މިހާރު ކުރިއަށްދާ ރިސޯޓް ލީގުގެ، ނ. ޒޯނުގެ ފުރަަތަމަ މެޗުތައް ނިމުނުއިރު، ލަނޑުގެ ތަފާތުން ސޮނޭވާ ޖާނީ މޯލްޑިވްސް އެއް ވަނަ އަށް ޖެހިލައިފި އެވެ.
ރިސޯޓް ލީގުގެ ނ. ޒޯނުގައި ވާދަކުރަނީ ފަސް ޓީމަކުންނެވެ. އެ ގޮތުން، ކޮންމެ ޓީމަކުން ފުރަތަމަ ދެ މެޗު ކުޅެފައިވާއިރު، އެއް ވަނައިގައި އޮތް ސޮނޭވާ ޖާނީ އާއި ދެ ވަނައިގައި އޮތް ޝެވަލް ބްލޮންކް ރަންދެލި ރިސޯޓަށް ވަނީ ހަތަރު ޕޮއިންޓް ލިބިފަ އެެވެ. ސޮނޭވާ ޖާނީގެ ފައިދާ ތިން ގޯލު އޮތްއިރު، ޝެވަލް ބްލޮންކް ރަންދެލީގެ އޮތީ ފައިދާ ދެ ގޯލެވެ.
ތިން ވަނައިގައި އޮތް ވެލާ ޕްރައިވެޓް އައިިލެންޑާއި ހަތަރެއްގައި އޮތް ރޮބިންސަން ނޫނަށް ވަނީ ތިން ޕޮއިންޓް ލިބިފަ އެވެ. އަދި، މި ވަގުތު އެންމެ ފުލުގައި އޮތީ ދެ މެޗުން ބަލިވި، ސިޔާމް ވޯލްޑް އެވެ.
ނ. ޒޯނުގެ ފޯމެޓް ރޭވިފައި އޮތްގޮތުން، ލީގު ބުުރުގެ ކުޅުން ނިމޭއިރު، އެންމެ ރަނގަޅު ނަތީޖާ ނެރޭ ޓީމަަކަށް ފައިނަލުގެ ސީދާ ޖާގައެއް ލިބޭނެ އެވެ. އަދި ދެ ވަނަ އާއި ތިން ވަނަ އަށް ދާ ދެ ޓީމުގެ މެދުގައި ސެމީ ފައިނަލެއް ކުޅުމަށް ފަހު، މޮޅުވާ ޓީމަކަށް ފައިނަލުގެ ފަހު ޖާގަ ލިބިގެންދާނެ އެވެ.
މުބާރާތުގައި މިހާތަނަށް ކުޅުނު މެޗުތަކަށް ބަލާއިރު، ސިޔާމް ވޯލްޑް އަތުން ވެލާ މޮޅުވީ 4-2 އިންނެވެ. ދެ ވަނަ މެޗުގައި ޝެވަލް ބްލޮންކް އާއި ސޮނޭވާ ޖާނީ 2-2 އިން އެއްވަރުވިއިރު، ތިން ވަނަ މެޗުގައި ސިޔާމް ވޯލްޑް އަތުން ރޮބިންސަން ވަނީ 2-1 އިން މޮޅުވެފަ އެވެ. ވެލާ އަތުން ޝެވަލް ބްލޮންކް 2-0 އިން މޮޅުވިއިރު، ރޮބިންސަންގެ މައްޗަށް ސޮނޭވާ ޖާނީން ކުރި ހޯދީ 3-0 އިންނެވެ.
މުބާރާތުގެ މެޗެއް މިއަދު ވެސް ކުޅޭނެ އެވެ. އެއީ، ޝެވަލް ބްލޮންކާއި ސިޔާމް ވޯލްޑް ބައްދަލުކުރާ މެޗެވެ.
