އިންޑިއާގެ ބިހާރު ސްޓޭޓުގައި ފުރާވަރުގެ އަންހެން ކުއްޖަކަށް ޖިންސީ ފުރައްސާރަކޮށް، އޭނާއާއެކު ހުރި ފިރިހެން ކުއްޖާއަށް ބަޔަކު އަނިޔާކުރާ މަންޒަރު ފެންނަ ވީޑިއޯއެއް އާންމުވުމާ ގުޅިގެން ގިނަ ބައެއްގެ ނުރުހުން އަމާޒުވެއްޖެ އެވެ.
ސްކޫލުގައި ކިޔަވާ، އުމުރުން 18 އަހަރު ނުފުރޭ މި ދެ ކުދިން ހުއްޓުވާފައިވަނީ މިދިޔަ ސެޕްޓެމްބަރު މަހުގެ 19 ވަނަ ދުވަހު ބިހާރުގެ ޖަމުއީ ޑިސްޓްރިކްޓުންނެވެ. ސޯޝަލް މީޑިއާގައި ވަރަށް ބޮޑަށް ފެތުރިފައިވާ މި ވީޑިއޯއިން ފެންނަ ގޮތުގައި، ގިނަ އަދަދެއްގެ ފިރިހެނުންތަކެއް އެ ދެ ކުދިން ވަށާލައިގެން ތިބިއިރު، އެ ތަނުން ދިޔުމުގެ ހުއްދައަށް އެދި އެ ކުދިން ދިޔައީ ތަކުރާރުކޮށް އާދޭސްކުރަމުންނެވެ.
އެ ވީޑިއޯއިން ފެންނަ ގޮތުގައި، ފިރިހެން ކުއްޖާގެ ގަމީހުގެ ގިރުވާނުގައި ހިފާ ދަމައި، އޭނާގެ މޫނުމަތީގައި ބައެއް މީހުން ޖަހަ އެވެ. ހަމައެއާއެކު، އަންހެން ކުއްޖާގެ ހަށިގަނޑުގައި އަތްލައި، ފިރިހެން ކުއްޖާ އެކަން ހުއްޓުވަން މަސައްކަތް ކުރަނިކޮށް، މީހަކު އެ އަންހެން ކުއްޖާ އުފުލާލައިގެން ގެންދެ އެވެ.
މި ހަމަލާއާ ގުޅިގެން ތުހުމަތު ކުރެވޭ ތިން މީހަކު މިހާރު ވަނީ ހައްޔަރުކޮށްފަ އެވެ. ހައްޔަރުކުރި ތިން މީހުންނަކީ ވެސް 18 އަހަރު ނުފުރޭ ކުދިންނެވެ. މި މައްސަލައިގައި ހިމެނޭ އެހެން މީހުން ހޯދުމަށްޓަކައި ފުލުހުންގެ ހާއްސަ ތަހުގީގީ ޓީމެއް މިހާރު ވަނީ އެކުލަވާލާފަ އެވެ.
ބަލަން އުނދަގޫ މި ވީޑިއޯއާ ގުޅިގެން، ފުރާވަރުގެ ދެ ކުދިންނަށް ކުރި ފުރައްސާރައާ މެދު އާންމުންގެ ބޮޑު ކަންބޮޑުވުމެއް ވަނީ އުފެދިފަ އެވެ. މީގެ އިތުރުން، ބިހާރުގައި އަންހެނުންނާއި އަންހެން ކުދިންގެ ރައްކާތެރިކަމާ މެދު ކުރެވޭ ބަހުސްތައް އަލުން ވަރުގަދަވެ، ސްޓޭޓް ސަރުކާރުގެ އިދާރާތަކުން މިފަދަ ކަންކަމުގައި އަމަލުކުރާ ގޮތާ މެދު ވެސް ވަނީ ސުވާލު އުފެދިފަ އެވެ.
އާންމުންގެ ނުރުހުން އިތުރަށް ބޮޑުވެގެން ދިޔައީ، ބިހާރުގެ މިނިސްޓަރު ޝްރަވަން ކުމާރު، މިފަދަ "މަދު ހާދިސާތަކަކީ ހިނގަމުންދާނެ ކަންކަން" ކަމަށް ވިދާޅުވެ، ސަރުކާރުން އެކަންކަން ބަލަމުންދާ ކަމަށް ވިދާޅުވުމާ ގުޅިގެންނެވެ.
"ދުނިޔެއަކީ ކުށްތަކުން މުޅިން ސަލާމަތްވެފައިވާ ތަނެއް ނޫން،" ކަމަށް ވިދާޅުވެ، މިކަމުގައި ޒިންމާވާ މީހުންނަށް ފިލައިގެން ނުދެވޭނެ ކަމަށާއި އެ މީހުންނާ މެދު ހަރުކަށި ފިޔަވަޅު އަޅާނެ ކަމަށް އޭނާ ވިދާޅުވި އެވެ.
ފުލުހުން ބުނި ގޮތުގައި މި ހާދިސާ ހިނގާފައިވަނީ މިދިޔަ ހޮނިހިރު ދުވަހުގެ ރޭގަނޑު އެވެ. ނަމަވެސް މިކަން ފަޅާއެރީ ހަމަލާގެ ވީޑިއޯ ސޯޝަލް މީޑިއާގައި އާންމުވި ހޯމަ ދުވަހު އެވެ.
ގްރޭޑް 10 އެއްގައި ކިޔަވާ މި ދެ ކުދިންނަކީ އެއް ކޯޗިން ސެންޓަރަކަށް ދާ ދެ ކުދިން ކަމަށާއި، އެ ސަރަހައްދަށް ދިޔައީ ކްލާސްތައް ނިންމުމަށްފަހު ފޮޓޯ ނެގުމަށް ކަމަށް ފުލުހުން މައުލޫމާތު ދެއެވެ.
ޖަމުއީގެ ފުލުހުންގެ ވެރިޔާ ބިޝްވަޖީތު ދަޔާލް ވިދާޅުވީ، އެ ދެ ކުދިންގެ ތެރެއިން އެކަކު ވެސް ފުރަތަމަ މި ހާދިސާ ރިޕޯޓްކޮށްފައި ނުވާ ކަމަށެވެ. ފުލުހުން ތަހުގީގު ފެށީ ވީޑިއޯ އާންމުވުމާ ގުޅިގެން ކަމަށާއި، އެ ކުދިން ހޯދީ ވީޑިއޯއިން ފެންނަން އޮތް އުޅަނދެއްގެ ރެޖިސްޓްރޭޝަން ނަންބަރު ބޭނުންކޮށްގެން ކަމަށް އޭނާ ވިދާޅުވި އެވެ.
އޭގެ ފަހުން އެ ދެ ކުދިންގެ ބަޔާން ނަގައި، އަންހެން ކުއްޖާގެ ފަރާތުން ހުށަހެޅި ލިޔުމުން ދިން ޝަކުވާއަކާ ގުޅިގެން މިހާރު ވަނީ ރަސްމީކޮށް މައްސަލަ ރެޖިސްޓްރީކޮށްފަ އެވެ.
މި މައްސަލަ ރެޖިސްޓްރީކޮށްފައިވަނީ ކުޑަކުދިންނަށް ކުރާ ޖިންސީ ގޯނާއިން ރައްކާތެރިކޮށްދޭ އިންޑިއާގެ ހަރުކަށި ގާނޫނު ކަމަށްވާ "ޕޮކްސޯ" އެކްޓުގެ ދަށުންނެވެ.
