ރަޝިޔާގެ ރައީސް ވްލަޑިމިއަ ޕުޓިން، ޖަޕާނުގެ ހޮކައިޑޯ ކައިރީގައި އޮންނަ ކޫރިލް އައިލެންޑްސްގެ ރަށަކަށް ވަޑައިގެންނެވުމުން ޖަޕާނުން ނުރުހުންފާޅުކޮށްފި އެވެ.
މިއީ ޖަޕާނުން މިލްކުވެރިކަމަށް ދައުވާކުރާ ރަށެކެވެ. ޕުޓިން މި ރަށަށް ޒިޔާރަތްކުރައްވާފައި މި ވަނީ، ރަޝިޔާގެ ބޮޑު ކަނޑުގެ އަސްކަރީ ތަމްރީނުތަކެއް ކުރިއަށް ގެންދިއުމާއި، ރަޝިޔާގެ ބައިވެރިއެއް ކަމަށްވާ އުތުރު ކޮރެއާއިން މިސައިލެއް ފޮނުވާލިތާ އެއް ދުވަސް ފަހުންނެވެ.
ދެވަނަ ބޮޑު ހަނގުރާމައަށް ފަހު މޮސްކޯ އާއި ޓޯކިޔޯއާ ދެމެދު ރަސްމީ ސުލްހައިގެ އެއްބަސްވުމެއްގައި މިހާތަނަށް ސޮއިކުރެވިފައި ނުވަނީ، ޖަޕާނުން "ނޮދަން ޓެރިޓަރީޒް" ގެ ނަމުން ނަންދީފައިވާ މި ރަށްތަކުގެ މިލްކުވެރިކަމާ މެދު އުފެދިފައިވާ ހިޔާލުތަފާތުވުންތަކަށް ހައްލެއް ލިބިފައި ނުވާތީ އެވެ.
ރަޝިޔާގެ ދައުލަތުގެ މީޑިއާ އެޖެންސީ ކަމަށްވާ "ޓާސް" އިން ރިޕޯޓްކުރި ގޮތުގައި، މިއީ ޕުޓިން އެ ރަށްތަކަށް ކުރެއްވި ފުރަތަމަ ޒިޔާރަތެވެ. ރަޝިޔާގެ އިރުމަތީ ސަރަހައްދުގައި ކުރިއަށްދިޔަ ކަނޑުގެ އަސްކަރީ ތަމްރީނުތައް ބައްލަވާލެއްވުމަށް ފަހު، ޕުޓިން ވަނީ އިޓުރުޕްގައި ހުންނަ "ޔަސްނީ" މަސް ބަންދުކުރާ ކާރުހާނާއަށް ޒިޔާރަތްކުރައްވާފަ އެވެ.
ޕުޓިން އެ ރަށަށް ކުރެއްވި ޒިޔާރަތާ ގުޅިގެން ޖަޕާނުގެ ފޮރިން މިނިސްޓަރު ވަނީ އެކްސް މެދުވެރިކޮށް ނުރުހުން ފާޅުކުރައްވާފަ އެވެ.
ޖަޕާނުގެ ފޮރިން މިނިސްޓަރު ތޮޝިމިޓްސޫ މޮޓެގީ ވިދާޅުވީ، އެޓޯރޯފޫ ހިމެނޭ ގޮތަށް އުތުރުގެ ސަރަހައްދުތަކަކީ ތާރީހީ ގޮތުންނާއި ބައިނަލްއަގުވާމީ ގާނޫނުތަކުގެ ދަށުން ވެސް ޖަޕާނުގެ އަމިއްލަ ސަރަހައްދުތަކެއް ކަމަށެވެ. އަދި ޕުޓިންގެ އެ ޒިޔާރަތާ މެދު ޖަޕާނުން ވަރަށް ބޮޑަށް އިހުތިޖާޖު ކުރާ ކަމަށް ވެސް އޭނާ ވިދާޅުވި އެވެ.
