ގައުމީ ބޮޑީބޯޑިން ލީގުގެ ފުރަތަމަ މުބާރާތް ކަމަށްވާ "ބުރުނު ޝިކާރު ބޮޑީބޯޑިން ޗެލެންޖް 2026" ގެ ޖޫނިއާ އޯޕަންގެ ފައިނަލުގައި، މިދިޔަ އަހަރުގެ ގައުމީ ލީގުގެ ޖޫނިއާ ޗެމްޕިއަން، އިޔަން އަހުމަދު ބަލިކޮށް ނޫހު މުހައްމަދު ދުނައިމް އިރުޝާދު، ޖޫނިއާ ޑިވިޝަންގެ ޗެމްޕިއަންކަން ހޯދައިފި އެވެ.
ޖުމްލަަ އެކު، އަށް އެތުލީޓުން ވާދަކުރި ޖޫނިއާ އިވެންޓުގައި، އިޔަން އާއި ނޫހް ވަނީ ހީޓު އެކެއްގައި ވެސް ވާދަކުރަން ޖެހިފަ އެވެ.
އެ ގޮތުން، މިއަދު ހެނދުނު، ޖޫނިއާ ޑިވިޝަނުގެ ތިން ވަނަ ބުރުގެ ހީޓު އެކެއްގައި، އިޔަން އާއި ނޫހް އަދި ހަލިފް ރަސަމް ވާދަކުރި، ހީޓުގެ އެއް ވަނަ ނޫހް ހޯދީ 10 ޕޮއިންޓް ސްކޯކޮށްގެންނެވެ. ދެ ވަނަ އަށް ދިޔަ އިޔަން، 9.10 ޕޮއިންޓް ސްކޯކުރިއިރު، ތިން ވަނަ ހޯދި ހަލިފް ވަނީ 2.40 ޕޮއިންޓް ސްކޯކޮށްފަ އެވެ.
ނޫހް، ވަނީ ސެމީ ފައިނަލުގައި ދާއިން އަބްދުލް ފައްތާހުއާ އެއް ހީޓެއްގައި ވާދަކޮށް، 4.78 ޕޮއިންޓުގެ ފަރަގަކުން ކުރިހޯދައިފަ އެވެ. ނޫހް އަށް 9.84 ޕޮއިންޓް ލިބުނުއިރު، ދާއިން ވަނީ 5.06 ޕޮއިންޓް ސްކޯކޮށްފަ އެވެ.
ސެމީ ފައިނަލުގައި އިޔަން ވަނީ، މި ފަހަރުގެ މުބާރާތުގެ ޖޫނިއާ ޑިވިޝަނުގައި އެއް ހީޓެއްގައި އެންމެ މަތި ސްކޯ ހޯދައިފަ އެވެ. އެ ގޮތުން، ސެމި ފައިނަލުގައި އިޔަން ވަނީ 15.33 ޕޮއިންޓް ސްކޯކޮށްފަ އެވެ. އެއީ، ހަ ރާޅުގައި އެޅިއިރު، އެންމެ މަތިން ސްކޯކުރި ދެ ރާޅުން، 6.83 ޕޮއިންޓާއި 8.50 ޕޮއިންޓް ސްކޯކޮށްގެންނެވެ. މި ހީޓުގައި ދެން ވާދަކުރި، އަހުމަދު ޖިވާއު ޖިހާދު ވަނީ 9.67 ޕޮއިންޓް ސްކޯކޮށްފަ އެވެ.
ފައިނަލުގައި، ނޫހް ވަނީ 5.46 ޕޮއިންޓުގެ ފަރަގަކުން މޮޅުވެފަ އެވެ. ޖުމްލަ އެކު، ހަތް ރާޅުއެޅި، ނޫހް ވަނީ އެންމެ ރަނގަޅު ދެ ރާޅުން ޖުމްލަ އެކު، 12.16 ޕޮއިންޓް ސްކޯކޮށްފަ އެވެ. އެއީ، 6.33 ޕޮއިންޓާއި 5.83 ޕޮއިންޓެވެ. އިޔަން ހަތަރު ރާޅު އެޅިއިރު، އެންމެ މަތިން ސްކޯކުރި ދެ ރާޅަށް ލިބުނީ، 4.83 ޕޮއިންޓާއި 1.87 ޕޮއިންޓެވެ. ޖުމްލަ އަކީ، 6.70 ޕޮއިންޓެވެ.
މިއީ، ސާފިން އާއި ބޮޑީބޯޑިންގައި ވެސް ވާދަކުރަމުން އަންނަ ނޫހްގެ ކެރިއަރުގައި ބޮޑު އުސްއައްޔެކެވެ. އޭނާ މި ވަނީ މި ފަހަރުގެ ބޮޑީބޯޑިން ސީޒަނުގެ ފުރަތަމަ މުބާރާތުގައި ކެރިއަރުގެ ބޮޑު ޓައިޓަލް އެއް ފުރަތަމަ ފަހަރަށް ހޯދައިފަ އެވެ.
