ޒެމްބިއާގެ ސިޔާސީ މަސްރަހު ނުތަނަވަސްވެފައިވާ ދަނޑިވަޅެއްގައި، އެ ގައުމުގެ އިދިކޮޅު ލީޑަރު ބްރަޔަން މުންޑުބީލްގެ މައްޗަށް ދައުލަތަށް ޚހިޔާނާތްތެރިވުމުގެ ދައުވާ އުފުލައިފި ކަމަށް އޭނާގެ ވަކީލު ވިދާޅުވެއްޖެ އެވެ.
މުންޑުބީލް ހައްޔަރުކުރީ މިދިޔަ ބުރާސްފަތި ދުވަހު އެވެ. އޭނާ ހައްޔަރުކޮށްފައި މިވަނީ، ކަމާބެހޭ އިދާރާތަކުން ހިންގި ރޭޑަކަށް ފަހު ފިލައިގެން އުޅެނިކޮށެވެ.
ޒެމްބިއާގައި ދާދި ފަހުން ބޭއްވި ރިޔާސީ އިންތިހާބުގެ ނަތީޖާއާ މެދު މުންޑުބީލް ވަނީ ސުވާލު އުފައްދަވައިފަ އެވެ. އެ އިންތިހާބު ކާމިޔާބު ކުރައްވައި، މިހާރުގެ ރައީސް ހަކައިންޑޭ ހިޗިލެމާ ވަނީ ދެވަނަ ދައުރެއް ކަށަވަރު ކުރައްވައިފަ އެވެ.
މުންޑުބީލްގެ އެންއާރުޕީޔޫޕީ ޕާޓީން ހަތިޔާރު އެޅި ބަގާވާތެއް ރާވަމުންދާ ކަމަށް ސަރުކާރުގެ އިދާރާތަކުން ތުހުމަތު ކުރި ނަމަވެސް، އެ ޕާޓީން ވަނީ އެކަން ދޮގުކޮށްފަ އެވެ.
ހޮނިހިރު ދުވަހުގެ ރޭ މުންޑުބީލްގެ ވަކީލު މިލްނާ ކަޓޯލޯ އިއުލާން ކުރެއްވި ގޮތުގައި، އޭނާގެ މުވައްކިލުގެ މައްޗަށް ވަނީ ދައުލަތަށް ހިޔާނާތްތެރިވުމުގެ ދައުވާ އުފުލައިފަ އެވެ. ކަޓޯލޯ "ޒެމްބިއަން އައި" އަށް މައުލޫމާތު ދެއްވަމުން ވިދާޅުވީ، ކޯޓުގައި އެ ތުހުމަތުތަކަށް ޖަވާބުދާރީވުމަށް އިދިކޮޅު ލީޑަރު ހުންނެވީ ތައްޔާރަށް ކަމަށެވެ.
ވަކީލު އިތުރަށް ވިދާޅުވީ، މުންޑުބީލްގެ ރަނިންމޭޓް މަކެބީ ޒުލޫ ހިމެނޭހެން އިތުރު 17 މީހެއްގެ މައްޗަށް ވެސް ދައުލަތަށް ހިޔާނާތްތެރިވުމުގެ ދައުވާ އުފުލާފައިވާ ކަމަށެވެ.
ރަސްމީ ނަތީޖާތަކުން ދައްކާ ގޮތުގައި، އޮގަސްޓް 13 ގައި ބޭއްވި އިންތިހާބުގައި މުންޑުބީލަށް ލިބިވަޑައިގަތީ 38 އިންސައްތަ ވޯޓެވެ. ރައީސް ހިޗިލެމާ ވަނީ 60 އިންސައްތަ ވޯޓު ކާމިޔާބު ކުރައްވައިފަ އެވެ.
ވޯޓުލުން ނިމުނުތާ އެއްދުވަސް ފަހުން، ސަލާމަތީ ބާރުތަކުން ވަނީ ވެރިރަށް ލުސާކާގައި ހުންނަ މުންޑުބީލާ ގުޅުންހުރި އިމާރާތަކަށް ވަދެގަނެފަ އެވެ. އެ ރޭޑުގައި ކުރީގެ ކެބިނެޓް މިނިސްޓަރަކު ބަޑިޖަހައި މަރާލާފައިވާއިރު، އިތުރު ސިޔާސީ ބޭފުޅުންތަކެއް ވެސް ވަނީ ހައްޔަރުކޮށްފަ އެވެ.
އެ ހަމަލާއަށް ފަހު، މުންޑުބީލާއި ޒުލޫ ހިމާޔަތް ހޯއްދެވީ އެ ސިޓީގައި ހުންނަ އދ. ގެ އޮފީހަކުންނެވެ. ނަމަވެސް، އެ ދެ ބޭފުޅުން ސަރުކާރާ ހަވާލުކުރުމަށް ރައީސް ހިޗިލެމާ އދ. އަށް ފިއްތުންތައް ކުރިމަތިކުރެއްވުމާ ގުޅިގެން، އެ ބޭފުޅުން ވަނީ ހައްޔަރުކޮށްފަ އެވެ.
އިންތިހާބުގެ ނަތީޖާ ގޮންޖަހައި ކޯޓަށް މައްސަލަ ހުށަހެޅުމުގެ ފުރުސަތު އިދިކޮޅު ފަރާތްތަކަށް ވަނީ ގެއްލިފަ އެވެ. އެއީ މައްސަލަ ހުށަހެޅުމުގެ އެންމެ ފަހު ދުވަސް ކަމަށްވާ މިދިޔަ ހޯމަ ދުވަހު، ސަރުކާރުގެ އިދާރާތަކުން ކޯޓުތައް ބަންދުކޮށްފައި ހުރުމުންނެވެ.
ރައީސް ހިޗިލެމާގެ ދެވަނަ ދައުރުގެ ހުވާކުރެއްވުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ ސެޕްޓެމްބަރު މަހުގެ 1 ވަނަ ދުވަހު އެވެ.
ސަރަހައްދީ އަދި ބައިނަލްއަގުވާމީ އޮބްޒާވަރުން ބުނާ ގޮތުގައި އިންތިހާބު ކުރިއަށްދިޔައީ އަމާންކަމާއެކުގަ އެވެ. ނަމަވެސް، އިންތިހާބާ ގުޅިގެން ހިންގި ސަލާމަތީ އޮޕަރޭޝަންތަކުގައި ހައްޔަރުކުރި މީހުންގެ ތެރެއިން ވީނުވީއެއް ނޭނގި ގެއްލިފައިވާ މީހުންގެ މައްސަލައިގައި ޒެމްބިއާގެ ހިއުމަން ރައިޓްސް ކޮމިޝަނުން ވަނީ ކަންބޮޑުވުން ފާޅުކޮށް، އެކަމުގެ ޒިންމާ އުފުލުމަށް ގޮވާލައިފަ އެވެ.
