ރާއްޖެ އަށް ރޭގެ މެޗުގައި ޝޮޓެއް ފޮނުވާލަން ވެސް ފުރުސަތެއް ނުދީ ޗައިނާ އިން މެޗުން މޮޅުވުމަކީ ނަތީޖާގެ އިތުރުން ލިބިގެންދިޔަ އިތުރު ކާމިޔާބެއް ކަމަށް ޗަައިނާގެ ކޯޗު، ޝާއޯ ޖިއަޔީ ބުނެފި އެވެ.
ރޭގެ މެޗުގައި ޗައިނާ 3-0 އިން ރާއްޖެ ބަަލިކުރިއިރު، ތިން ގޯލު ވެސް ޖެހީ ދެ ވަނަ ހާފުގެ ފުރަތަމަ 23 މިނިޓް ތެރޭގަ އެވެ. އަދި، ޗައިނާގެ ފޯވާޑް، ވަން ޒިމިން ރޭގެ މެޗުގައި ހެޓްރިކް ހެދީ 12 މިނިޓް ތެރޭ ތިން ގޯލު ޖަހައިގެންނެވެ.
ދެ ވަނަ ހާފުގެ ލަނޑުތަކާ އެކު ޗައިނާ އިން ރާއްޖެ އަތުން މޮޅުވެއްޖެ
ޗައިނާއާ ދެކޮޅަށް ކުޅުނު އެކުވެރިކަމުގެ މެޗުން ރާއްޖެ ބަލިވީ ދެވަނަ ހާފުގައި ޗައިނާ އިން ޖެހި ލަނޑުތަކުން. ރާއްޖޭގެ ޓީމުން އާ ކުޅުންތެރިންތަކަކަށް ފުރުސަތު ދިން މި މެޗުގެ ފުރަތަމަ ހާފުގައި ރާއްޖޭގެ ޑިފެންޑަރުންނާއި ކީޕަރު ވަނީ ޗައިނާގެ ހަމަލާތައް ހުށިޔާރުކަމާއެކު ދިފާއުކޮށްފައި. އެކަމަކު، ދެ ވަނަ ހާފުގެ 23 މިނިޓް ތެރޭ ޗައިނާ އިން ތިން ގޯލު ޖެހި.
ޗައިނާ އިން މި މަހު 12 ވަަނަ ދުވަހު ތައްޔާރީތައް ފަށައިގެން، މި އިންޓަނޭޝަނަަލް ބްރޭކުގައި ކުޅޭ ހަަތަރު މެޗުގެ ތެރެއިން ފުރަތަމަ މެޗުގައި ރާއްޖެ އަތުން ލިބުނީ ފުރިހަމަ މޮޅެއް ކަމަށް ޝާއޯ ޖިއާޔީ ވަނީ ބުނެފަ އެވެ. އަދި، މެޗުގެ ކޮންޓްރޯލް އެއްކޮށް ނަގައިގެން ކުޅެ، ޒުވާން ކުޅުންތެރިންނަށް ވެސް ކޮންފިޑެންސް ލިބޭނެ ކުޅުމެއް ދެއްކުމަކީ މި މި މެޗުގައި ހާސިލްވި ކަންތައްތައް ގޮތުގައި ޝާއޯ ވަނީ ބުނެފަ އެވެ.
"ތިން ގޯލުން މޮޅުވެ، މެޗުގެ ކޮންޓްރޯލް ދަމަހައްޓައިގެން ރަނގަޅު ކުޅުމެއް އަހަރެމެން ދެއްކީ. ދެން، ކްލީންޝީޓެއް ލިބުނުއިރު، އެ މީހުންނަށް (ރާއްޖެ އަށް) ޝޮޓެއް ވެސް ފޮނުވާނުލެވި މެޗު ފުރިހަމަ ކުރެވުމަކީ އިތުރު ކާމިޔާބެއް،" ޝާއޯ ބުންޏެވެ.
އޭނާ ބުނީ ފުރަަތަމަ ހާފުގައި ގޯލެއް ޖެހޭގޮތެއްނުވުމުން، ދެ ވަނަ ހާފަށް ބަދަލުތަކެއް ގެންނަން މަޖުބޫރުވި ކަމަށާއި މެޗު ކުރިއަށް ދިޔަ ވަރަކަށް ޗައިނާގެ ފަރާތުން ޓީމެއްގެ ގޮތުގައި ފެނިގެންދިޔަ މަސައްކަތުގެ ރޭޓު ވެސް ރަނގަޅުވި ކަމަށެވެ.
ރާއްޖެ އާއި ޗައިނާ އިން މިއަދުގެ މެޗާ އެކު އިންޓަނޭޝަނަލް ފުޓްބޯޅައިގައި ހަތް ފަހަރު ބައްދަލުކޮށްފަ އެވެ. ޗައިނާ އިން ވަނީ އެ ހުރިހާ މެޗަކުން މޮޅުވެފަ އެވެ. ރާއްޖެ އަތުން އެންމެ ފުރަތަމަ މެޗުގައި، 2001 ވަނަ އަހަރު ޗައިނާ ވަނީ 10-1 އިން މޮޅުވެފަ އެވެ. އޭގެ ފަހުން، 2001 ވަނަ އަަހަރު މާލޭގައި ޗައިނާ މޮޅުވީ 1-0 އިންނެވެ. ދެން، ޗައިނާ އިން ވަނީ 2015 ގައި ރާއްޖެ އަތުން 3-0 އަދި 2016 ވަނަ އަހަރު 4-0 ބަލިވެފަ އެވެ. އެންމެ ފަހުން، 2019 އާއި 2021 ވަނަ އަހަރު ޗައިނާ އަތުން ރާއްޖެ ބަލިވީ 5-0 އިންނެވެ.
ޝާއޯ ބުނީ، ރާއްޖެ މެޗަށް ކަނޑައެޅި ޓާގެޓްތައް ހާސިލްވީ ރަނގަޅު ޕްލޭނަކާ އެކު ތައްޔާރުވުމުން ކަމަށެވެ. ދެން، އޮތީ ކުރިއަށް ހުރި މެޗުތަކުގައި މި މަސައްކަތް ތަކުރާރުކޮށް އިތުރަށް ރަނގަޅު ކުރުން ކަމަށް ޝާއޯ ފާހަގަކުރި އެވެ.
ޗައިނާ އިން މި ބްރޭކުގައި ދެން ކުޅޭނީ، ނިއު ޒީލެންޑާއި ފަލަސްތީނާއި ތަޖިކިސްތާނާ އެވެ. ރާއްޖޭން ކުޅެނީ، ކިރްގިސްތާނާއި ލެބަނަންއާ އެވެ.
