ރާއްޖޭގެ ރިސޯޓްތަކުގެ މެދުގައި ބާއްވާ އެންމެ ފޯރިގަދަ ފުޓްސަލް މުބާރާތް، ރިސޯޓް ލީގުގެ ސައުތު މާލެ ޒޯން 2026 ގެ ޕްލޭއޮފް މެޗުތަކުން މޮޅުވެ، ޖޭޑަބްލިއު މެރިއަޓް، ސަން ސިޔާމް އޮޅުވެލި، އޯޒެން ލައިފް މާދޫ އަދި އަނަންތަރާ ދިގު މޯލްޑިވްސް ރިސޯޓް ކުއާޓާ ފައިނަލްގެ ފަހު ޖާގަތައް ހޯދައިފި އެވެ.
މުބާރާތުގެ ފޯމެޓް ރޭވިފައި އޮތްގޮތުން، 12 ޓީމު ވާދަކުރާ ސައުތު މާލެ ޒޯން ކުރިއަށްދަނީ ހަތަރު ގްރޫޕަކަށެވެ. ކޮންމެ ގްރޫޕެއްގެ ވެސް އެއް ވަނަ ޓީމަށް ކުއާޓާ ފައިނަލުގެ ސީދާ ޖާގައެއް ލިބޭނެ އެވެ. ދެން، ކޮންމެ ގްރޫޕެއްގައި ހިމެނޭ އަނެއް ދެ ޓީމު ކުޅެން ޖެހޭނީ ޕްލޭއޮފް ބުރުގަ އެވެ. އަދި، ޕްލޭއޮފުން މޮޅުވާ ޓީމުތަކަށް ކުއާޓާ ފައިނަލްގެ ފަހު ހަތަރު ޖާގަ ލިބޭނެ އެވެ.
ހަތަރު ގްރޫޕްގެ އެއް ވަނައިގެ ގޮތުގައި ކުއާޓާ ފައިނަލަށް ދިޔައީ، ވެލައްސަރު މޯލްޑިވްސް، ހާޑް ރޮކް ހޮޓެލް މޯލްޑިވްސް، ދި މެރީނާ އަދި ބޮލިފުށި އެވެ.
ޕްލޭއޮފް ފުރަތަމަަ މެޗުގައި، ވަލްޑޯފް އަސްޓޯރިއާ މޯލްޑިވްސް އިތާފުށި އަތުން މެރިއޮޓް މޮޅުވީ 1-0 އިންނެވެ. މި މެޗުގައި ފެނިގެންދިޔަ ހަމައެކަނި ލަނޑު ޖެހީ މެރިއޮޓް ޓީމުގެ މުނާޒް އެވެ.
އޮޅުވެލިން ޕްލޭއޮފް ދެ ވަނަ މެޗުގައި ސައި ލެގޫން މޯލްޑިވްސް އަތުން މޮޅުވިއިރު، އޮޅުވެލީގެ ލަނޑުތައް ޖެހީ ވިގާމް އެވެ.
ޕްލޭއޮފް ތިން ވަނަ މެޗުގައި އޯޒެން ލައިފް މާދޫ އާއި އެސްއޯ/މޯލްޑިވްސް ވަނީ 3-3 އިން އެއްވަރުވެފަ އެވެ. ޕެނަލްޓީ އަށް ފަހު، މާދޫ ވަނީ 7-5 އިން މޮޅުވެފަ އެވެ. އެސްއޯ/ މޯލްޑިވްސް އަށް މި މެޗުގައި ލަނޑުތައް ޖަހައިދިނީ ވިޝާމް ދެ ގޯލާއި އިސްމާއިލް އެވެ. މާދޫގެ ލަނޑުތައް ޖެހީ މުއްސަފު ދެ ލަނޑުގެ އިތުރުން، އެސްއޯ/މޯލްޑިވްސްގެ އަނޫސް އަތުން ބައިކޮޅަށް ވަން ގޯލެކެވެ.
އަނަންތަރާ ދިގު އިން ޕްލޭއޮފްގެ ފަހު މެޗުގައި ރަށް ގިލި މޯލްޑިވްސް އަތުން މޮޅުވީ 3-0 އިންނެވެ. މި މެޗުގައި އަނަންތަރާ ދިގުގެ ލަނޑުތައް ޖެހީ އަހުމަދު އާއި ލައުހު އަދި ޝުޖާއު އެވެ.
ސައުތު މާލެ ޒޯންގެ މެޗުތައް އޮޅުވެލީގައި ކުރިއަށްދާއިރު، ކުއާޓާ ފައިނަލް މެޗުތައް އޮތީ މާދަމާ އާއި އާދިއްތަ ދުވަހު އެވެ. ކުއާޓާގައި ވެލައްސަރުން ކުޅޭނީ މާދޫއާ އެވެ. ހާޑް ރޮކް އިން އަނަންނަތަރާ ދިގުއާ ވާދަކުރާއިރު، ދި މެރީނާ އިން މެރިއޮޓްއާ ކުޅޭނެ އެވެ. އަދި، ބޮލިފުށިން ބައްދަލުުކުރާނީ އޮޅުވެލިއާ އެވެ.
މިދިޔަ އަހަރުގެ ފައިނަލުުގައި ސައި ލެގޫން ބަލިކޮށްފައި މި ޒޯންގެ ތަށި ހޯދީ ވަލްޑޯފުންނެވެ. ފުރިހަމަ ވަގުތު ހަމަވިއިރު ވަނީ 1-1 އިން އެއްވަރުވެފަ އެވެ. ނަތީޖާ ނެރެން ޕެނަލްޓީ ޖެހިއިރު، ވަލްޑޯފުން މޮޅުވީ 5-4 އިންނެވެ.
