މިލްކުވެރިކަމާ މެދު ދެބަސްވުން އުފެދިފައިވާ ބޯޑަރު ސަރަހައްދުގައި ހިނގަމުންދާ ހާދިސާތަކަކީ "ވަރަށް ސީރިއަސް" ކަންތައްތަކެއް ކަމަށާއި، ބޯޑަރުގެ ކަންކަން ހުރި ގޮތުގެ ސަބަބުން ޗައިނާއާއެކު އޮތް ސިޔާސީ ގުޅުމަށް އަސަރު ކުރާނެ ކަމަށް އިންޑިއާގެ އެކްސްޓާނަލް އެފެއާޒް މިނިސްޓްރީން ބުނެފި އެވެ.
މިނިސްޓްރީން މިހެން ބުނީ ދެ ގައުމުގެ އަސްކަރިއްޔާގެ މެދުގައި އަލުން ކުރިމަތިލުންތަކެއް ހިނގާފައިވާ ކަމަށް ބުނެ ކުރިމަތިވި ސުވާލަކަށް ޖަވާބު ދެމުންނެވެ.
ތަރުޖަމާނު ރަންދީރު ޖައިސްވާލް ވަނީ ބޯޑަރުގައި އާ ހާދިސާއެއް ހިނގާފައިވާ ކަމަށް ބުނާ ވާހަކަތައް ދޮގުކުރަން އިންކާރު ކުރައްވާފަ އެވެ. އޭނާ ވިދާޅުވީ، މިދިޔަ އޯގަސްޓް މަހު ދެ ގައުމުގެ މެދުގައި ބޭއްވި ބޯޑަރުގެ ކަންކަމާ ބެހޭ އަސްކަރީ އަދި ޑިޕްލޮމެޓިކް ޖޮއިންޓް ވޯކިން ކޮމިޓީގެ ބައްދަލުވުމުގައި ވެސް އިންޑިއާގެ މި ނިންމުން ތަކުރާރުކޮށްފައިވާނެ ކަމަށެވެ. ނަމަވެސް، މިކަމާ ގުޅޭ އިތުރު ތަފުސީލެއް ދެއްވަން އޭނާ ވަނީ އުޒުރުވެރިވެވަޑައިގެންފަ އެވެ.
އިންޑިއާގެ ބޯޑަރު ސްޓޭޓެއް ކަމަށްވާ އަރުނާޗަލް ޕްރަދޭޝްގައި ޗައިނާގެ ހަރަކާތްތައް އިތުރުވަމުންދާ ކަމަށް ބުނެ އިންޑިއާގެ ކޮންޓެންޓް ކްރިއޭޓަރުން ސޯޝަލް މީޑިއާގައި އާންމުކުރި ވީޑިއޯތަކެއް ވަނީ ވަރަށް ބޮޑަށް ފެތުރިފަ އެވެ.
މި ވާހަކަތައް އައިސްފައިވަނީ ދެ ގައުމުގެ އިސް އޮފިޝަލުން ނިއުދިއްލީގައި ބައްދަލުކުރިތާ މަދު ދުވަސްކޮޅެއް ފަހުންނެވެ. އަދި މިއީ ބްރެޒިލް، ރަޝިއާ، އިންޑިއާ، ޗައިނާ އަދި ދެކުނު އެފްރިކާ ހިމެނޭ ބްރިކްސް އިއްތިހާދުގެ ސަމިޓަށް ޗައިނާގެ ރައީސް ޝީ ޖިންޕިން އިންޑިއާއަށް ވަޑައިގަތުމަށް ހަމަޖެހިފައިވާ ދަނޑިވަޅެކެވެ. މިފަހަރުގެ ސަމިޓް ބާއްވަނީ އިންޑިއާގެ ރިޔާސަތުގެ ދަށުންނެވެ.
ޗައިނާ އާއި އިންޑިއާގެ ދެމެދުގައި 3،488 ކިލޯމީޓަރުގެ ދިގު ބޯޑަރެއް އޮންނައިރު، މިއީ އިން ކަނޑައަޅާފައިވާ ބޯޑަރަކަށް ނުވާތީ ފާއިތުވި އަހަރުތަކުގައި މި ސަރަހައްދުގައި ނުތަނަވަސްކަން ވަނީ ބޮޑުވެފަ އެވެ. ނިއުކްލިއާ ހަތިޔާރު ލިބިފައިވާ މި ދެ ގައުމުގެ ގުޅުން މަޑުމަޑުން ރަނގަޅުވާން ފަށާފައިވަނީ 2020 ވަނަ އަހަރުގެ ޖޫން މަހު ބޯޑަރުގައި ހިނގި ކުރިމަތިލުންތަކެއްގައި ސިފައިން މަރުވި ހާދިސާއަށް ފަހު އެވެ. އިންޑިއާގެ ބޮޑުވަޒީރު ނަރެންދުރަ މޯދީ މިދިޔަ އޯގަސްޓް މަހު ޓިއަންޖިންގައި ރައީސް ޝީއާ ބައްދަލުކުރެއްވުމަކީ ދެ ގައުމުގެ ގުޅުން އިއާދަވަމުންދާ ކަމުގެ ނިޝާނެކެވެ.
