ގައުމީ ބޮޑީބޯޑިން ލީގުގެ ފުރަތަމަ މުބާރާތް ކަމަށްވާ "ބުރުނު ޝިކާރު ބޮޑީބޯޑިން ޗެލެންޖް 2026" ގެ މެންސް އޯޕަން ޑިވިޝަނުގެ ޓައިޓަލް ދިފާއުކޮށް، މިދިޔަ އަހަރުގެ ގައުމީ ލީގު ޗެމްޕިއަން، އާމިން އުމަރު މޫސާ މި ފަހަރުގެ ސީޒަން ވަރުގަދަކޮށް ފަށައިފި އެވެ.
ރާޅުގަނޑު ސަރަހައްދުގައި އިއްޔެ އިން ފެށިގެން ކުރިއަށްދާ މި މުބާރާތުގެ މެންސް އޯޕަންގައި 21 އެތުލީޓުން ވާދަކުރި އެވެ. އެ ގޮތުން، އާމިން ފައިނަލުގައި ނުކުތީ އަސްވާން މުހައްމަދު (ދޫނި)އާ ދެކޮޅަށެވެ. ފައިނަލުގައި އާމިންގެ ސްކޯ އަކީ، 13.34 ޕޮއިންޓެވެ. އާމިން، ޖުމްލަ އެކު، ހަތަރު ރާޅުން ކުރި ސްކޯތަކުގެ ތެރެއިން، އެންމެ ރަނގަޅު ދެ ރާޅުން ސްކޯ ކުރީ 6.17 އާއި 7.17 ޕޮއިންޓެވެ. އަސްވާން ޖުމްލަ އެކު، ހަތް ރާޅުން ސްކޯތަކެއް ހެދިއިރު، އޭނާގެ އެންމެ ރަނގަޅު ދެ ރާޅު، 4.50 އާއި 5.33 ގެ ޖުމްލަ އަކީ، 9.83 ޕޮއިންޓެވެ.
އާމިން، ސެމީ ފައިނަލުގައި ވާދަކުރީ މިދިޔަ އަހަރުގެ ޖޫނިއާ ޗެމްޕިއަން، އިޔަން އަހުމަދުއާ އެވެ. އާމިން އާއި އިޔަންގެ ކުރިމަތިލުން ފޯރިގަދަކޮށް ދިޔައިރު، އާމިން މޮޅުވީ، 0.43 ޕޮއިންޓުގެ ފަރަގަކުންނެވެ. އާމިން އަށް 12.60 ޕޮއިންޓުގެ ސްކޯއެއް ލިބުުނުއިރު، އިޔަން ވަނީ 12.17 ޕޮއިންޓު ސްކޯކޮށްފަ އެވެ. އަސްވާން ވަނީ، ސެމީ ފައިނަލުގައި ރާއްޖޭގެ އެންމެ ކާމިޔާބު ބޮޑީބޯޑަރު، އަލީ ހުޝްރުވާން އަހުމަދު (ކުޑަ އައްޔަ) ބަލިކޮށްފަ އެެވެ. މިއީ ވެސް ފޯރިގަދަކޮށް ނިމިގެންދިޔަ ސެމީ އެކެވެ. އަސްވާން، މި ސެމީން މޮޅުވީ 0.9 ޕޮއިންޓުގެ ފަރަގަކުންނެވެ. އަސްވާން، 11.50 ޕޮއިންޓް ސްކޯކުރިއިރު، ކުޑަ އައްޔަގެ ސްކޯ އަކީ، 10.60 ޕޮއިންޓެވެ.
މި ފަހަރުގެ މުބާރާތުގެ ޖޫނިއާ މެންސް ކެޓަގަރީގައި އަށް އެތުލީޓުން ވާދަކުރާއިރު، ޑްރޮޕްނީ ކެޓަގަރީގައި ނުވަ އެތުލީޓުން ފެނިގެންދާނެ އެވެ. ބޮޑީބޯޑިންގެ އާ އިސްނެގުމެއްގެ ތެރެއިން، މި ފަހަރުގެ ބުރުނު ޝިކާރުގައި ޖޫނިއާ ވިމެންސް ކެޓަގަރީއެއް ހިމަނާފައިވާއިރު، މި ޑިވިޝަނުގައި 10 އެތުލީޓެއް ވާދަކުރެ އެވެ.
މުބާރާތުގައި މިއަދު ކުރިއަށްދާނީ ޖޫނިއާ މެންސް އާއި ޑްރޮޕްނީ އަދި ޖޫނިއާ މެންސް ކެޓަގަރީގެ އިވެންޓްތަކެވެ.
މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ވަނީ މި ފަހަރުގެ ބޮޑީބޯޑިން ސީޒަނުގައި ޕޮއިންޓު ދޭ އުސޫލަށް ބަދަލުތަކެއް ގެނެސްފަ އެވެ. މި ބަދަލުގެ ސަބަބުން ހުރިހާ މުބާރާތެއްގައި ވާދަކޮށްގެން ނޫން ގޮތަކަށް ބޮޑީބޯޑިން ލީގު ކާމިޔާބެއް ނުކުރެވޭނެ އެވެ. ގެނެވުނު ބަދަލާ އެކު، މުބާރާތްތަކުގައި ޕޮއިންޓް ދޭ ފަރަގު ވަނީ އެކަށީގެންވާ މިންގަނޑެއްގެ ތެރެއިން ކަނޑައަޅައިފަ އެވެ.
ގައުމީ ބޮޑީބޯޑިން ލީގުގައި ޕޮއިންޓް ކަނޑައަޅާ އުސޫލަށް ބަލާއިރު، ސީޒަންގެ ފުރަތަމަ މުބާރާތް، ބުރުނު ޝިކާރު ޗެލެންޖަށް ކަނޑައަޅާފައިވަނީ 1700 ޕޮއިންޓެވެ. އަދި ދެ ވަނަ މުބާރާތް، ލަބެރާ ބޮޑީބޯޑިން ޗެލެންޖަށް 1500 ޕޮއިންޓް ކަނޑައަޅާފައިވާއިރު، ލީގު ފަހު މުބާރާތްކަމަށްވާ ގައުމީ ބަނޑުފިލާ ޗެލެންޖަށް ކަނޑައަޅާފައިވަނީ 2000 ޕޮއިންޓެވެ. އެވެ.
