ރާއްޖޭގެ މީހުން ދިރިއުޅޭ ހުރިހާ ރަށެއްގައި ނަސޭހަތުގެ ބޯޑު ހަރުކުރުން، ބޮޑު މަޝްރޫއުއެއްގެ ގޮތުގައި އިއުލާނުކޮށްފި އެވެ.
މިއަދު އޮތް ނޫސްވެރިންގެ ބައްދަލުވުމުގައި ރައީސް މުހައްމަދު މުއިއްޒު ވިދާޅުވީ އެ މަޝްރޫއު އެއް އަހަރު ދުވަހުގެ މުއްދަތަކަށް ކުރިއަށް ގެންދާނެ ކަމަށެވެ.
"މިހާރު މި އުޅެނީ ރާއްޖޭގެ ހުރިހާ ރަށެއްގައި، ނަސޭހަތުގެ ބޯޑު ބެހެއްޓުމުގެ މަޝްރޫއުއެއް ސަރުކާރުން ފަށަން، މި ދެންނެވި ތާރީހުގައި 13 ސެޕްޓެމްބަރުގައި ފަށާނީ އެއް އަހަރު ދުވަހުގެ މަޝްރޫއުއެއް އިރާދަކުރެއްވިއްޔާ،" މުއިއްޒު ވިދާޅުވި އެވެ.
އެ މަޝްރޫއުގެ ދަށުން މީހުން ދިރިއުޅޭ ރަށްރަށުގެ އާންމު ހުރިހާ ސަރަހައްދެއްގައި ނަސޭހަތުގެ ބޯޑުތަކާއި ޒިކުރުގެ ބޯޑުތައް ބަހައްޓާނެ ކަމަށް މުއިއްޒު ވިދާޅުވި އެވެ.
އޭގެ ބޭނުމަކީ ހިނގާފައި ދާ މީހުންނަށާއި ވެހިކަލްތަކުގައި ދުއްވާފައި ދާ މީހުންނަށް އެ ބޯޑުތައް ފެންނަ ގޮތަށް ބަހައްޓައިގެން ރަނގަޅު ގޮތް މީހުންނަށް ހަނދާން ކޮށްދިނުން ކަމަށް އެމަނިކުފާނު ވިދާޅުވި އެވެ.
"އޭގެ ބޭނުމަކީ ހިނގާފައި ދާއިރު، ދުއްވާފައި ދާއިރު ފެންނަން، މި މެސެޖުތައް. ހަނދާންކުރަން، ހަނދާންކޮށްދިނުމަކީ ދީނުގައި އޮންނަ ގޮތް. އެއީ ހަނދާންވީމާ ހިތްވަރެއް ލިބޭނެ ރަނގަޅަށް ކަންތައްތައް ކުރަން، އެހެންވީމާ ބޮޑު މަޝްރޫއުއެއް އެބަ ފަށަން،" މުއިއްޒު ވިދާޅުވި އެވެ.
އެ މަޝްރޫއު ކުރިއަށް ގެންދާނީ ސަރުކާރު ބަޖެޓުންނާއި އާންމު ރައްޔިތުންގެ އިތުރުން މަދަނީ ޖަމިއްޔާ ޖަމާއަތްތަކުގެ އެހީތެރިކަމާއެކު ކަމަށް ވެސް އެމަނިކުފާނު ވިދާޅުވި އެވެ.
