ފެރާރީން އެންމެ ފުރަތަމަ އުފެއްދި އިލެކްޓްރިކް ކާރު، ޗެރިޓީ ނީލަމެއްގައި 40 މިލިއަން ޑޮލަރަށް ވިއްކާލައިފި އެވެ. މިއީ އާ އުޅަނދެއް ނީލަމެއްގައި ވިއްކާލި އަގަށް ބަލާއިރު ދުނިޔޭގެ ރެކޯޑެކެވެ.
އައިފޯން ފަރުމާކުރި އިނގިރޭސިވިލާތުގެ ސާ ޖޯނީ އައިވްގެ ހިޔާލަށް އުފައްދާފައިވާ "ފެރާރީ ލޫޗޭ" މޮޑެލްގެ މި ކާރު ވިއްކާލާފައިވަނީ ކެލިފޯނިއާގައި ބޭއްވި އާރް.އެމް ސޮދަބީސްގެ ހަރަކާތެއްގަ އެވެ. މި ކާރު ވިއްކާލި އަގަކީ އެ ހަރަކާތުގައި އާންމުކޮށް ކާރުތައް ވިއްކާ އަގަށް ވުރެ 35 ގުނަ ބޮޑު އަދަދެކެވެ.
މިދިޔަ މެއި މަހު "ލޫޗޭ" ބާޒާރަށް ނެރުމާއެކު ބައެއް ފަރާތްތަކުގެ ފާޑުކިޔުންތައް އެ ކާރަށް އަމާޒުވި އެވެ. ބައެއް މާހިރުން ބުނާ ގޮތުގައި، ބެޓެރިން ދުއްވާ ގޮތަށް ފަރުމާކޮށްފައިވާ އަދި ފަސް މީހުންގެ ޖާގަ ހިމެނޭ މި ކާރަކީ ފެރާރީގެ ސަގާފީ ފަރުމާތަކާ ބީރައްޓެހި، އެ ބްރޭންޑުގެ އަސްލު ގެއްލޭ ފަދަ އުފެއްދުމެކެވެ.
ސޮދަބީސްއިން ހާމަކުރި ގޮތުގައި، މި ނީލަމުން ލިބުނު ހުރިހާ ފައިސާއެއް ހަދިޔާކުރުމަށް ހަމަޖެހިފައިވަނީ ފެރާރީ ފައުންޑޭޝަނުން ހިންގާ ތައުލީމީ ޕްރޮގްރާމްތަކަށެވެ.
ހާއްސަ ފަރުމާތަކާއި ބައިތައް ހިމަނައިގެން ތައްޔާރުކޮށްފައިވާ މި "ލޫޗޭ" ކާރު ގަތް ފަރާތުގެ ނަމެއް ސޮދަބީސްއިން ހާމައެއް ނުކުރެ އެވެ.
މިއީ އީލޮން މަސްކްގެ ޓެސްލާ އާއި ޗައިނާގެ ކާރު އުފައްދާ ކުންފުނިތަކުން ބޮޑު ކާމިޔާބީއެއް ހޯދަމުން އަންނަ އިލެކްޓްރިކް ވެހިކަލް (އީވީ) މާކެޓަށް، ދުނިޔޭގެ މަޝްހޫރު ފެރާރީން ވަން ފުރަތަމަ ފަހަރެވެ.
