އިންޑިއާގެ ބޯޑަރު ބަލަހައްޓާ ސިފައިން ބަޑިޖަހައި ޕާކިސްތާނުގެ އާންމު ދެ ރައްޔިތަކު މަރާލި ކަމަށް ބުނާ މައްސަލައިގައި، އިސްލާމްއާބާދުގައި ހުންނަ އިންޑިއާގެ ޑިޕްލޮމެޓިކް މިޝަންގެ އެންމެ އިސްވެރިޔާ ހޮނިހިރު ދުވަހު ޕާކިސްތާނުގެ ފޮރިން މިނިސްޓްރީއަށް ހާޒިރުކޮށްފި އެވެ.
ޕާކިސްތާނުގެ ފޮރިން މިނިސްޓްރީން ބުނީ، ދެ ގައުމުގެ ބޯޑަރުގައި ހިމެނޭ ބޭޑިއަން ސަރަހައްދުގައި ހުކުރު ދުވަހު ހިނގި މި ހާދިސާގައި، އިންޑިއާގެ ބޯޑަރު ސެކިއުރިޓީ ފޯސް (ބީއެސްއެފް) ގެ ސިފައިން އެއްވެސް ކުރިމަތިލުމަކާ ނުލައި، ހަތިޔާރެއް ނެތް އާންމު ރައްޔިތުންނަށް އަމާޒުކޮށް ނުރައްކާތެރި ހަމަލާތަކެއް ދީފައިވާ ކަމަށެވެ.
މި މައްސަލައާ ގުޅިގެން އިންޑިއާގެ އެކްސްޓާނަލް އެފެއާޒް މިނިސްޓްރީންނާއި ބޯޑަރު ސެކިއުރިޓީ ފޯސްގެ ފަރާތުން މިހާތަނަށް ވަކި އެއްޗެއް ބުނެފައެއް ނުވެ އެވެ.
ނަމަވެސް އިންޑިއާގެ ބައެއް ނޫސްތަކުން ރިޕޯޓުކުރި ގޮތުގައި ބޯޑަރު ގާޑުން ތިން މީހަކަށް ބަޑި ޖެހީ އެ މީހުން ގަވާއިދާ ހިލާފަށް އިންޑިއާގެ ސަރަހައްދަށް ވަންނަން މަސައްކަތް ކުރުމުންނެވެ. އޭގެ ތެރެއިން ދެ މީހަކު މަރުވި އިރު، ތިން ވަނަ މީހާއަށް އަނިޔާވި ކަމަށް ރިޕޯޓުތައް ބުނެ އެވެ.
