މޮރޮކޯއާ އިންވެގެން އޮންނަ ސްޕެއިންގެ ސަރަހައްދެއް ކަމަށްވާ ސެއުޓާއަށް ހާހަކަށް ވުރެ ގިނަ ރެފިއުޖީންއެއް ކަނޑުގައި ފަތާފައި ގޮސް އަރައިފި އެވެ.
މިކަމާ ގުޅިގެން ސެއުޓާގެ ރައީސް ހުއާން ހީސޫސް ވިވާސް ވިދާޅުވީ، ކުއްލިއަކަށް ގިނަ އަދަދެއްގެ ބަޔަކު ވަނުމުގެ ސަބަބުން އެ ސަރަހައްދުގެ ވަސީލަތްތަކަށް ނުކަތާވަރު ވެފައިވާ ކަމަށާއި، މިކަމަށް އަވަސް ހައްލެއް ހޯދުމަށް ސްޕެއިންގެ މައި ސަރުކާރުން ވަގުތުން މައްސަލައިގެ ތެރެއަށް ވަނުމަށް އެދޭ ކަމަށެވެ.
ސްޕެއިންގެ ހޯމް މިނިސްޓަރު ފެނާންޑޯ ގްރާންޑޭ މާލަސްކާ އަންނަ ހުކުރު ދުވަހު އެ ސަރަހައްދަށް ޒިޔާރަތް ކުރައްވާނެ ކަމަށް ރޮއިޓާސް ނިއުސް އެޖެންސީން ވަނީ ރިޕޯޓުކޮށްފަ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ގިނަ އަދަދެއްގެ ބަޔަކު ފަތާފައި ސެއުޓާއަށް އަރަމުންދެ އެވެ. މީގެ އިތުރުން ބައެއް މީހުން ބޯޑަރުގައި ޖަހާފައިވާ ފެންސުގެ ދޮރުތަކުން ދުވެފައި ވަންނަ މަންޒަރުވެސް ވަނީ ފެނިފައެވެ.
ސެއުޓާއަށް ވަން މީހުންގެ އަދަދާ މެދު ތަފާތު ވާހަކަތައް ދަނީ ފެތުރެމުންނެވެ. ސްޕެއިންގެ ބައެއް މީޑިއާތަކުން އަންދާޒާ ކުރާ ގޮތުގައި ބުރާސްފަތި ދުވަހު ވެސް ދެހާހާއި ތިންހާހާ ދެމެދުގެ އަދަދަކަށް މީހުން އެ ސަރަހައްދަށް ވަދެފައިވެ އެވެ. ނަމަވެސް، ސްޕެއިންގެ ސަލާމަތީ ބާރުތަކުން މި އަދަދުތައް އަދި ރަސްމީކޮށް ކަށަވަރުކޮށްދީފައެއް ނުވެ އެވެ.
ސްޕެއިންގެ ދައުލަތުގެ ބްރޯޑްކާސްޓަރު އާރްޓީވީއީން ރިޕޯޓުކޮށްފައިވާ ގޮތުގައި ފާއިތުވި ދެ ހަފުތާގެ ތެރޭގައި 1500 އަށްވުރެ ގިނަ މީހުން ވަނީ ސެއުޓާއަށް ވަދެފަ އެވެ. މީގެ ތެރޭގައި ގިނައީ މޮރޮކޯގެ ޒުވާނުންނެވެ.
ރެފިއުޖީންގެ ތެރެއިން ގިނަ ބަޔަކު ކަނޑުމަތީގައި ފުރާނަ ގެއްލެމުންދާ ކަމުގެ ކަންބޮޑުވުންވެސް ވިވާސް ވަނީ ފާޅުކުރައްވާފައެވެ. އޭނާ ވިދާޅުވި ގޮތުގައި ފާއިތުވި މަސްތަކުގެ ތެރޭގައި އެކަނިވެސް ކަނޑުމަތިން 60 މީހެއްގެ ހަށިގަނޑު ވަނީ ފެނިފަ އެވެ.
މިހާރު ކުރިމަތިވެފައިވަނީ އިންސާނީ އަދި ސަލާމަތީ ގޮތުން ނުރައްކާތެރި ކުއްލި ހާލަތެއް ކަމަށާއި، ބެލެނިވެރިއަކާ ނުލައި އަންނަ ކުޑަކުދިން ބައިތިއްބާ މަރުކަޒުތައް ހުރީ ފުރިފައި ކަމަށްވެސް އޭނާ ފާހަގަކުރެއްވި އެވެ.
މި ހާލަތަކީ 2021 ވަނަ އަހަރުގެ މޭ މަހު ހިނގި ހާދިސާއާ އެއްގޮތް ކަމެއް ކަމަށް ގިނަ ބަޔަކު ދެކެއެވެ. އެ ފަހަރު މަދު ދުވަސްކޮޅެއްގެ ތެރޭގައި އަށް ހާހެއްހާ މީހުން ސެއުޓާއަށް ވަނުމުގެ ސަބަބުން ސްޕެއިންއާއި މޮރޮކޯގެ ސިޔާސީ ގުޅުމަށް ބޮޑެތި ލޮޅުންތަކެއް އެރި އެވެ. އެފްރިކާ ބައްރުގައި އޮންނަ ސްޕެއިންގެ ސެއުޓާ އަދި މެލީލާއަކީ ވިލާތުގެ އިއްތިހާދާއި އެފްރިކާއާ ދެމެދު އެއްގަމު ބޯޑަރު އޮންނަ ހަމައެކަނި ދެ ސަރަހައްދެވެ.
ފާއިތުވި އަހަރުތަކުގައި ސްޕެއިންގެ ސަރުކާރުން ވަނީ މި ސަރަހައްދުތަކުގެ ސަލާމަތީ ކަންކަން ވަރުގަދަކޮށް، ބޯޑަރު ފެންސުތައް އުސްކޮށް، މޮރޮކޯއާއެކު އޮންނަ ގުޅުން ރަނގަޅު ކުރުމަށް ގިނަ މަސައްކަތްތަކެއް ކޮށްފައެވެ. ނަމަވެސް، ރަނގަޅު ދިރިއުޅުމެއް ހޯދުމުގެ އުންމީދުގައި ވިލާތަށް ދާން ބޭނުންވާ މީހުން މި ނުރައްކާތެރި ދަތުރުތައް ކުރުން އަދިވެސް ހުއްޓައެއް ނުލައެވެ.
