ގައުމީ ބޮޑީބޯޑިން ލީގުގެ ދެ ވަނަ މުބާރާތް، ރަންދާ ބޮޑީބޯޑިން ޗެލެންޖުގެ މެންސް އޯޕަން ބައިގެ ޗެމްޕިއަންކަން، އަޝްރަފް ހަސަން ހޯދައިފި އެވެ.
މިއީ، ގައުމީ ލެވަލްގައި އަޝްރަފް ހޯދި ތިން ވަނަ ބޮޑު ކާމިޔާބެވެ. މީގެ ކުރިން، އޭނާ ވަނީ 2023 ވަނަ އަހަރުގެ ބުރުނު ޝިކާރު ބޮޑީބޯޑިން ޗެލެންޖުގެ މެންސް އޯޕަން އާއި މިދިޔަ އަހަރުގެ ގައުމީ ބަނޑުފިލާ ޗެލެންޖުގެ މެންސް އޯޕަން ޗެމްޕިއަންކަން ހޯދައިފަ އެވެ. އެ ދެ ފައިނަލުގައި ވެސް ޏ. ފުވައްމުލަކަށް ނިސްބަތްވާ އަޝްރަފް ކުރިހޯދީ، ރާއްޖޭގެ އެއް ވަނަ ބޮޑީބޯޑަރު، އަލީ ހުޝްރުވާން އަހުމަދު (ކުޑަ އައްޔަ) ބަލިކޮށްފަ އެވެ. މިއަދު، ކ. ތުލުސްދޫގައި ނިމުނު ރަންދާ ބޮޑީބޯޑިން ޗެލެންޖުގެ މެންސް އޯޕަން ކެޓަގަރީގެ ޗެމްޕިއަންކަން އަޝްރަފް ހޯދީ މިދިޔަ އަހަރުގެ ގައުމީ ބޮޑީބޯޑިން ލީގާއި މި އަހަރުގެ ބުރުނު ޝިކާރުގެ ޗެމްޕިއަން، އާމިން އުމަރު މޫސާ ފައިނަލް ހީޓުގައި ބަލިކޮށްފަ އެެވެ.
ސެމީ ފައިނަލް އާއި ފައިނަލް ހީޓުތައް މިއަދު މެންދުރު ފަހު ކުރިއަށްދިޔައިރު، އާމިން ސެމީ ފައިނަލުގައި ވާދަކުރީ، އިޔަން އަހުމަދު އަތުން ކުއާޓާ ފައިނަލުގައި މޮޅުވި މުހައްމަދު އަޒާން އަހުމަދުއާ ދެކޮޅަށެވެ. އާމިން ވަނީ ޖުމްލަ އެކު، 12.57 ޕޮއިންޓް ސްކޯކޮށްފަ އެވެ. އެއީ، އެންމެ ރަނގަޅު ދެ ރާޅުން، 7.00 އާއި 5.57 ޕޮއިންޓެވެ. އަޒާން ވަނީ އެންމެ ރަނގަޅު ދެ ރާޅުން، 6.33 އާއި 6.17 ޕޮއިންޓް ހޯދައި، ޖުމްލަ 12.50 ހޯދައިފަ އެވެ. އާމިން، ސެމީން މޮޅުވީ 0.07 ޕޮއިންޓުގެ ފަރަގަކުންނެވެ.
އަޝްރަފް، ސެމީގައި ވާދަކުރަން ޖެހުނީ، ކުއާޓާގައި ކުޑަ އައްޔަގެ މައްޗަށް ކުރިހޯދި ތަޖުރިބާކާރު، ބޮޑީބޯޑަރު، އަލީ ޖާވިދު (ޖާއްޓެ)އާ އެވެ. އަޝްރަފް ވަނީ އެންމެ ރަނގަޅު ދެ ރާޅަށް، 8.00 އާއި 8.50 ޕޮއިންޓް ހޯދައި، ޖުމްލަ އެކު، 16.50 ޕޮއިންޓްގެ ސްކޯއެއް އެއްކޮށްފަ އެވެ. ޖާއްޓެގެ އެންމެ ރަނގަޅު ދެ ރާޅުގެ ސްކޯ އަކީ، 5.83 އާއި 7.50 ޕޮއިންޓެވެ. ޖުމްލަ އަކީ، 13.33 ޕޮއިންޓް ކަމަށްވާއިރު، އަޝްރަފް ކުރިހޯދީ، 3.17 ޕޮއިންޓުގެ ފަރަގަކުންނެވެ.
ފައިނަލް ހީޓުގައި ނުކުމެ، އަޝްރަފް ކުރިހޯދީ 0.37 ޕޮއިންޓުގެ ފަރަގަކުންނެވެ. އޭނާ އަށް އެންމެ ރަނގަޅު ދެ ސްކޯ ލިބުނީ ފަހު ދެ ރާޅުންނެވެ. އެ ދެ ރާޅުން އޭނާ ވަނީ 9.17 އާއި 7.20 ޕޮއިންޓް ހޯދައި، ޖުމްލަ 16.37 ޕޮއިންޓަށް އަރައިފަ އެވެ. އާމިން ވަނީ އެންމެ ފުރަތަމަ ރާޅުން 7.33 ޕޮއިންޓް ހޯދައި، ތިން ވަނަ ރާޅުގައި، 8.67 ޕޮއިންޓް ހޯދައިފަ އެވެ. މިއީ، އޭނާ އަށް އެންމެ ރަނގަޅު ދެ ސްކޯ ލިބުނު ރާޅުތަކެވެ. އާމިންގެ ޖުމްލަ އަކީ، 16.00 ޕޮއިންޓެވެ.
ޑްރޮޕްނީ ޑިވިޝަނުގެ ޗެމްޕިއަން، އަޝްރަފް ބަލިކޮށް އާމިން ވަނީ ހޯދައިފަ އެވެ. ސެމީގައި ރާއްޖޭގެ ޑްރޮޕްނީ ޑިވިޝަނުގެ ރެކޯޑް ހޯލްޑަރު، ކުޑަ އައްޔަ އަތުން މޮޅުވެގެން ފައިނަަލަށް އަައި އާމިން ވަނީ ފައިނަލުގައި ޖުމްލަ އެކު، 7.93 ޕޮއިންޓް ސްކޯކޮށްފަ އެވެ. އަޝްރަފަށް ސްކޯކުރެވުނީ، 5.57 ޕޮއިންޓެވެ.
ރަންދާ ބޮޑީބޯޑިން ޗެލެންޖުގެ ޖޫނިއާ ބައިގެ ޗެމްޕިއަންކަން ހޯދީ މުހައްމަދު ލިބާން އެވެ. ތިން އެތުލީޓުން ވާދަކުރި މި އިވެންޓުގައި، ލިބާން ވަނީ ސެމީ ފައިނަލުގައި، 1.2 ޕޮއިންޓުގެ ފަރަގަކުން އިޔަން ބަލިކޮށްފަ އެވެ. އެ ގޮތުން، ލިބާން އަށް ޖުމްލަަ 12.67 ޕޮއިންޓް ލިބުނުއިރު، އިޔަން އަށް ލިބުނީ ޖުމްލަ 11.47 ޕޮއިންޓެވެ. ފައިނަލުގައި ލިބާންއާ ވާދަކުރީ އަހުމަދު ޖިވާއު ޖިހާދު އެވެ. ލިބާން އަށް 11.17 ޕޮއިންޓް ލިބުނުއިރު، ޖިވާއު ވަނީ 10.83 ޕޮއިންޓް ހޯދައިފަ އެވެ. ފައިނަލުގައި، ލިބާން ކުރިހޯދީ 0.34 ޕޮއިންޓުގެ ފަރަގަކުންނެވެ.
