އީލޮން މަސްކުގެ ސްޕޭސްއެކްސް ކުންފުނިން އެ ކުންފުނީގެ ތާރީހުގައި ފުރަތަމަ ފަހަރަށް މާލީ ރިޕޯޓެއް އާންމުކޮށްފި އެވެ.
މި ރިޕޯޓުން ދައްކާ ގޮތުގައި ކުންފުނީގެ އާމްދަނީ ވަރަށް ބޮޑަށް އިތުރުވެފައިވީ ނަމަވެސް، މަޝްރޫއުތަކަށް ކުރާ ހޭދަ ވަނީ އިންތިހާއަށް މައްޗަށް ގޮސްފަ އެވެ.
އެމެރިކާގެ ހިއްސާގެ ބާޒާރުގައި ޖޫން މަހު ލިސްޓުކުރި މި ކުންފުނީގެ އާމްދަނީ ވޭތުވެދިޔަ އަހަރާ އަޅާބަލާއިރު 92 ޕަސެންޓު އިތުރުވެ 7.8 ބިލިއަން ޑޮލަރަށް އަރާފައިވެ އެވެ. ނަމަވެސް ކުންފުނީގެ ހަރަދުތައް ވަނީ 550 ޕަސެންޓު އިތުރުވެ 18.3 ބިލިއަން ޑޮލަރަށް އުފުލިފަ އެވެ. މީގެ އިތުރުން މި އަހަރުގެ ފުރަތަމަ ހަ މަސް ދުވަހުގެ ތެރޭގައި ކުންފުންޏަށް ވަނީ 2 ބިލިއަން ޑޮލަރުގެ ސާފު ގެއްލުމެއް ކުރިމަތިވެފަ އެވެ.
މި މާލީ ތަފާސްހިސާބުތަކާ އެކު ހިއްސާގެ ބާޒާރުގައި ސްޕޭސްއެކްސްގެ ހިއްސާގެ އަގު ވަނީ 9 ޕަސެންޓު ދަށަށް ގޮސްފަ އެވެ. މާލީ މާހިރުންނާއި އިންވެސްޓަރުންނާ ބައްދަލުކުރައްވައި ވާހަކަ ދައްކަމުން މަސްކު ބުނީ ގިނަ ބަޔަކަށް ސްޕޭސްއެކްސްގެ ގާބިލުކަން ވަޒަންކުރަން ނޭނގޭ ކަމަށެވެ.
އޭނާ ފާހަގަކުރި ގޮތުގައި ކުންފުނީގެ ގޮފިތަކުގެ ތެރެއިން މިހާރު ފައިދާވަމުންދާ ހަމައެކަނި ދާއިރާއަކީ ސްޓާލިންކް އިންޓަނެޓް ހިދުމަތެވެ. މިއަހަރުގެ ދެވަނަ ކުއާޓަރުގައި އެކަނިވެސް ސްޓާލިންކުން 1.6 ބިލިއަން ޑޮލަރުގެ އާމްދަނީއެއް ހޯދާފައިވެ އެވެ. މަސްކު ލަފާކުރާ ގޮތުގައި ކުރިއަށް އޮތް އަހަރުތަކުގައި ދުނިޔޭގެ އިންޓަނެޓްގެ ބޮޑު ބައެއް ކޮންޓްރޯލް ކުރާނީ ސްޓާލިންކުންނެވެ.
ސްޕޭސްއެކްސްއިން މިހާރު އަންނަނީ އާޓިފިޝަލް އިންޓެލިޖެންސް ނުވަތަ އޭއައި މަޝްރޫއުތަކަށް ބޭނުންވާ ކޮމްޕިއުޓިން ބާރު ފޯރުކޮށްދިނުމުގެ ވިޔަފާރިވެސް ފުޅާކުރަމުންނެވެ.
މިހާރުވެސް ގޫގުލް ފަދަ ބޮޑެތި ކުންފުނިތަކަށް މި ހިދުމަތް ދެމުންދާއިރު، އަންނަ އަހަރުގެ ތެރޭގައި މި ދާއިރާގެ ގާބިލުކަން 10 ގިގަވޮޓަށް އިތުރުކުރުމަށް ވަނީ ރޭވިފަ އެވެ.
މަސްކު ބުނި ގޮތުގައި ޑޭޓާ ސެންޓަރުތައް ބެލެހެއްޓުމަކީ ރޮކެޓް އުފެއްދުމާ އަޅާބަލާއިރު މާ އާދައިގެ ކަމެކެވެ. ނަމަވެސް ކުންފުނީގެ މައިގަނޑު މަސައްކަތް ކަމަށްވާ ރޮކެޓް އުފެއްދުމުގެ ދާއިރާއިން ދެވަނަ ކުއާޓަރުގައި ވަނީ 542 މިލިއަން ޑޮލަރުގެ ގެއްލުމެއް ވެފައެވެ. އަދި އޭއައި ވިޔަފާރިން 1.2 ބިލިއަން ޑޮލަރުގެ ގެއްލުން ވެފައިވާކަން ރިޕޯޓުން ދައްކައެވެ.
ކުންފުނީގެ މާލީ ކަންކަމުގެ އިސްވެރިޔާ ބްރެޓް ޖޯންސަން ބުނީ އަހަރުގެ ބާކީ އޮތް ދުވަސްތަކުގައިވެސް ކުންފުނީގެ ހަރަދުތައް މިހާރު ހުރި މިންވަރުގައި ހުންނާނެ ކަމަށެވެ. އެހެންނަމަވެސް މަސްކު ހުރީ ވަރަށް އުންމީދީ ގޮތެއްގަ އެވެ. އޭނާ ލަފާކުރައްވާ ގޮތުގައި 2030 ވަނަ އަހަރު އަންނައިރު ސްޕޭސްއެކްސްގެ އަހަރީ އާމްދަނީ 1 ޓްރިލިއަން ޑޮލަރަށް އަރާނެއެވެ. މިއީ މީގެ ހަ ހަފުތާ ކުރިން އޭނާ ލަފާކުރި މުއްދަތަށް ވުރެ އެއް އަހަރު އަވަސް މުއްދަތެކެވެ.
މި އުންމީދީ ވާހަކަތަކާ އެކުވެސް އިންވެސްޓަރުންގެ މެދުގައި އޮތް ކަންބޮޑުވުންތަކަށް ހައްލެއް ނުލިބުނެވެ.
އަންގާރަ ދުވަހުގެ މުއާމަލާތްތައް ނިމުނުއިރު ހިއްސާގެ އަގު ވަނީ 7 ޕަސެންޓަރަށް ވުރެ ބޮޑަށް ދަށަށް ގޮސްފަ އެވެ. ޖޫން މަހު ހިއްސާގެ ބާޒާރަށް ނުކުމެ މައިކްރޯސޮފްޓް އަދި އެމެޒޯން ފަދަ ކުންފުނިތަކާ ވާދަކުރި ނަމަވެސް، ފަހަކަށް އައިސް ސްޕޭސްއެކްސްއަށް ވަނީ އިންވެސްޓަރުންގެ އިތުބާރު ހިފެހެއްޓުމުގައި ގޮންޖެހުންތަކެއް ކުރިމަތިވެފައެވެ. ޖޫން މަހު 176 ޑޮލަރުގައި ހުރި ހިއްސާގެ އަގު މިހާރު ދަނީ މަޑުމަޑުން ދަށަށް ދަމުންނެވެ.
