މޮރޮކޯގައި މި މަހު ފަށާ މޮރޮކޯ ވޯލްޑް ބޮޑީބޯޑް ޗެމްޕިއަންޝިޕަކީ، ރާއްޖެ އަށް ތާރީހީ މުބާރާތެއް ކަމަށާއި ރަނގަޅު ކާމިޔާބަކަށް އަމާޒުކުރާ ކަމަށް މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ބުނެފި އެވެ.
މޮރޮކޯގައި މި މަހުގެ 31 އިން އަންނަ މަހުގެ 12 ވަނަ ދުވަހަށް ކުރިއަށްދާ މުބާރާތުގައި ރާއްޖޭގެ ޓީމުން ބައިވެރިވާއިރު، މިއީ، ޓީމެއްގެ ސިފައިގައި ރާއްޖޭން ބޭރުގައި ގައުމީ ބޮޑީބޯޑިން ޓީމެއް ވާދަކުރާނެ ފުރަތަމަ ފަހަރެެވެ. މީގެ ކުރިން، އިންޑިވިޖުއަލް އެތުލީޓުން/ބޮޑީބޯޑަރުން ވަނީ ބައިނަލްއަގުވާމީ މުބާރާތްތަކުގައި ވާދަކޮށް ރާއްޖެ ތަމްސީލްކޮށްފަ އެވެ.
އެކަމަކު، މި ފަހަރު ތަފާތަކީ، ޓީމެއްގެ ގޮތުގައި، މުބާރާތެއްގައި ވާދަކުރަން ފުރުސަތު ލިބުމެވެ. އެ ގޮތުން، މޮރޮކޯ މުބާރާތުގެ ޖޫނިއާ މެންސް ރައިސިން ސީރީސްގައި ވާދަކުރާނީ، އެންމެ ފަހުގެ ބޮޑީބޯޑިން ލީގުގެ ޖޫނިއާ ލީގު ޗެމްޕިއަން، އިޔަން އަހުމަދު އެވެ. އަދި، ޕްރައިމް ސީރީސްގައި ވާދަކުރާނީ ގައުމީ ބޮޑީބޯޑިން ޓީމުގައި ހިމެނޭ އަލީ ހުޝްރުވާން (ކުޑަ އައްޔަ)، އާމިން އުމަރު މޫސާ، މުހައްމަދު ކައިފް އަދި، އަޝްރަފް ހަސަން އެވެ.
މޮރޮކޯ މުބާރާތާ ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމަށް ފަހު، "އަދަދު ސްޕޯޓްސް" އަށް ދިން އިންޓަވިއުގައި، އެމްބީބީއޭގެ ޖެނެރަލް ސެކްރެޓަރީ ހަސަން ރަޝީދު (ރަޝް)، ވިދާޅުވީ، ގައުމީ ޓީމެއްގެ ގޮތުގައި، 2020 ވަނަ އަހަރު ރަޖިސްޓްރީވި ފަހުން، ރާއްޖެ ތަމްސީލް ކުރަން ޓީމެއްގެ ގޮތުގައި ދިއުމަށް ފުރުސަތު ލިބުނީ މޮރޮކޯ މުބާރާތުގައި ކަމަށެވެ.
"(މުބާރާތް) އޮތީ އަންޒާ ބީޗް، މޮރޮކޯގެ އަގަދީރު ސިޓީގައި އެޓްލާންޓިކް އޯޝަންގެ ސްވެލް ރާޅުތައް މި ތަނަށް މި ވައްދަނީ، ރާއްޖޭގެ ޓެމްޕަރޭޗާ އަށް ބަލާފައި ވަރަށް ތަފާތު ޓެމްޕަރޭޗާއެއްގައި އަޅުގަނޑުމެންގެ އެތުލީޓުން ވާދަކުރާނީ، އެއީ ވޯޓާ ޓެމްޕަރޭޗާ ވެސް ވަރަށް ދަށްވާނެ، ޕާފޯމް ކުރާނީ ވެޓްސޫޓު ލައިގެން، ރާއްޖޭގެ ޓެމްޕަރޭޗާގައި ގޮސްފައި އެކޮޅުގެ ޓެމްޕަރޭޗާ އަށް ހޭނެން ދުވަސްކޮޅެއް ނަގާނެ، އުނދަގޫ ކަމެއް އިންނާނެ، އެ ކުދިން މިހާރު ޕްރެކްޓިސްއާ އެއްޗެހި ކުރަމުން މި ދަނީ،" ރަޝް ވިދާޅުވި އެެވެ.
"އުންމީދަކީ، މީގަ ވަރަށް ރަނގަޅު ކާމިޔާބެއް ރާއްޖެ އަށް ގެނައުން. އެއީ، ރާއްޖެ ރެޕްރެޒެންޓްކުރަންދާ ފުރަތަމަ އިވެންޓަށް ވެފައި ދެން، އަޅުގަނޑުމެންގެ މި ތިބީ ރާއްޖޭން މި ވަގުތު ނެގިފައި ތިބި އެންމެ ޓޮޕް ރައިޑާސްއޭ އަޅުގަނޑު ބުނާނީ. އެއީ، ޕާފޯމަންސަށް ބެލިޔަސް ވަރަށް ރަނގަޅު ޓީމެއް މި އޮތީ، އަޅުގަނޑުމެންގެ އުންމީދެއް އެބައޮތް ރަނގަޅު ކާމިޔާބެއް ލިބޭނެ ކަމުގެ،"
މޮރޮކޯގައި ކުރިއަށްދާ މި މުބާރާތުގައި ދުނިޔޭގެ އެންމެ ވަރުގަދަ ބޮޑީބޯޑަރުން ވާދަކުރާނެ އެމްބީބީއޭ އިން ވަނީ ބުނެފަ އެވެ.
ނޫސްވެރިންގެ ބައްދަލުވުމުގެ ތެރެއިން ރަޝް ވާހަކަ ދައްކަވަނީ.--- ފޮޓޯ: އަަދަދު ސްޕޯޓްސް / އިމޭޖަސް.އެމްވީ
އެ ގޮތުން، މޮރޮކޯގައި މުބާރާތް ކުރިއަށްދާތީވެ، ވާދަކުރުމަށްޓަކައި، އޭޝިއާ، ޔޫރަޕް އަދި ދެކުނު އެމެރިކާ އިން އެތުލީޓުން ދަތުރުކުރާނެ ކަމަށް ވެސް އެމްބީބީއޭ އިން ބުނެފައިވެ އެވެ. އަދި، މިއީ، މޮރޮކޯގެ ރޯޔަލް ސާފް ފެޑެރޭޝަނުން އައިބީސީއާ ގުޅިގެން ކުރިއަށްގެންދާ މުބާރާތެއް ކަމަށް ރަޝް ވިދާޅުވެފައިވެ އެވެ.
"(މޮރޮކޯގައި ކުރިއަށް މި ދަނީ) މިއީ، ރާއްޖޭގައި މި ބޭއްވި މޯލްޑިވްސް ޕްރޯ ކަހަލަ އެއް ލެގު،" ރަޝް ވިދާޅުވި އެވެ.
ބައިނަލްއަގުވާމީ މައިދާނުގައި މީގެ ކުރިން ރާއްޖޭގެ ބޮޑީބޯޑަރުން ވަނީ ފާހަގަކޮށްލެވޭ ކާމިޔާބީތަކެއް ހޯދައިފަ އެވެ.
އެ ގޮތުން، މީގެ ކުރިން 2023 ވަނަ އަހަރު އާމިން، ވަނީ ދުނިޔޭގެ ޖޫނިއާ ރޭންކިންގެ 10 ވަނަ އަށް ޖެހިލަައިފަ އެވެ. އައިބީސީ ވޯލްޑް ޓުއާގައި 11 މުބާރާތެއް ހިމެނޭއިރު އޭގެ ތެރެއިން ހަ މުބާރާތެއްގައި ޖޫނިއާ ޑިވިޝަން ހިމެނެ އެވެ. މި ހަ މުބާރާތުގެ ތެރެއިން ހަތަރު މުބާރާތެއްގައި، އެ ފަހަރު އާމިން ވާދަކުރި އެވެ. އެއީ، ރާއްޖޭގައި އޮތް މޯލްޑިވްސް ޕްރޯ އާއި ފްރާންސްގައި އޮތް ލަ ސަލީ ޕްރޯ އާއި ޕޯޗުގަލްގެ ސިންޓްރާ ޕްރޯ އާއި ޓުއާގެ ފަހު މުބާރާތްކަމަށްވާ ފްރޮންޓޮން ކިންގް 2023 އެވެ.
ރާއްޖެ އަށް ބައިނަލްއަގުވާމީ ގޮތުން، ބޮޑީބޯޑިންގެ ގިނަ ފުރުސަތުތައް ލިބެން ފެށީ، 2022 ވަނަ އަހަރު ރާއްޖޭގައި އެންމެ ފުރަތަމަ ބޭއްވި ވިޒިޓް މޯލްޑިވްސް ޕްރޯ އަށް ފަހު އެވެ. މީގެ ތިން އަހަރު ކުރިން، ބޭއްވި ފުރަތަމަ ވިޒިޓް މޯލްޑިވްސް ޕްރޯގައި ވާދަކޮށް، ކުޑަ އައްޔަ ވަނީ ޑްރޮޕްނީ ޑިވިޝަނުން ދުނިޔޭގެ ރޭންކިން 12 ވަނަ އަށް ޖެހިލައިފަ އެވެ.
