ރާއްޖޭގެ ކުޅިވަރުގެ ދާއިރާއިން ދިވެހި ޤައުމަށް އަގުހުރި ޚިދުމަތްތަކެއް ކޮށްދެއްވާފައިވާތީ، ޚިދުމަތުގެ ގައުމީ އިނާމު، މަޝްހޫރު ފުޓްބޯޅަ ކޯޗު، އަލްމަރްޙޫމް އިޙްސާން ޢަބްދުލްޣަނީ (ސާންތީ) ގެ ހަނދާނަށް އަރުވައިފި އެވެ.
ރާއްޖޭގެ ކުޅިވަރަށާއި މައިގަނޑު ގޮތެއްގައި ފުޓްބޯޅަ އަށް ހަޔާތުގެ ބޮޑުބައި ހިދުމަތްކޮށްދިނުމަށް ފަހު، މި ފަނާކުރަނިވި ދުނިޔެ އިން، އުމުރުން 51 އަހަރުގައި ސާންތީ ވަކިވެދިޔައީ، ފަހު ވަގުތާ ހަމައަށް ވެސް ދިވެހި ފުޓްބޯޅަ އަށް ހިދުމަތްކޮށްދިނުމުގައި ދެމިހުރުމަށް ފަހު، މިދިޔަ އަހަރުގެ މާޗް، 22 ވަނަ ދުވަހު އެވެ.
ދިވެހި ފުޓްބޯޅައިގެ ދަނޑުގައި "ސާންތީ" ގެ ނަމުން މަޝްހޫރުވެފައިވާ ސާންތީ އަކީ ރާއްޖޭގެ ފުޓްބޯޅައިގެ ތާރީހު ދުށް އެންމެ ފާހަގަކޮށްލެވޭ އަދި އެންމެ ކާމިޔާބު އެއް ކޯޗެވެ. މަޖީދިއްޔާ ސްކޫލް އަދި ޔޫތު ސްޕޯޓްސް ކްލަބުގެ ހުނަރުވެރި މިޑްފީލްޑަރެއްގެ ގޮތުގައި ފުޓްބޯޅަ އަށް ނުކުތް ސާންތީ، މަގުބޫލުކަން ހޯދީ ކޯޗެއްގެ ގޮތުގަ އެވެ.
ސާންތީ: ކުޅުންތެރިންނަށް ފުޓްބޯޅައިގައި "ބައްޕަ" އެއް، ކުޅިވަރުގައި ގައުމީ ހިދުމަތްތެރިއެއް!
ރާއްޖޭގެ ކުޅިވަރަށާއި މައިގަނޑު ގޮތެއްގައި ފުޓްބޯޅަ އަށް ހަޔާތުގެ ބޮޑުބައި ހިދުމަތްކޮށްދިނުމަށް ފަހު، މި ފަނާކުރަނިވި ދުނިޔެ އިން، އުމުރުން 51 އަހަރުގައި އިހުސާން (ސާންތީ) ވަކިވެދިޔައީ، ފަހު ވަގުތާ ހަމައަށް ވެސް ދިވެހި ފުޓްބޯޅަ އަށް ހިދުމަތްކޮށްދިނުމުގައި ދެމިހުރުމަށްފަހު
ދިވެހި ފުޓްބޯޅައިގެ ތާރީޚުގައި ފާހަގަކޮށްލެވޭ އެންމެ ބޮޑެތި ކާމިޔާބީތަކުގެ ފަހަތުގައި ސާންތީގެ ހިއްސާ ބޮޑެވެ. އެ ގޮތުން، 2004 ވަނަ އަހަރު އޭޝިއާގެ ގަދަބާރު، ދެކުނު ކޮރެއާ އާއި ދެކޮޅަށް ކުޅެ ރާއްޖެ އިން އެއްވަރުކުރި ތާރީޚީ މެޗުގައި އެސިސްޓެންޓް ކޯޗަކީ ސާންތީ އެވެ.
ރާއްޖޭން، 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކޮށް، ފުރަތަމަ ފަހަރަށް ގައުމަށް ރަން ކާމިޔާބެއް ހޯދައިދިންއިރު، ހެޑް ކޯޗުގެ އެންމެ އިސް އެސިސްޓެންޓަކީ ވެސް ސާންތީ އެވެ އަދި އޭގެ 10 އަހަރު ފަހުން، 2018 ވަނަ އަހަރު، ދެ ވަނަ ފަހަރަށް ރާއްޖެއިން ސާފް ޗެމްޕިއަންޝިޕް ކާމިޔާބުކުރިއިރު، ސާންތީ އަކީ އެފްއޭއެމްގެ ޓެކްނިކަލް ޑައިރެކްޓަރެވެ.
ކްލަބް ފެންވަރުގައި ބަލާއިރު، ސާންތީގެ އެންމެ ބޮޑު މަސައްކަތެއް ފެނުނީ ކްލަބް އީގަލްސް އިންނެވެ. އެ ގޮތުން، މުސްތަގުބަލަށް ފެށި ވަރުގަދަ ޕްރޮޖެކްޓެއްގެ ތެރެއިން، އާ ޒުވާން ކުޅުންތެރިން ސީނިއާ ލެވަލާ ހަމައަށް ގެނެސް، އެ ކުޅުންތެރިންނާއެކު 2016 ވަނަ އަހަރުގެ ޕްރެޒިޑެންޓްސް ކަޕް ކާމިޔާބުކުރުމަކީ، ރާއްޖޭގެ ފުޓްބޯޅައިގައި މި ފަހުން ޓީމެއް ޑިވެލޮޕްކޮށްގެން ކުރި އެންމެ ކާމިޔާބު މަސައްކަތެވެ.
ކެންސަރު ބައްޔާ ހަޔާތުގެ ފަހު އަހަރުތަކުގައި، ހަނގުރާމަ ކުރަމުންދިޔައިރު ވެސް ފުޓްބޯޅައިގެ މުހިންމު މަސައްކަތްތަކެއް ސާންތީ އަދާކުރި އެވެ. ފަހުން ސިއްހީ އެކި މައްސަލަތައް ދިމާވި ނަމަވެސް ސާންތީ ފެނުނީ، ވަރުގަދަ ރޫހެއްގައި މީހުންނާ އެކު، ފުޓްބޯޅައިގެ އެކި މަަސައްކަތުގައި ޝާމިލުވެ އުޅުންތަނެވެ.
މޯލްޑިވްސް ސޮކަ މޭޓްސް (އެމްއެސްއެމް) އާއި އެފްއޭމް އިން މި ފަހުން ބޭއްވި ދިވެހި ޔޫތު ލީގުގެ ޓެކްނިކަލް ޑިރެކްޓަރުގެ މަގާމު އަދާކުރުމާއި 16 އަހަރުން ދަށުގެ ގައުމީ ޓީމުގެ ކޯޗިން ޓީމަށް އެހީތެރިކަން ފޯރުކޮށްދިނުމުގެ އިތުރުން، އެފްއޭއެމްގެ އެންމެ ފަހުން އޮތް ނޯމަލައިޒިން ކޮމިޓީގެ ދަށުން އޮތް، ޓެކްނިކަލް ކޮމިޓީ އަށް ވެސް ސާންތީ ޓެކްނިކަލް އެހީ ފޯރުކޮށްދިނުމެވެ.
މޯލްޑިވްސް ސްޕޯޓްސް ކޯޕަރޭޝަންގެ ޗެއާމަންކަން ވެސް ކުރެއްވި ސާންތީ ވަނީ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ރާއްޖޭން 2015 ވަނަ އަހަރު ވާދަކުރިއިރު، ކޮންޓިންޖެންޓްގެ ޝެފް ޑި މިޝަންގެ ޒިންމާ އަދާކޮށްފަ އެވެ. ރާއްޖޭގެ ކުޅިވަރު ތާރީހުގައި ފުރަތަމަ ފަހަރަށް ބައިނަލްއަގުވާމީ ގޭމްސް އަކުން ރަން މެޑަލް ހޯދި ގޭމްސްގައި ސާންތީ ހުރީ ރާއްޖޭގެ މުޅި ކޮންޓިންޖެންޓްގެ ޒިންމާ ބޮލުގައި އަޅައިގެންނެވެ.
ހއ. އުތީމުގައި މިއަދު ހެނދުނު ބޭއްވި ގައުމީ ދުވަހުގެ ހާއްސަ ރަސްމީ ޖަލްސާގައި، ސާންތީގެ އާއިލާގެ ފަރާތުން ގައުމީ އިނާމާ ހަވާލުވީ އޭނާގެ ކޮއްކޮ، އަހުސަން އަބްދުލްގަނީ އެވެ.
