ރައީސް މުހައްމަދު މުއިއްޒުގެ އިރުޝާދަށް ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ނައިބުރައީސުންނަށް ވަކި ބަޔަކު ހޮވަން އަންގަމުންދާކަން އެނގިއްޖެ އެވެ.
ޕީއެންސީގެ ނައިބުރައީސަކަށް ވާދަކުރައްވާ ކެންޑިޑޭޓަކު އަދަދު އަށް ވިދާޅުވީ ވަކި ފެކްޝަންތަކެއް ހަދައިގެން ކޮންގްރެސްގައި ވޯޓުލެވޭ މީހުން ވަކި ގޮތަކަށް ވޯޓު ދޭން އަންގަމުންދާ ކަމަށެވެ. އެކަން ކުރައްވަނީ މުއިއްޒުގެ އިރުޝާދުގެ ދަށުން ކަމަށް އޭނާ ވިދާޅުވި އެވެ.
މައުލޫމާތު ލިބޭ ގޮތުގައި ޕީއެންސީ ތެރޭގައި އުފެދިފައިވާ އެއް ފެކްޝަނުން މަސައްކަތް ކުރަމުންދަނީ ނައިބުރައީސަކަށް ކުރިމަތިލައްވާފައިވާ އެލްޖީއޭގެ ސީއީއޯ އަދި ޕީއެންސީގެ މިހާރުގެ ނައިބުރައީސް މުހައްމަދު ނިމާލް އާއި މާފަންނު މެދު ދާއިރާގެ މެންބަރު އަސްމާ ރަޝީދު ކަޓުވާލުމަށެވެ.
ޕީއެންސީގެ ނައިބުރައީސަކަށް ކުރިމަތިލައްވާފައިވާ އަސްމާގެ ދަރިކަލުން ރައީސް އޮފީހުގެ ތަރުޖަމާނު މުހައްމަދު ހުސައިންް ޝަރީފް (މުންދު) ކަޓުވާލުމަށް ވެސް ފެކްޝަނަކުން މަސައްކަތް ކުރަމުންދާ ކަމަށް މައުލޫމާތު ލިބިފައިވެ އެވެ.
މި ނޫހަށް އެނގިފައިވާ ޕީއެންސީގެ ނައިބުރައީސްކަމުގެ މަގާމަށް ހޮވަން މުއިއްޒު ބޭނުންވެލައްވާ ބޭފުޅުންގެ ލިސްޓުގައި ނުހިމެނެނީ އަސްމާ އަދި ނިމާލްގެ ނަމެވެ. އެގޮތުން މުއިއްޒުގެ އިރުޝާދަށް އެކަން ވޯޓުލާ މީހުންނަށް ދަނީ އެކި ގޮތްގޮތުން އަންގަމުންނެވެ.
ޕީއެންސީގެ ކޮންގްރެސްގައި ވޯޓުލުމަށް މުއިއްޒު އެޕްރޫވް ކުރެއްވި 300 އަށް ވުރެ ގިނަ މެންބަރުން ވަނީ މާލެ ގެނެސްފަ އެވެ. އެ މެންބަރުން ގެނައީ މުއިއްޒު ބޭނުންވާ ބަޔަކު ހޮވުމަށް ކަމަށްވެސް މައުލޫމާތު ލިބިފައިވެ އެވެ.
ޕީއެންސީގެ ކޮންގްރެސްގައި ހަ ނައިބު ރައީސަކު އިންތިހާބު ކުރާއިރު، އަށް ބޭފުޅަކު ވަނީ ނައިބު ރައީސްގެ މަގާމަށް ކުރިމަތިލައިފަ އެވެ.
ނައިބުރައީސުންނަށް ވާދަކުރައްވަނީ ނިމާލް އާއި އަސްމާ އަދި މުންދުުގެ އިތުރުން ފިޝަރީޒް މިނިސްޓަރު އަހްމަދު ޝިޔާމް އާއި ބާރަށު ދާއިރާގެ މެންބަރު އިބްރާހިމް ޝުޖާއު އާއި އިކޮނޮމިކް މިނިސްޓަރު މުހައްމަދު ސައީދު އާއި ޔޫތު މިނިސްޓަރު އަބްދުﷲ ރާފިއު އަދި ނިލަންދޫ ދާއިރާގެ މެންބަރު ފާތިމަތު ސައުދާ އެވެ.
ޕީއެންސީގެ ކޮންގްރެސްގައި އިންތިހާބުކުރާ މަގާމުތަކަށް މީހުން ހޮވަނީ މޯބައިލް އެޕްލިކޭޝަނެއް މެދުވެރިކޮށް ވޯޓުލައިގެންނެވެ. އެކަމާ ގުޅިގެން ބައެއް ކެންޑިޑޭޓުން ވަނީ ކަންބޮޑުވުން ފާޅުކޮށްފަ އެވެ.
ސޯޝަލް ސެންޓަރުގައި މިއަދު ފެށި ޕީއެންސީގެ ކޮންގްރެސް ހަތަރު ދުވަހަށް ދެމިގެންދާނެ އެވެ. ޕާޓީއަށް ގެންނަ ބަދަލުތަކަށް ވޯޓުދިނުމާއި މުހިންމު ގުނަވަންތަކަށް މެންބަރުން ހޮވުމަށް ބާއްވާ ވޯޓުލުން ކުރިއަށްގެންދާނެ އެވެ.
