އެމެރިކާގެ މަޝްހޫރު ފުޓްބޯޅަ ކުޅުންތެރިޔާ ޓްރެވިސް ކެލްސީ އާއި ލަވަކިޔުންތެރިޔާ ޓެއިލާ ސުވިފްޓްގެ ކައިވެނީގެ ހަފުލާއާ ގުޅޭ ގޮތުން ކެލްސީ ފުރަތަމަ ފަހަރަށް ވާހަކަދައްކައިފި އެވެ.
އެމެރިކާގެ މީޑިއާތަކަށް މައުލޫމާތު ދެމުން ކެލްސީ ބުނީ އެއީ "ހަޔާތުގައި އައި އެންމެ އުފާވެރި ރޭ" ކަމަށެވެ.
މި ދެމީހުން ކައިވެނުކުރީ މިދިޔަ ޖުލައި މަހުގެ ތިންވަނަ ދުވަހު ނިއުޔޯކްގެ މެޑިސަން ސްކޮޔާ ގާޑަންގަ އެވެ. ގިނަ އަދަދެއްގެ ތަރިން ބައިވެރިވި މި ހަފުލާ ބާއްވާފައިވަނީ އާންމުންނަށް ސިއްރުކޮށްގެންނެވެ.
މި ކައިވެނީގެ ހަފުލާއާ ގުޅޭ މާ ގިނަ ތަފުސީލުތަކެއް މިހާތަނަށް އާންމުވެފައި ނުވާއިރު، މަޖާ އެކްޓަރު އެޑަމް ސޭންޑްލާ ކައިވެނިކޮށްދިން ފަހުން ކެލްސީ މިކަމާ ގުޅޭ ގޮތުން ވާހަކަދެއްކި މިއީ ފުރަތަމަ ފަހަރެވެ.
ކެންސަސް ސިޓީ ޗީފްސްގެ ޓްރެއިނިން ކޭމްޕުގައި ނޫސްވެރިންނާ ވާހަކަދައްކަމުން ކެލްސީ ބުނީ، ކުޅިވަރުގެ ދުނިޔޭގައި "މައްކާ" އެއްގެ ގޮތުގައި ބެލެވޭ މެޑިސަން ސްކޮޔާ ގާޑަންގައި ކައިވެނި ކުރެވުމަކީ އޭނާ ކުޑައިރުއްސުރެ ދެކެމުން އައި ހުވަފެނެއް ހަގީގަތަކަށް ވުން ކަމަށެވެ.
އެއީ އޭނާގެ ހަޔާތުގައި އައި އެންމެ ފުރިހަމަ ރޭގެ ގޮތުގައި ސިފަކުރަމުން، ކެލްސީ ވަނީ އެ ހަފުލާއަށް ދިޔަ ހުރިހާ މެހުމާނުންނަށް ޝުކުރު އަދާކޮށްފަ އެވެ. އަދި އެއީ ވަރަށް "ފޯރިގަދަ ރެއެއް" ކަމަށް ވެސް އޭނާ ބުންޏެވެ.
އެމެރިކާގެ ނޭޝަނަލް ފުޓްބޯލް ލީގު (އެންއެފްއެލް) ގެ ތަރި ކެލްސީ އާއި އެވޯޑްތައް ހާސިލުކޮށްފައިވާ ލަވަކިޔުންތެރިޔާ ޓެއިލާ ވަނީ ކައިވެނީގެ ގިނަ ތަފުސީލުތައް ސިއްރުކޮށްފަ އެވެ. އަދި ސްޓޭޑިއަމް ތެރޭގައި ބޭއްވި އެ ހަފުލާގެ ރަސްމީ އެއްވެސް ފޮޓޯއެއް މިހާތަނަށް އާންމުކޮށްފައެއް ނުވެ އެވެ. މި ހަފުލާގައި ހޮލީވުޑްގެ މަޝްހޫރު ތަރިން ކަމަށްވާ ހިއު ގްރާންޓް، ޖޭސަން ސުޑޭކިސް، ލަވަކިޔުންތެރިޔާ ބެންސަން ބޫން އަދި މޮޑެލް ޖީޖީ ހަދީދު ފަދަ ފަރާތްތަކުން ބައިވެރިވި އެވެ.
