ޒެމްބިއާގެ ރިޔާސީ އިންތިހާބާ މެދު ހިޔާލުތަފާތުވުންތަކެއް އުފެދި، އިދިކޮޅު މައި ކެންޑިޑޭޓް ދައުލަތަށް ހިޔާނާތްތެރިވުމުގެ ކުށުގައި ހައްޔަރުކޮށްފައި ވަނިކޮށް، އެ ގައުމުގެ ރައީސް ހަކައިންޑޭ ހިޗިލޭމާ ދެވަނަ ދައުރަކަށް މިއަދު ހުވާކުރައްވައިފި އެވެ.
އިގްތިސާދު ހަމަޔަކަށް އެޅުއްވުމުގެ ކާމިޔާބީއާ އެކު، އޮގަސްޓް 13 ވަނަ ދުވަހު ބޭއްވި އިންތހާބު ހިޗިލޭމާ ކާމިޔާބު ކުރެއްވީ ރަސްމީ ނަތީޖާ ދައްކާ ގޮތުން ވޯޓުގެ 60 އިންސައްތަ ހޯއްދަވައިގެންނެވެ. ނަމަވެސް 38 އިންސައްތަ ވޯޓާ އެކު ދެވަނަ އަށް ދިޔަ ބްރަޔަން މުންޑުބިލޭ ވަނީ އިންތިހާބުގެ ނަތީޖާ އޮޅުވާލާފައިވާ ކަމަށް ތުހުމަތު ކުރައްވާފަ އެވެ.
އިންތިހާބުގެ ނަތީޖާއާ މެދު ކޯޓަށް މައްސަލަ ހުށަހެޅުމަށް އޮތް އެންމެ ފަހު ދުވަހު، ކޯޓުތައް ބަންދުކޮށްފައި ހުރުމުގެ ސަބަބުން މުންޑުބިލޭއަށް އެ މައްސަލަ ގާނޫނީ ގޮތުން ކުރިއަށް ގެންދެވޭ ގޮތެއް ނުވި އެވެ.
އިންތިހާބު އޮބްޒާވް ކުރި ފަރާތްތަކުން ބުނި ގޮތުގައި ވޯޓުލުން ކުރިއަށް ދިޔައީ އަމާންކަމާ އެކު ނަމަވެސް، ވޯޓު ގުނުމުގެ މަރުހަލާއާ މެދު ބައެއް ފަރާތްތަކުން ވަނީ ސުވާލު އުފައްދާފަ އެވެ.
ޔޫރަޕިއަން ޔޫނިއަން (އީޔޫ) ގެ އޮބްޒާވަރުން ފާހަގަކުރި ގޮތުގައި، ވޯޓު ގުނާ ގިނަ މަރުކަޒުތަކެއްގައި ނަތީޖާ އިއުލާން ކުރުމާ އެކު އެ ނަތީޖާތައް ޝީޓުތަކުގައި ރެކޯޑުކޮށްފައެއް ނުވެ އެވެ. އަދި ޑިޖިޓަލްކޮށް އެންޓްރީ ކުރި ނަތީޖާތަކާއި ކަރުދާހުގައި ހުރި ރެކޯޑުތައް އަޅާކިޔައި ކަށަވަރު ކުރުމުގައި ބޮޑެތި މައްސަލަތަކެއް ހުރި ކަމަށް އީޔޫ އިން ބުނެފައިވެ އެވެ.
މީގެ އިތުރުން، އިންތިހާބާ ބެހޭ އިސް އޮފިޝަލުން މައި މަރުކަޒުން ވަކި ގޮތެއް އަންގަންދެން، ނަތީޖާ އިއުލާން ކުރުމުގެ މަސައްކަތް ތަކުރާރުކޮށް މެދުކަނޑާލާފައިވާ ކަމަށް ވެސް އީޔޫގެ ރިޕޯޓުގައިވެ އެވެ.
ވޯޓުލުން ނިމުނުތާ 24 ގަޑިއިރު ވެސް ނުވަނީސް، ސަލާމަތީ ބާރުތަކުން ވަނީ ވެރިރަށް ލުސާކާގައި ހުންނަ މުންޑުބިލޭއާ ގުޅުން ހުރި އިމާރާތަކަށް ވަދެގަނެ، ކުރީގެ ކެބިނެޓް މިނިސްޓަރަކު ބަޑިޖަހައި މަރާލާފަ އެވެ. އަދި އެ ހަމަލާގެ ތެރެއިން އިދިކޮޅު ސިޔާސީ ގިނަ ބަޔަކު ވަނީ ހައްޔަރުކޮށްފަ އެވެ.
ކަމާބެހޭ އިދާރާތަކުން ތުހުމަތު ކުރާ ގޮތުގައި އިދިކޮޅު ފަރާތްތަކުން ދިޔައީ ހަތިޔާރު ބޭނުންކޮށްގެން ބަގާވާތެއް ކުރަން ރާވަމުންނެވެ. ނަމަވެސް އިދިކޮޅު އިއްތިހާދުން ވަނީ އެ ތުހުމަތުތައް ދޮގުކޮށްފަ އެވެ.
