މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ވެރިކަމެއްގައި އެ ޕާޓީގެ އިސް ވެރިޔަކަށް ވާނީ ޗެއާޕާސަން ކަމަށް ކަނޑައަޅައި، ރައީސުލްޖުމްހޫރިއްޔާގެ މުޝީރަކަށްވެސް ޗެއާޕާސަން އައްޔަންކުރަންޖެހޭ ގޮތަށް އަސާސީ ގަވާއިދަށް އިސްލާހެއް ހުށަހަޅައިފި އެވެ.
އެމްޑީޕީގެ އަސާސީ ގަވާއިދަށް ހުށަހަޅާފައިވަނީ އެމްޑީޕީގެ އެންމެ އިސް ފަރާތަކީ ޕާޓީގެ ޗެއާޕާސަން ކަމެވެ. އެހެންކަމުން އެ އިސްލާހު ފާސްވެއްޖެނަމަ އެމްޑީޕީގެ ޓިކެޓުގައި ރައީސުލްޖުމްހޫރިއްޔާގެ މަގާމަށް އިންތިހާބުވާ ބޭފުޅަކު އެ ޕާޓީގެ އިސްވެރިޔަކަށް ކުރިން ހަމަޖެހޭ އުސޫލު ނިމުމަކަށް އަންނާނެ އެވެ.
އަސާސީ ގަވާއިދަށް ދެން ހުށަހަޅާފައިވާ އިސްލާހުގައިވާ ގޮތުން އެ ޕާޓީގެ ސަރުކާރެއް އޮންނައިރު، ޕާޓީ އާއި ސަރުކާރާ އޮންނަ ގުޅުން ވަރުގަދަ ކުރުމަށްޓަކައި ރައީސުލްޖުމްހޫރިއްޔާގެ އިސް މުޝީރަކަށް ޕާޓީގެ ޗެއާޕާސަން އައްޔަންކުރަންވާނެ ކަމަށް ވަނީ ބަޔާންކޮށްފަ އެވެ.
އެމްޑީޕީގެ ރިޔާސީ ޕްރައިމަރީ ކާމިޔާބުކުރާ ފަރާތް، އެ އިންތިހާބު ކާމިޔާބުކުރުމަށްފަހު، ގައުމީ އިންތިހާބު ކާމިޔާބުވެއްޖެނަމަ ސަރުކާރު އެކުލަވާލުމުގައި އާއި، މުހިއްމު ސިޔާސަތުތައް ކަނޑައެޅުމާއި، ތަންފީޒުކުރުމަށް ޕާޓީގެ ގައުމީ މަޖިލީހުގެ ލަފަޔާ މަޝްވަރާ ހޯދުމަށް އެއްބަސްވާ އެއްބަސްވުމެއްގައި ސޮއިކުރުމަށްވެސް އިސްލާހު ވަނީ ހުށަހަޅާފަ އެވެ.
މީގެއިތުރުން އިސްލާހުގައިވާ ގޮތުން ޕާޓީގެ ފަރާތުން ރިޔާސީ އިންތިހާބުގައި ވާދަކުރުމަށް އަސާސީ ގަވާއިދުގައިވާ ގޮތުގެ މަތިން ރިޔާސީ ކެންޑިޑޭޓް ކަނޑައަޅައިފިނަމަ، އެ އިންތިހާބުގެ މެނިފެސްޓޯ އެކުލަވާލުމާއި، އެ އިންތިހާބުގެ ކެމްޕޭނާ ގުޅޭ ކަންކަން ނިންމަންވާނީ ރިޔާސީ ކެންޑިޑޭޓުގެ މަތިންނެވެ.
އެމްޑީޕީގެ އަސާސާސީ ގަވާއިދަށް ހުށަހަޅާފައިވާ އިސްލާހުގައިވާ ގޮތުން ޗެއާޕާސަންގެ މަސްއޫލިއްޔަތުތަކުގެ ތެރެއިން ރިޔާސީ ޕްރައިމަރީ އިންތިޒާމުކޮށް ރޭވުން ވަނީ އުނިކޮށްފަ އެވެ. ކުރިން ޗެއާޕާސަނަށް އިންތިޒާމުކޮށް ރޭވުން މަނަލީ ހަމައެކަނި ޗެއާޕާސަން އިންތިހާބެވެ.
ޕާޓީގެ އަސާސީ ގަވާއިދަށް ގެންނަ މި އިސްލާހާއެކު ރިޔާސީ ޕްރައިމަރީގެ އިންތިހާބުގެ ކަންކަން ހިންގައި ބަލަހައްޓާނީ އިސްތިއުނާފު ފަނޑިޔާރުންގެ މަޖިލީހުގެ ރައީސް އެވެ. އިސްތިއުނާފް ފަނޑިޔާރު މަޖިލީހުގެ މެންބަރުންގެ ގޮތުގައި ޕާޓީގެ އެއްވެސް އިންތިހާބީ މަގާމެއް ނުވަތަ ސެކްރެޓޭރިއެޓްގެ މަގާމެއް ފުރާ މީހަކު އައްޔަން ނުކުރެވެ އެވެ.
އެމްޑީޕީގެ ކޮންގްރެސް ރަސްމީކޮށް ރޭ ހުޅުވާފައިވާއިރު، މިއަދު މެންދުރުފަހުން ފެށިގެން ރޭގަނޑަށް ބޭއްވުމަށް ހަމަޖެހިފައިވަނީ އިންވެސްޓްމަންޓް ފޯރަމެވެ. އަދި ހޮނިހިރު ދުވަހު ހެނދުނުން ފެށިގެން ކޮންގްރެސްގެ ރަސްމީ މަސައްކަތްތައް ފެށުމަށް ވަނީ ހަމަޖެހިފަ އެވެ.
މިގޮތުން ހޮނިހިރު ދުވަހު އަސާސީ ގަވާއިދަށް ގެންނަ ބަދަލުތަކާ ގުޅޭގޮތުން ބަހުސްކޮށް، އަސާސީ ގަވާއިދަށް ގެންނަ އިސްލާހުތައް ފާސްކުރުމަށް ވަނީ ހަމަޖެހިފަ އެވެ. އޭގެއިތުރުން ބޮޑު ބަދަލާ ގުޅޭ ގަރާރާއި، ލާމަރުކަޒީ ނިޒާމާ ގުޅޭ ގަރާރަށް ބަހުސްކޮށް ގޮތެއް ނިންމުމަށް ވަނީ ހަމަޖެހިފަ އެވެ.
