ރާއްޖޭގެ ރިސޯޓްތަކުގެ މެދުގައި ބާއްވާ އެންމެ ފޯރިގަދަ ފުޓްސަލް މުބާރާތް، ރިސޯޓް ލީގުގެ ސައުތު މާލެ ޒޯން 2026 ގެ ކުއާޓާ ފައިނަލުގެ ފަހު ދެ ޖާގަ، ދި މެރީނާ އާއި ބޮލިފުށިން ހޯދައިފި އެވެ.
މުބާރާތުގެ ފޯމެޓް ރޭވިފައި އޮތްގޮތުން، 12 ޓީމު ވާދަކުރާ ސައުތު މާލެ ޒޯން ކުރިއަށްދަނީ ހަތަރު ގްރޫޕަކަށެވެ. ކޮންމެ ގްރޫޕެއްގެ ވެސް އެއް ވަނަ ޓީމަށް ކުއާޓާ ފައިނަލުގެ ސީދާ ޖާގައެއް ލިބޭނެ އެވެ. ދެން، ކޮންމެ ގްރޫޕެއްގައި ހިމެނޭ އަނެއް ދެ ޓީމު ކުޅެން ޖެހޭނީ ޕްލޭއޮފް ބުރުގަ އެވެ. އަދި، ޕްލޭއޮފުން މޮޅުވާ ޓީމުތަކަށް ކުއާޓާ ފައިނަލްގެ ފަހު ހަތަރު ޖާގަ ލިބޭނެ އެވެ.
ގްރޫޕް ސްޓޭޖުގެ މެޗުތައް ނިމިފައިވާއިރު، ކުއާޓާ ފައިނަލުގެ ސީދާ ޖާގަތައް ލިބުނު ހަތަރު ޓީމަކީ، ވެލައްސަރު މޯލްޑިވްސް، ހާޑް ރޮކް ހޮޓެލް މޯލްޑިވްސް، ދި މެރީނާ އަދި ބޮލިފުށި އެވެ.
ގްރޫޕް ސީގެ ފަހު މެޗުގައި އިއްޔެ ހަވީރު، އައްމަޑޭ ޖެހި ގޯލުން ދި މެރީނާ އިން ވަނީ 1-0 އިން ރަށް ގިލި މޯލްޑިވްސް ބަލިކޮށްފަ އެވެ. މި ނަތީޖާއާ އެކު މި ގްރޫޕްގެ އެއް ވަނަ އަށް ދިޔަ މެރީނާ އާއި ދެ ވަނަ ހޯދި މާދޫ އަށް ދެ މެޗުން ލިބުނީ ހަތަރު ޕޮއިންޓެވެ. ދެ ޓީމު ވަނީ ފައިދާ ގޯލާއި ޖެހި ގޯލާއި ކޮޅަށް ވަން ގޯލު ވެސް އެއްވަރުވެފަ އެވެ. އެހެންވެ ފެއާ ޕްލޭ އަށް ބަލަން ޖެހުނުއިރު، ކުރި ލިބުނީ ދި މެރީނާ އަށެވެ. މި ގްރޫޕްގެ ފުލަށް ދިޔަ ރަށް ގިލި އަށް ޕޮއިންޓެއް ނުލިބެ އެވެ.
އެސްއޯ/މޯލްޑިވްސް އަށް އިއްޔެ އަނަންތަރާ ދިގު ބަލިކޮށްގެން، ކުއާޓާ ފައިނަލުގެ ޖާގަ ހޯދުމުގެ ފުރުސަތު އޮތެވެ. އެކަމަކު، އިއްޔެ، އެސްއޯ/މޯލްޑިވްސް ވަނީ އަނަންތަރާ ދިގު އަތުން 4-2 އިން ބަލިވެފަ އެވެ. މި މެޗުގައި، އަނަންތަރާގެ ލައުހު ހެޓްރިކެއް ހެދިއިރު، އަނެއް ލަނޑަކީ އެސްއޯ/މޯލްޑިވްސްގެ ވިޝާމް އަތުން ބައިކޮޅަށް ވަން ގޯލެކެވެ. މި މެޗުގައި އެސްއޯ/މޯލްޑިވްސްގެ ލަނޑުތައް ޖެހީ، އިސްމާއިލް ދެ ލަނޑެވެ.
ސަން ސިޔާމް އޮޅުވެލީގައި ސައުތު މާލެ ޒޯންގެ މެޗުތައް ކުރިއަށްދާއިރު، މިއަދާއި މާދަމާ ކުޅޭނީ ޕްލޭއޮފް މެޗުތަކެވެ. އެ ގޮތުން، މިއަދު ފުރަތަމަ މެޗުގައި ވަލްޑޯފުން ކުޅޭނީ ޖޭޑަބްލިއު މެރިއަޓްއާ އެވެ. އަދި، ދެ ވަނަ މެޗުގައި، ސައި ލެގޫން އިން އޮޅުވެލިއާ ކުޅޭނެ އެވެ. އަދި، މާދަމާ، ފުރަތަމަ މެޗުގައި، މާދޫން އެސްއޯ/މޯލްޑިވްސްއާ ބައްދަލުކުރާއިރު، ޕްލޭއޮފް ފަހު މެޗުގައި، ރަށް ގިލިން ނުކުންނާނީ އަނަންތަަރާ ދިގު އެވެ.
