފައިވާނެ ކަމަށް މަސްކް ބުންޏެވެ. އަދި ސްޓާޝީލްޑަކީ އެމެރިކާ ސަރުކާރުގެ ކޮންޓްރޯލްގެ ދަށުގައި އޮންނަ މުޅިން ތަފާތު ނިޒާމެއް ކަމަށާއި، އެ ނިޒާމާ މެދު ގޮތް ނިންމާނީ ސަރުކާރުން ކަމަށް އޭނާ ތަކުރާރުކުރި އެވެ.
މަސްކް ފަހުން ކުރި ޕޯސްޓެއްގައި ބުނީ، އަސްކަރީ އިންފްރާސްޓްރަކްޗާގެ މަސައްކަތްތަކަށް ސްޓާލިންކް ބޭނުންކުރެވުނު ނަމަވެސް، ރައްދު ހަމަލާ އަމާޒުވެދާނެ ފަދަ ސީދާ ހަމަލާދޭ އޮޕަރޭޝަންތަކުގައި އެ ހިދުމަތް ބޭނުން ނުކުރެވޭނެ ކަމަށެވެ.
މި މައްސަލައިގައި ޔޫކްރެއިންގެ ދިފާއީ ވުޒާރާއިން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
ޔޫކްރެއިން އިން މުއާސަލާތީ ބޭނުންތަކަށް އާންމު ސްޓާލިންކް ހިދުމަތާއި ރައްކާތެރިކަން ވަރުގަދަ ސްޓާޝީލްޑް ހިދުމަތް ވެސް ބޭނުންކުރެ އެވެ. މި ދެ ހިދުމަތަކީ ވެސް ސްޕޭސް އެކްސް އިން ފޮނުވާފައިވާ ސެޓެލައިޓްތަކެއްގެ އެހީގައި ދޭ ހިދުމަތްތަކެކެވެ.
