ބެއިޖިންގައި ބޭއްވި ސިލްސިލާ ސަމިޓްތަކަށް ފަހު 2026 ވަނަ އަހަރު ގައުމުން ބޭރަށް ކުރައްވާ ފުރަތަމަ ދަތުރުފުޅުގައި ޗައިނާގެ ރައީސް ޝީ ޖިންޕިން މިއަދު އުތުރު ކޮރެއާއަށް ވަޑައިގެންފި އެވެ.
އެމެރިކާގެ އެންމެ ބޮޑު ވާދަވެރިޔާ، ޗައިނާއަކީ އުތުރު ކޮރެއާގެ އެންމެ ބޮޑު ވިޔަފާރި ބައިވެރިޔާ އެވެ. އަދި ބައިނަލްއަގުވާމީ ގިނަ ދަތިކުރުމުގެ ފިޔަވަޅުތަކެއް ކުރިމަތިވެފައިވާ އުތުރު ކޮރެއާއަށް ހާރިޖީ ގޮތުންނާއި އިގުތިސާދީ ގޮތުން އެންމެ ބޮޑު އެހީތެރިކަމެއް ފޯރުކޮށްދޭ ގައުމަކީ ވެސް ޗައިނާ އެވެ.
ޝިންހުއާ ނިއުސް އެޖެންސީން އާންމުކުރި ވީޑިއޯއިން ފެންނަ ގޮތުގައި، 2019 ވަނަ އަހަރަށް ފަހު ޝީ އުތުރު ކޮރެއާއަށް ކުރެއްވި ފުރަތަމަ ދަތުރުފުޅުގައި އެއާ ޗައިނާގެ މަތިންދާބޯޓުން ފައިބައިވަޑައިގަތުމުން، ރަތް ދޫލައިގެ މަތީގައި ސަފުތަކަކަށް އެތުރިގެން ތިބި އަސްކަރީ އޮފިސަރުން ވަނީ އެމަނިކުފާނަށް މަރުހަބާ ދަންނަވާފަ އެވެ.
އެއާޕޯޓުގައި ޗައިނާ އާއި އުތުރު ކޮރެއާގެ ދިދަތަކުގެ ތިރީގައި ހަރުކޮށްފައިވާ ބެނާއެއްގައި "ކޮމްރޭޑް ޝީ ޖިންޕިންއަށް ވަރަށް ހޫނު މަރުހަބާއެއް ދަންނަވަން" މިހެން ލިޔެފައިވާ އިރު، ދެ ގައުމުގެ ދެމެދުގައި އޮތް "ގުޑުވާނުލެވޭ ފަދަ އެކުވެރިކަން" ފާހަގަކޮށްފައިވެ އެވެ.
ޝީ މި ދަތުރުފުޅު ކުރެއްވީ އެމެރިކާގެ ރައީސް ޑޮނަލްޑް ޓްރަމްޕާއި ރަޝިއާގެ ރައީސް ވްލަޑިމިއަ ޕޫޓިންއާ ވަކިވަކިން ބެއިޖިންގައި ބައްދަލުކުރެއްވުމަށް ފަހުގަ އެވެ. އަދި މި ދަތުރުފުޅު މި ކުރެއްވީ އުތުރު ކޮރެއާގެ ނިއުކްލިއާ ހަތިޔާރާ ގުޅޭ ގޮތުން އެމެރިކާއާ އެކު ކުރަމުންދާ މަޝްވަރާތައް ހުއްޓުމަކަށް އައިސްފައިވާ ދަނޑިވަޅެއްގަ އެވެ.
މިދިޔަ މޭ މަހު ވައިޓް ހައުސްއިން ބުނެފައިވާ ގޮތުގައި، ބެއިޖިންގައި ބޭއްވި ސަމިޓްގައި ޝީ އާއި ޓްރަމްޕް ވަނީ "އުތުރު ކޮރެއާ ނިއުކްލިއާ ހަތިޔާރު ނައްތާލުމުގެ" އެއް އަމާޒެއް ދެ ގައުމުން ވެސް ގެންގުޅޭކަމަށް ބުނެފަ އެވެ.
ނަމަވެސް، އުތުރު ކޮރެއާގެ ލީޑަރު ކިމް ޖޮންގް އުންގެ ނުފޫޒުގަދަ ކޮއްކޯފުޅު، ޝީ ވަޑައިގަތުމުގެ އެއް ދުވަސް ކުރިން ވިދާޅުވީ އެ ގައުމުގެ ނިއުކްލިއާ ހަތިޔާރުގެ ޕްރޮގްރާމަކީ އެއްވެސް ހާލެއްގައި ހުއްޓާލާނެ މަސައްކަތެއް ނޫން ކަމަށެވެ.
