ރައީސް މުހައްމަދު މުއިއްޒާއި އެމަނިކުފާނުގެ އަނބިކަނބަލުން ފުރަމާނަ ދަތުރެއްގައި މިއަދު ޕާކިސްތާނަށް ފުރާވަޑައިގެންފި އެވެ.
އަންނަ ބުރާސްފަތި ދުވަހުގެ ނިޔަލަށް ރައީސް ކުރައްވާ އެ ދަތުރުގައި ޕާކިސްތާނުގެ ރައީސް އާސިފް އަލީ ޒަރުދާއީ އާއި ބޮޑުވަޒީރު މުހައްމަދު ޝެހްބާޒް ޝަރީފްއާ ބައްދަލު ކުރައްވާނެ އެވެ. އަދި އެ ގައުމުގެ އިތުރު ސީނިއާ އޮފިޝަލުންނާ ވެސް ރައީސް ބައްދަލު ކުރައްވާނެ އެވެ.
އެ ދަތުރުގައި ރާއްޖެ އާއި ޕާކިސްތާނާ ދެމެދު 12 އެމްއޯޔޫއެއްގައި ސޮއި ކުރާނެ އެވެ. އޭގެ ތެރޭގައި މިލިޓަރީ އެމްއޯޔޫއެއް ވެސް ހިމެނޭ ކަމަށް ޕާކިސްތާނުގެ މީޑިއާތަކުން ރިޕޯޓު ކުރެ އެވެ.
ރައީސް ޕާކިސްތާނަށް ވަޑައިގަންނަވާއިރު، ވެރިކަން ކުރާ ޕީޕަލްސް ނެޝަނަލް ކޮންގްރެސްގެ 16 މެންބަރަކު ވަނީ މިދިޔަ މަހު ޕާކިސްތާނަށް ވަޑައިގެންފަ އެވެ. އޭގެ ތެރޭގައި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ހިމެނިވަޑައިގަންނަވަ އެވެ.
އެ ދަތުރުގައި އަބްދުއްރަހީމް ވަނީ ޕާކިސްތާނުގެ ޗީފް އޮފް ޑިފެންސް ފޯސް ފީލްޑް މާޝަލް ސައްޔިދު އަހުމަދު މުނީރުއާ ބައްދަލު ކުރައްވައިފަ އެވެ. ޗީފް އޮފް ޑިފެންސް ފޯސްގެ އިތުރުން މުނީރަކީ ޗީފް އޮފް އާމީ ސްޓާފް އެވެ. އޭނާ މިހާރު ހުންނެވި ފީލްޑް މާޝަލް ރޭންކަކީ ޕާކިސްތާނުގައި ސިފައިންނަށް ދޭ އެންމެ މަތީ ރޭންކެވެ.
ރައީސް މުއިއްޒު ޕާކިސްތާނަށް ވަޑައިގަންނަވަން ހަމަޖެހިފައިވާއިރު ކުރީގެ ރައީސް މުހައްމަދު ނަޝީދާއި ކުރީގެ ކުރީގެ އިކޮނޮމިކް މިނިސްޓަރު ފައްޔާޒް އިސްމާއިލް މިއަދު ވަނީ އިންޑިއާއަށް ވަޑައިގެންފަ އެވެ.
