ށ. ފުނަދޫގައި މިއަދު ހެނދުނު 8:00 ހާއިރު ރޯވި އަލިފާންގަނޑު ކޮންޓްރޯލްކޮށްފި އެވެ.
ނޭޝަނަލް ޑިޒާސްޓާ މެނޭޖުމެންޓް އޮތޯރިޓީގެ ރަސްމީ އެކްސް އެކައުންޓުގައި ދާދި ދެންމެއަކު އެ އިދާރާއިން ކުރި ޕޯސްޓެއްގައި ބުނީ އަލިފާންގަނޑު މިހާރު ކޮންޓްރޯލް ކޮށްފައިވާއިރު، އެ ހާދިސާގައި އެއް ގެ އަނދައި ވަރަށް ބޮޑަށް ގެއްލުންވެފައިވާ ކަމަށެވެ. އަދި، އިތުރު ތިން ގެއަކަށް އަލިފާނުގެ ސަބަބުން އެކިވަރުގެ ގެއްލުންވެފައިވާ ކަމަށް ވެސް އެ އިދާރާއިން ބުންޏެވެ.
އަލިފާން ރޯވީ ފުނަދޫގައި ހުންނަ ހަމައެކަނި ޕެޓްރޯލް ޝެޑުގަ އެވެ. އެއީ އެ ރަށުގައި އަމިއްލަ ބަޔަކު ހިންގާ ވިޔަފާރި އެކެވެ.
އެ ހާދިސާއާ ގުޅޭ މައުލޫމާތު ދެއްވަމުން، ފުނަދޫ ކައުންސިލްގެ ރައީސް، މުހައްމަދު އާދިލް ވިދާޅުވީ އެ ހާދިސާގައި އެއްވެސް މީހަކަށް ސީރިއަސް އަނިޔާއެއް ލިބިފައި ނުވާ ކަމަށެވެ. ނަމަވެސް، ދުމުގެ ސަބަބުން ގެއްލުން ލިބުނު 18 މީހަކަށް ހޮސްޕިޓަލުގައި ފަރުވާދެމުންދާ ކަމަށް އޭނާ ވިދާޅުވި އެވެ.
"އެއްވެސް މީހަކަށް ޖިސްމާނީ ބޮޑު އަނިޔާއެއް ނުވޭ، 18 ވަރަކަށް މީހުންނަށް ފަރުވާ ދެނީ، ދުމުގެ އަސަރު ކޮށްގެން،" އާދިލް ވިދާޅުވި އެވެ.
ރޯވީ ށ. ފުނަދޫގައި އޮޕަރޭޓްކުރާ ހަމައެކަނި ޝެޑުގައި، ބޮޑެތި ގެއްލުންތަކެއް ލިބުނު
ށ. ފުނަދޫގައި ހުންނަ ހަމައެކަނި ޕެޓްރޯލް ޝެޑުގައި ރޯވި އަލިފާންގަނޑު ކޮންޓްރޯލް ނުވެ، ކައިރީގައި ހުރި ތިން ގުދަނަކާއި ގެއަކަށް ބޮޑެތި ގެއްލުންތަކެއްވި. މި ހާދިސާގައި އެއްވެސް މީހަކަށް ސީރިއަސް އަނިޔާއެއް ނުވި ނަމަވެސް، ރަށުގެ ހަމައެކަނި ޝެޑު އަނދައި ހުލިވުމުން ރަށުން ޕެޓްރޯލް ލިބުމަށް ވަނީ ދަތިތަކާ ކުރިމަތިވެފައި.
ފުނަދޫގައި ހިނގި އަލިފާނުގެ ހާދިސާގައި ޕެޓްރޯލް ޝެޑާ ޖެހިގެން ހުރި ހަތަރު ވޯކްޝޮޕް އަނދައިގެން ގޮސްފައިވާކަމަށް އާދިލް ވިދާޅުވި އެވެ.
އޭނާ ވިދާޅުވީ ފުނަދޫގައި އޮޕަރޭޓްކުރާ ހަމައެކަނި ޕެޓްރޯލް ޝެޑް އަނދައި ހުލިވުމުން ޕެޓްރޯލް ލިބޭނެ ގޮތްތައް ސަރުކާރާ މަޝްވަރާކޮށްގެން ބަލަމުންދާނެ ކަމަށެވެ.
އެންޑީއެމްއޭއިން ބުނީ އަލިފާން ރޯވި ސަރަހައްދުން އަދިވެސް އެއްޗެހި ގޮވާ އަޑު އިވެމުންދާތީ އެ ސަރަހައްދުގައި ހުރި ގޭގޭގެ މީހުން ރައްކާތެރި އެހެން ގޭގެއަށް ވަގުތީގޮތުން ބަދަލުކޮށްފައިވާ ކަމަށެވެ.
އެ ހާދިސާގެ ސަބަބުން އިންސާނީ އެހީ ފޯރުކޮށްދޭންޖެހޭ ފަރާތްތައް ދެނެގަނެ، އެ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުންދާ ކަމަށް އެ އިދާރާއިން ބުންޏެވެ.
ޕެޓްރޯލް ޝެޑުގައި ރޯވި އަލިފާން ނިއްވުމުގެ މަސައްކަތް އެމްއެންޑީއެފް އާއި ރަށުގެ ރައްޔިތުން ދަނީ ކުރަމުންނެވެ. އޭގެއިތުރުން އެ ރަށު އެއާޕޯޓުގައި އޮޕަރޭޓްކުރާ ފަޔާ ލޮރީވެސް އަލިފާން ނިއްވުމަށް ދަނީ ބޭނުން ކުރަމުންނެވެ.
ގާތްގަނޑަކަށް 3،500 އެއްހާ މީހުން ދިރިއުޅޭ ފުނަދޫ ފަތްމިނި ޕެޓްރޯލް ޝެޑް ހުންނަނީ ބަނދަރު ސަރަހައްދުގަ އެވެ. މީހުން ދިރިއުޅޭ ގެތަކާއި ގުދަންތައް ހުންނަނީ ޝެޑާ ގާތްގަނޑަކަށް 60 ފޫޓް ދުރުގަ އެވެ.
ޕެޓްރޯލް ޝެޑު އަނދައި ހުލިވުމުން ފުނަދޫ ވަނީ ޕެޓްރޯލަށް ޖެހިފަ އެވެ. އެ ރަށުގައި ގިނަ އަދަދެއްގެ އެއްގަމުގައި ދުއްވާ ވެހިކަލާއި ތިން މަސް ދޯނީގެ އިތުރުން އެހެނިހެން 50 ވަރަކަށް ކަނޑު އުޅަނދު އޮޕަރޭޓްކުރެ އެވެ.
