ޑާކާ، ބަންގްލަދޭޝް (އޮގަސްޓް 14) - އަންނަ މަހު ބާއްވާ ފީފާ އާސިއާން ކަަޕުގައި ބަައިވެރިވާން ނިންމައި ފަަހުން އެ ފުރުސަތު ދޫކޮށްލި އިންޑިއާގެ ޖާގަ ހޯދަން ބަންގްލަދޭޝް އިން މަސައްކަތް ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ފީފާ އާސިއާން ކަޕް އޮތީ ސެޕްޓެމްބަރު 23 އިން އޮކްޓޫބަރު ތިން ވަނަ ދުވަހުގެ ނިޔަލަށެވެ. އެ މުބާރާތުގައި ކުޅޭ ކޮންމެ ގައުމަކަށް، 125،000 ޑޮލަރުގެ ބޯނަހެއް ދޭން ވެސް ވަނީ ނިންމައިފަ އެވެ.
އާސިއާން ކަޕްގެ ގުރުއަތުލުން ބޭއްވިއިރު އިންޑިއާ ހިމެނުނީ، ޕްްރިމިއާ ޑިވިޝަނުގަ އެވެ. ޗެމްޕިއަނުންނަށް އެއް މިލިއަން ޑޮލަރު ދޭ މި ޑިވިޝަނުގައި އިންޑިއާ ހިމެނެނީ، ގްރޫޕް އޭގަ އެވެ. އިންޑިއާގެ އިތުރުން އެ ގްރޫޕްގައި އޮތީ އިންޑޮނޭޝިއާ، މެލޭޝިއާ އަދި ސިންގަޕޫރު އެވެ.
އިންޑިއާ އިން އާސިއާ ކަޕުން ވަަކިވި މައިގަނޑު ސަބަބަކީ، އޮކްޓޫބަރު ތިން ވަނަ ދުވަހު އެ ގައުމުގައި ބްރެޒިލްއާ ދެކޮޅަށް ކުޅެން އޮތް މެޗަށް ތައްޔާރުވުމަށެެވެ.
އާސިއާން ކަޕުން އިންޑިއާ ވަކިވުމުން، ފީފާ އިން އަންނަނީ އެ މުބާރާތަށް މި ފަހަރު، އެމެރިކާ، މެކްސިކޯ އަދި ކެނަޑާގައި ބޭއްވި ފީފާ ވޯލްޑް ކަޕްގައި ކުޅުނު ޓީމެއް ގެންނަން މަޝްވަރާ ކުރަމުންނެވެ. އެހެން ނަމަވެސް، އެ ޖާގަ ލިބޭތޯ، ދެކުނު އޭޝިއާގެ ދެ ގައުމު ކަމަށްވާ ސްރީ ލަންކާ އާއި ބަންގްލަދޭޝް އިން އަންނަނީ މަސައްކަތް ކުރަމުންނެވެ.
ލަންކާ އަށް ވުރެން ބޮޑަށް އާސިއާން ކަޕްގެ ޖާގަ ލިބޭތޯ މަސައްކަތް ކުރަމުން އަންނަނީ، ބަންގްލަދޭޝް އިންނެވެ. ލަންކާ އިން އަންނަ މަހުގެ ފީފާ ބްރޭކް ތެރޭގައި، މޮރިޝަސް އާއި ސީޝެލްސްއާ ކުޅެން ވަނީ އެއްބަސްވެފަ އެވެ. އެކަމަކު، ބަންގްލަދޭޝް އިން ކުރިއަށް އޮތް ފީފާ ބްރޭކަށް މެޗުތަކެއް ހަމަޖައްސަން ކުރާ މަސައްކަތުގައި ގޮތްތަކެއް ނިމިފައިނުވެ އެވެ. ކިރްގިސްތާންގައި އޮތް ޓްރައި-ނޭޝަން މުބާރާތަކަށް ދިއުމުގެ ވާހަކަތައް ދެކެވުނަސް އަދި ގޮތެއް ނުނިންމެ އެވެ.
ބަންގްލަދޭޝްގެ މީޑިއާ ރިޕޯޓްތައް ބުނާގޮތުން، ބަންގްލަދޭޝްގެ ފުޓްބޯޅަ ފެޑެރޭޝަންގެ ރައީސް، ތާބިތު އައްވަލް އަންނަނީ އާސިއާން ކަޕުން ބަންގްލަދޭޝް އަށް ފުރުސަތެއް ލިބޭތޯ މަސައްކަތް ކުރަމުންނެވެ. ބަންގްލަދޭޝް އިން ވަނީ މިދިޔަ ޖޫން މަހު، ޔޫރަޕްގެ ސެން މެރީނޯއާ ދެކޮޅަށް އެ ގައުމުގައި މެޗެއް ކުޅެ މޮޅުވެފަ އެވެ.
ދެކުނު އޭޝިއާގެ އެންމެ ބޮޑު ފުޓްބޯޅަ މުބާރާތް، ސާފް ޗެމްޕިއަންޝިޕް މި ފަހަރު އޮތީ ބަންގްލަދޭޝްގަ އެވެ. އެ މުބާރާތް އޮތީ ނޮވެމްބަރު 4-17 އަށް ބަންގްލަދޭޝްގެ ވެރި ރަށް ޑާކާގަ އެވެ.
އާސިއާން ކަޕުން ޗައިނާ އަށް ލިބުނު ފުރުސަތު ދޫކޮށްލުމުން، އެ ޖާގަ އަށް އެންމެ ބޮޑަށް މަަސައްކަތްކުރީ ލަންކާ އާއި ޕާކިސްތާން އެވެ. ޕާކިސްތާނުން އެ ޖާގަ ހޯދީ ގިނަ ގޮތްގޮތުން މަސައްކަތްކޮށްގެންނެވެ.
އާސިއާން ކަޕް ކުރިއަށްދަނީ، ދެ ޑިވިޝަނަކަށެވެ. އެއީ، ޕްރިމިއާ ޑިވިޝަންގެ އިތުރުން ޗެލެންޖް ޑިވިޝަން އެވެ.
ޗެލެންޖު ޑިވިޝަނުގެ ގްރޫޕް އޭގައި ހިމެނެނީ، ހޮންގް ކޮންގް، މިޔަންމާ އަދި ބުރުނާއީ އެވެ. އަދި، ގްރޫޕް ބީގައި އޮތީ ކެމްބޯޑިއާ، ލާއޯސް އަދި ޓިމޯ ލެސްޓޭ އެެވެ. މި ތަނުން ކޮންމެ ގްރޫޕެއްގެ އެއް ވަނަ ފައިނަލަށް ދަތުރުކުރާއިރު، ފައިނަލުން މޮޅުވާ ޓީމަކަށް 300،000 ޑޮލަރުގެ ފައިސާގެ އިނާމެއް ލިބޭނެ އެވެ. ޗެލެންޖު ޑިވިޝަނުން، ޖުމްލަ ތިން މެޗު ކުޅެގެން މުބާރާތުގެ ޗެމްޕިއަންކަން ހޯދޭނެ އެވެ.
