ރާއްޖޭގެ ރިސޯޓްތަކުގެ މެދުގައި ބާއްވާ އެންމެ ފޯރިގަދަ ފުޓްސަލް މުބާރާތް، ރިސޯޓް ލީގުގެ ސައުތު މާލެ ޒޯން 2026 ގެ ކުއާޓާ ފައިނަލުން ވެލައްސަރު މޯލްޑިވްސް އާއި ހާޑް ރޮކް ހޮޓެލް މޯލްޑިވްސް ޖާގަ ހޯދައިފި އެވެ.
މުބާރާތުގެ ފޯމެޓް ރޭވިފައި އޮތްގޮތުން، 12 ޓީމު ވާދަކުރާ ސައުތު މާލެ ޒޯން ކުރިއަށްދަނީ ހަތަރު ގްރޫޕަކަށެވެ. ކޮންމެ ގްރޫޕެއްގެ ވެސް އެއް ވަނަ ޓީމަށް ކުއާޓާ ފައިނަލުގެ ސީދާ ޖާގައެއް ލިބޭނެ އެވެ. ދެން، ކޮންމެ ގްރޫޕެއްގައި ހިމެނޭ އަނެއް ދެ ޓީމު ކުޅެން ޖެހޭނީ ޕްލޭއޮފް ބުރުގަ އެވެ. އަދި، ޕްލޭއޮފުން މޮޅުވާ ޓީމުތަކަށް ކުއާޓާ ފައިނަލްގެ ފަހު ހަތަރު ޖާގަ ލިބޭނެ އެވެ.
ސަން ސިޔާމް އޮޅުވެލީގައި މުބާރާތުގެ މެޗުތައް ކުރިއަށްދާއިރު، އިއްޔެ ގްރޫޕް އޭގެ ފަހު މެޗުގައި، ވެލައްސަރުން ވަނީ 4-2 އިން ވަލްޑޯފް އަސްޓޯރިއާ މޯލްޑިވްސް އިތާފުށި ބަލިކޮށްފަ އެވެ. ވެލައްސަަރުގެ ލަނޑުތައް ޖެހީ، ޝައިބާން އާއި ޝާއިންގެ އިތުރުން އިމްރާން ދެ ގޯލެވެ. ވަލްޑޯފްގެ ލަނޑުތައް ޖެހީ އަރުސަމް އާއި ރަފާހު އެވެ.
މި ގްރޫޕްގެ މެޗުތައް ނިމުނުއިރު، އެއް ވަނަ ހޯދައި ކުއާޓާގެ ސީދާ ޖާގައެއް ހޯދި ވެލައްސަރަށް ވަނީ ހަތަރު ޕޮއިންޓް ލިބިފަ އެވެ. ދެ ވަނައިގައި އޮތް ވަލްޑޯފަށް ތިން ޕޮއިންޓް ލިބުނުއިރު، ތިން ވަަނަ އަށް ދިޔަ އޮޅުވެލިގެ އޮތީ އެއް ޕޮއިންޓެވެ. ވަލްޑޯފާއި އޮޅުވެލިން ދެން ކުޅޭނީ ޕްލޭއޮފް ބުރުގަ އެވެ.
ގްރޫޕް ބީގައި ހާޑް ރޮކުން 5-3 އިން ސައި މޯލްޑިވްސް ލެގޫން ބަލިކޮށް، ވަނީ ގްރޫޕް ބީން އެއް ވަނަ ހޯދައި ކުއާޓާގެ ސީދާ ޖާގަ ހޯދައިފަ އެެވެ. އެއީ، ދެ މެޗުން ހަތަރު ޕޮއިންޓާ އެކު އެވެ. މި ގްރޫޕްގެ ދެ ވަނަ އަށް ދިޔަ ސައި ލެގޫން އަށް ތިން ޕޮއިންޓް ލިބުނުއިރު، ތިން ވަނައިގައި ނިންމި ޖޭޑަބްލިއު މެރިއަޓް އަށް ލިބުނީ އެއް ޕޮއިންޓެވެ. ސައި ލެގޫން އާއި މެރިއަޓް ދެން ނުކުންނާނީ ޕްްލޭއޮފަށެވެ.
ހާޑް ރޮކަށް އިއްޔެގެ މެޗުގަައި މަޝީދު ދެ ގޯލު ޖަހައިދިންއިރު، އަނެއް ލަނޑުތައް ޖެހީ، ތަޝްމީން (ތައްތި)، އަޝްރަފް އަދި ސުހައިލް އެވެ. ސައި ލެގޫންގެ ލަނޑުތައް ޖެހީ ސަރޭ އާއި ގުރޭ އަދި ފާތިހު އެވެ.
ޕްލޭއޮފްގެ ފުރަތަމަ ދެ މެޗަށް ބަލާއިރު، ވަލްޑޯފުން ކުޅެނީ ޖޭޑަބްލިއު މެރިއަޓްއާ އެވެ. އަދި، ސައި ލެގޫން އިން އޮޅުވެލިއާ އެވެ.
މުބާރާތުގައި މިއަދު ހަވީރު އޮތީ ގްރޫޕް ސީ އާއި ގްރޫޕް ޑީގެ ފަހު މެޗެވެ. ގްރޫޕް ސީގެ ފަހު މެޗުގައި ރައް ގިލިން ކުޅެނީ ދި މެރީނާއާ އެވެ. އަދި، ގްރޫޕް ޑީގެ ފަހު މެޗުގައި، އަނަންތަރަ ދިގު މޯލްޑިވްސް ރިސޯޓުން ނުކުންނާނީ އެސްއޯ/މޯލްޑިވްސްއާ ދެކޮޅަށެވެ. ގްރޫޕް ސީގެ ތާވަލުގެ ކުރީގައި މާދޫ އޮތީ ދެ މެޗުން ހަތަރު ޕޮއިންޓާ އެކު އެވެ. ދެ ވަނައިގައި އޮތް ދި މެރީނާ އަށް އެއް މެޗުން ޕޮއިންޓެއް އަަދި ތިން ވަނައިގައި އޮތް ރައް ގިލި އަށް އެއް މެޗު ކުޅުނުއިރު ޕޮއިންޓެއް ނުލިބެ އެވެ. ގްރޫޕް ޑީ އަށް ބަލާއިރު، އެއް ވަނައިގައި އޮް ބޮލިފުއްޓަށް ދެ މެޗުން ހަތަރު ޕޮއިންޓް އަަދި، ދެ ވަނައިގައި އޮތް އެސް/އޯ މޯލްޑިވްސް އަށް އެއް މެޗުން ޕޮއިންޓެއް ލިބިފައިވެ އެވެ. އަދި، ފުލުގައި އޮތް އަނަންތަރާ އަށް އެއް މެޗުން ޕޮއިންޓެއް ލިބިފައި ނެތެވެ.
