އެމެރިކާގެ ރައީސް ޑޮނަލްޑް ޓްރަމްޕް، ރަޝިޔާގެ ރައީސް ވްލަޑިމިއަ ޕޫޓިންއަށް އަންގާރަ ދުވަހު ފޯނުން ގުޅުއްވައި، ޔޫކްރެއިން ހަނގުރާމަ އަވަހަށް ނިންމަވަން ބޭނުންފުޅުވާ ކަމަށް ވިދާޅުވެއްޖެ އެވެ.
ރަޝިއާ ސަރުކާރުން ބުނީ، ހަނގުރާމަ ނިމުމަކަށް އައުމުން އެމެރިކާ އާއި ރަޝިޔާގެ ގުޅުން ފުރިހަމައަށް އިއާދަކުރުމުގެ ފުރުސަތު ލިބިގެންދާނެ ކަމަށް ޓްރަމްޕް ވިދާޅުވި ކަމަށެވެ. އަދި ޕޫޓިން ވަނީ ޓްރަމްޕްގެ މި ވިސްނުމަށް ތާއީދުކުރައްވާފަ އެވެ.
އެއް ގަޑިއިރަށް ދެމިގެންދިޔަ މި ފޯނު ކޯލު ކުރައްވާފައިވަނީ، ސުލްހައިގެ ވާހަކަތައް އަލުން ފެށުމަށްޓަކައި އެމެރިކާގެ މަންދޫބުން ކަމަށްވާ ސްޓީވް ވިޓްކޮފް އާއި ޖެރެޑް ކުޝްނާ މިދިޔަ ހަފުތާ ބަންދުގައި މޮސްކޯ އާއި ކީވްއަށް ކުރެއްވި ޒިޔާރަތަށް ފަހުގަ އެވެ.
މި މަންދޫބުން ކުރެއްވި ދަތުރުގައި ބޮޑު ކުރިއެރުމެއް ލިބިފައިވާކަން ހާމަވެފައި ނުވި ނަމަވެސް، ރަޝިޔާ، ޔޫކްރެއިން އަދި އެމެރިކާ ބައިވެރިވާ ތިން ފަރާތުގެ މަޝްވަރާތައް އަލުން ފެށުމުގެ ފުރުސަތު އޮތްކަން އެ ބޭފުޅުން ފާހަގަކުރެއްވި އެވެ.
ކްރެމްލިންގެ އޮފިޝަލް ޔޫރީ އުޝަކޯވް ނޫސްވެރިންނަށް މައުލޫމާތު ދެއްވަމުން ވިދާޅުވީ، އެމެރިކާގެ މަންދޫބުން ކުރެއްވި މަސައްކަތް ދެ ގައުމުގެ ވެރިންވެސް ފާހަގަކުރެއްވީ "އެދެވޭ" ކަމެއްގެ ގޮތުގައި ކަމަށެވެ. އަދި ހަނގުރާމަ ހުއްޓުވުމަށް އެމެރިކާއަށް ކުރެވިދާނެ ކަންކަމާ ބެހޭގޮތުން ޕޫޓިން، ޓްރަމްޕަށް ލަފާދެއްވައި، ހަނގުރާމައިގެ މައިދާނުގެ މިހާރުގެ ހާލަތު އޮތްގޮތް އޮޅުންފިލުވައިދެއްވި ކަމަށްވެސް އޭނާ ވިދާޅުވި އެވެ.
އުޝަކޯވް ވިދާޅުވި ގޮތުގައި، ހަނގުރާމަ ވީހާވެސް އަވަހަކަށް ނިންމަވަން ބޭނުންފުޅުވާކަން ޓްރަމްޕް ވަނީ ވަރަށް ސާފުކޮށް ވިދާޅުވެފަ އެވެ.
"ވީހާވެސް އަވަހަކަށް މި ހަނގުރާމަ ނިންމުމަކީ މުހިންމު ކަމެއްކަން ޑޮނަލްޑް ޓްރަމްޕް ވަނީ ފާހަގަކުރައްވާފައި. އެކަމުގެ ސަބަބުން އެމެރިކާ އާއި ރަޝިޔާގެ ގުޅުން ފުރިހަމައަށް އިއާދަކުރުމަށް ވަރަށް ބޮޑެތި ފުރުސަތުތަކެއް ވަގުތުން ހުޅުވިގެންދާނެ ކަމަށް ވިދާޅުވި،" އުޝަކޯވް ވިދާޅުވި އެވެ.
އުޝަކޯވް އިތުރަށް ވިދާޅުވީ، މިކަމުގެ ސަބަބުން ވިޔަފާރި އާއި އިގްތިސާދީ ގުޅުންތަކަށް ބޮޑު ކުރިއެރުމެއް ލިބި، ދެ ގައުމަށްވެސް ބޮޑެތި ފައިދާތަކެއް ކުރާނެ ކަމަށް ޓްރަމްޕް ދެކެވަޑައިގަންނަވާ ކަމަށެވެ. އަދި ޓްރަމްޕްގެ ރިޔާސީ ދައުރުގައި މިކަމަށް ހައްލެއް ހޯއްދަވަން ބޭނުންފުޅުވާ ކަމަށާއި، ރައީސް ޕޫޓިން އެކަމަށް ތާއީދުކުރެއްވި ކަމަށްވެސް އޭނާ ވިދާޅުވިއެވެ.
ދެވަނަ ބޮޑު ހަނގުރާމައަށްފަހު ޔޫރަޕްގައި ހިނގަމުންދާ އެންމެ ނުރައްކާތެރި މި ހަނގުރާމަ ހުއްޓާލުމާ މެދު ރަޝިޔާ އާއި ޔޫކްރެއިންގެ ވިސްނުން އަދިވެސް ހުރީ ވަރަށް ތަފާތުކޮށެވެ. އަދި ފަހަކަށް އައިސް ދެ ގައުމުންވެސް ވަނީ ހަމަލާތައް ވަރުގަދަކޮށްފަ އެވެ. ޓްރަމްޕްގެ މަންދޫބުން ޒިޔާރަތްކުރުމުގެ ކުރިންވެސް ޕޫޓިން ހުންނެވީ އިރުމަތީ ޔޫކްރެއިންގެ ޑޮނެޓްސްކް ސަރަހައްދު އެއްކޮށް ހިފުމުގެ އަޒުމުގައެވެ. ނަމަވެސް ޔޫކްރެއިންގެ ސަރުކާރުން ބުނަމުންދަނީ އެމީހުންގެ އަތުގައި ހުރި ހުރިހާ ހަތިޔާރެއް ބޭނުންކޮށްގެންވެސް ރަޝިޔާގެ އެ މަސައްކަތަށް ހުރަސްއަޅާނެ ކަމަށެވެ.
