ރާއްޖޭގެ ރިސޯޓްތަކުގެ މެދުގައި ބާއްވާ އެންމެ ފޯރިގަދަ ފުޓްސަލް މުބާރާތް، ރިސޯޓް ލީގުގެ ސައުތު މާލެ ޒޯން 2026 ގެ ކުޅުން ފެށިގެން ކުރިއަށްދާއިރު، މި ފަހަރު މި ޒޯނުގައި 12 ޓީމެއްގެ ވާދަވެރި ކުރިމަތިލުންތަކެއް މިހާތަަނަށް ވެސް ވަނީ ފެނިގެން ގޮސްފަ އެވެ.
މުބާރާތުގައި މިހާތަނަށް ކުޅެވުނު މެޗުތަކަށް ފަހު، ދެ ޓީމެއް ފިޔަވައި ހުރިހާ ޓީމެއް ވަނީ ކުޅެފަ އެވެ. އަދި، ދެ ޓީމަކުން ވަނީ ދެ މެޗު ވެސް ކުޅެފަ އެވެ.
ގްރޫޕް ތާވަލުތަކަށް ބަލާއިރު، ގްރޫޕް އޭގެ އެއް ވަނައިގައި އޮތީ އެއް މެޗުން ތިން ޕޮއިންޓް ހޯދައިގެން ވަލްޑޯފް އެވެ. ދެ ވަަނައިގައި އޮތް ވެލައްސަރުން އެއް މެޗުން ޕޮއިންޓެއް ހޯދިއިރު، އޮޅުވެލި ތިން ވަނައިގައި އޮތީ ދެ މެޗުން ޕޮއިންޓަކާ އެކު އެވެ. ގްރޫޕް ބީގެ އެއް ވަނައިގައި އޮތީ އެއް މެޗުން ތިން ޕޮއިންޓާ އެކު، ސައި ލެގޫން އެވެ. ދެ ވަނައިގައި އޮތް ހާޑް ރޮކަށް އެއް މެޗުން ޕޮއިންޓެއް ލިބިފައިވާއިރު، ތިން ވަނައިގައި އޮތް ޖޭޑަބްލިއު މެރިއަޓަށް ދެ މެޗުން ލިބިފައިވަނީ ޕޮއިންޓެކެވެ. ގްރޫޕް ސީގެ އެއް ވަަނައިގައި މާދޫ އޮތީ އެއް މެޗުން ތިން ޕޮއިންޓް ހޯދައިގެންނެވެ. މި ގްރޫޕްގައި ދެން އޮތް ކްރޮސް ރޯޑްސް އިން އަދި މެޗެއް ނުުކުޅޭއިރު، ދެން މި ގްރޫޕްގައި އޮތް ރައްގިލިން މެޗެއް ކުޅެ ވަނީ ބަލިވެފަ އެވެ. އަދި، ގްރޫޕް ޑީގެ އެއް ވަނައިގައި އޮތީ އެއް މެޗުން ތިން ޕޮއިންޓް ހޯދާފައިވާ ބޮލިފުށި އެވެ. ދެ ވަނައިގައި އޮތް އެސްއޯ މޯލްޑިވްސް އިން އަދި މެޗެއް ނުުކުޅޭއިރު، އަނަންތަރާ ވަނީ އެއް މެޗުން ބަލިވެފަ އެވެ.
މުބާރާތުގެ ފޯމެޓް ރޭވިފައި އޮތްގޮތުން، ކޮންމެ ގްރޫޕެއްގެ ވެސް އެއް ވަނަ ޓީމަށް ކުއާޓާ ފައިނަލުގެ ސީދާ ޖާގައެއް ލިބޭނެ އެވެ. ދެން، ކޮންމެ ގްރޫޕެއްގައި ހިމެނޭ އަނެއް ދެ ޓީމު ކުޅެން ޖެހޭނީ ޕްލޭއޮފް ބުރުގަ އެވެ. އަދި، ޕްލޭއޮފުން މޮޅުވާ ޓީމުތަކަށް ކުއާޓާ ފައިނަލްގެ ފަހު ހަތަރު ޖާގަ ލިބޭނެ އެވެ. ކުއާޓާ ފައިނަލް އޮތީ މި މަހު، 29 އާއި 30 ގަ އެވެ.
އޮޅުވެލީގައި މި މުބާރާތުގެ މެޗުތައް ކުރިއަށްދާއިރު، ސެމީ ފައިނަލް އޮތީ އަންނަ މަހުގެ އެއް ވަނަ ދުވަހު އެވެ. ފައިނަލް މެޗު އޮތީ އަންނަ މަހު ތިން ވަނަ ދުވަހު އެވެ.
މިދިޔަ އަހަރުގެ ފައިނަލުުގައި ސައި ލެގޫން ބަލިކޮށްފައި މި ޒޯންގެ ތަށި ހޯދީ ވަލްޑޯފުންނެވެ. ފުރިހަމަ ވަގުތު ހަމަވިއިރު ވަނީ 1-1 އިން އެއްވަރުވެފަ އެވެ. ނަތީޖާ ނެރެން ޕެނަލްޓީ ޖެހިއިރު، ވަލްޑޯފުން މޮޅުވީ 5-4 އިންނެވެ.
